Ads by Google Ads by Google

Teena Fa’amasinoga le talosaga a Wayne Smith e toe sui lana fa’asalaga


[ata: foa'i]
ausage@samoanews.com

Ua teena e le Fa’amasinoga Maualuga le talosaga a le ali’i pagota o Wayne Otto Smith, mo se avanoa e fa’aleaoga ai le fa’asalaga a le Fa’amasinoga ua mae’a ona tu’uina atu ia te ia, ae toe iloilo e le Fa’amasinoga se isi fa’aiuga talafeagai mo ia.

 

E le gata na teena e le afioga i le Fa’amasino Sili ia Michael Kruse le talosaga a Smith, ae sa ia taua fo’i lona sauni e tuuina mai sana faaiuga tusitusia e fa’ailoa mai ai mafaufauga o le fa’amasinoga e uiga i lenei mataupu.

 

O le talosaga a Smith, lea na tauala atu i lana loia fautua ia Richard deSaulles, sa ia talosagaina ai le fa’amasinoga ina ia fa’aleaoga le fa’asalaga e pei ona ia tuliina ai tausaga e 15 i le toese i Tafuna, ona o le fa’alavelave lea ua ta’usala ai o ia i lona faia o uiga mataga fa’afeusuaiga i le tama teine a lona to’alua e 15 tausaga le matua.

 

O le mataupu a Smith na fofogaina i luma o le fa’amasinoga i le 2 vaiaso talu ai. O le aso Faraile o le vaiaso na te’a nei na toe valaau ai loa e le fa’amasinoga le mataupu a Smith.

 

Saunoa Kruse i le taimi na toe valaau ai lenei mataupu i le vaiaso na te’a nei, e foliga mai e i ai le tagata ua pepelo i le fa’amasinoga. Sa ia fa’ailoa i le loia a Smith o deSaulles e fa’apea, i le aso na iloilo ai e le fa’amasinoga le maliliega na sainia e le malo ma Smith, sa fesiligia ai e le fa’amasinoga ia Smith, poo aofia uma i totonu o le maliliega ua latou sainia ma e malo mea uma sa latou talanoa ma malilie i ai. Na tali Smith, “O lea lava lau afioga”.

 

Saunoa Kruse e fa’apea, o le popolega o le fa’amasinoga o loo i ai i le mataupu lenei, afai nei ae talia e le fa’amasinoga le talosaga a Smith ina ia fa’aleaoga lana fa’asalaga ae toe iloilo se isi fa’asalaga fou, o le a fai lea ma tulaga e le aoga ai ona toe faia ni maliliega i le va o le malo ma i latou ua molia.

 

Sa ia fa’amanatu fo’i ia deSaulles e fa’apea, e ui i le tele o moliaga na molia ai e le malo ia Smith, ae na solofua uma e le fa’amasinoga nei mau moliaga, i lalo o le talitonuga a le fa’amasinoga, ua malamalama lelei Smith i tuutuuga uma o le latou maliliega ma le malo. Ae foliga mai e le o le tulaga lea ua taoto i ai lenei mataupu.

 

Na fa’amalulu deSaulles i le fa’amasinoga ona o le talosaga a Smith ua i luma o le fa’amasinoga. Sa fa’amanino atili e deSaulles e fa’apea, e le o tete’e Smith i le faaiuga a le fa’amasinoga, pau le itu o loo finau ai o ia, ona o lona talitonuga, ua le fa’amaoni le loia a le malo i lana folafolaga sa tuuina atu ia te ia, e ala i le finau lea o le malo e fa’asala o ia i le fa’asalaga pito maualuga o loo fa’atulaga mai e le tulafono.

 

Saunoa atili deSaulles e fa’apea, ua faatamala fo’i lana pito laau, sa tatau lava ona aofia uma i totonu o le maliliega le tulaga e pei ona taua e le loia a le malo. Sa ia ta’utino i le fa’amasinoga, o le a le toe tula’i mai lenei fa’aletonu i le lumana’i.

 

Na toe fa’ailoa e Kruse ia deSaules e fa’apea, ina ua mae’a ona fa’atauto e le fa’amasinoga ia Smith i le aso na tolaulau ai le latou maliliega ma le malo, sa ia fa’ailoa i le fa’amasinoga lona malamalama atoa i tuutuuga o le maliliega, peita’i ua fa’ateia le fa’amasinoga ina ua toe sau o ia ma finau mai e fa’aleaoga le fa’aiuga ua tuuina atu ia te ia.

 

Saunoa Kruse, pau le tulaga lea ua mafaufau i ai le fa’amasinoga, ona fa’aleaoga loa o le maliliega au fa’atasi a Smith ma le malo, ae tu’u atu loa lenei mataupu e fa’amasinoina i luma o se vaega iloilo iuga.

 

I le fa’aiuga o felafolafoaiga a loia ma le fa’amasinoga, na tuuina mai ai loa e Kruse le fa’aiuga e teena ai le talosaga a Smith ina ia fa’aleaoga le faaiuga a le fa’amasinoga ua mae’a ona tuuina atu ia te ia.

 

O le taimi nei, o loo taofia pea Smith i le toese i Tafuna mo le tuliina o lana fa’asalaga fa’a falepuipui e 15 tausaga.