Ads by Google Ads by Google

Teena Fa’amasinoga le talosaga e solofua le tagi fa’asaga ia Alo


[ata: foa'i]
ausage@samoanews.com

I le aso lona lua o le fa’amasinoga autu a le ali’i sa avea ma faiaoga lea sa fa’agasolo i luma o le vaega iloilo iuga e to’a 6 i le vaiaso nei, na fa’ai’u ai taualumaga a le fa’amasinoga i le teena lea e le afioga i le Fa’amasino Sili ia Michael Kruse le talosaga a le itu tete’e, ina ia fa’aleaoga le tagi a le malo fa’asaga ia Iosefa Alo.

 

Na taofia pea lava i le toese i Tafuna ia Alo talu mai le aso na pu’e fa’apagota ai o ia e Leoleo i le masina o Oketopa o le tausaga na te’a nei, ina ua le mafai ona ia totogi le tupe e $20,000 sa fa’atulaga e tatala ai o ia i tua.

 

Na tu’uaia e le malo ia Alo i le moliaga mamafa e tasi, o lona tufatufa fa’asolitulafono atu i isi tagata o vaega o le pauta fa’asaina o le aisa.

 

O le ali’i loia fautua lagolago ia Rob McNeill na tula’i mo Alo, ae o tama’ita’i loia sili lagolago e to’alua ia Christy Dunn ma Laura Garvey na tula’i mo le itu a le malo.

 

I le aso lona 2 o le fa’amasinoga autu a Alo, na valaau ai e le malo a latou molimau uma sa fa’atulaga mo lenei mataupu. O nisi o i latou ia e aofia ai le ali’i aoga lea na tu’uaia sa ave i ai e Alo le paipa tioata lea na maua i ai i totonu vaega o le pauta o le aisa, o Leoleo Suesue a le malo, faapea ai ma le Leoleopo a le aoga maualuga a Tafuna lea sa ia mauaina le paipa tioata i totonu o le ato a le tamaititi aoga.

 

O le tamaititi aoga na a’afia i lenei mataupu, o loo fa’aigoaina o ia i totonu o le tagi a le malo o C.K.

 

I le molimau tauto a C.K i luma o le vaega iloilo iuga, sa ia ta’utino ai e fa’apea, i le aso 6 o Oketopa 2017, na alu ai ma se paipa tioata o loo i ai vaega o le aisa i totonu i le aoga maualuga i Tafuna. O le aso lava fo’i lena sa ia ulaina ai le aisa sa i totonu o le paipa lea ma se tasi o ana uo i totonu o le aoga.

 

Na fesili le loia a le malo ia C.K poo ai na tuuina atu ia te ia le paipa, ae na tali C.K, “O Alo na tuuina mai ia te a’u le paipa tioata o loo i ai le aisa i totonu”.

 

Ina ua fesili le loia a le malo ia C.K poo ia vaai ia Alo i totonu o le potu fa’amasino, na tali le molimau, ioe. Sa fa’asino e le molimau lona lima ia Alo, ao alala mai o ia i tafatafa o lana loia fautua. Na vaaia le soisoi o le susuga a Alo i le taimi na tusi atu ai le aao o C.K ia te ia.

 

O le mae’a ai o le vaega lea o le molimau a C.K, na fa’atonuina ai loa o ia e le loia a le malo ia Garvey ina ia fa’amatala i le vaega iloilo iuga le mea sa tula’i mai i le aso 6 o Oketopa o le tausaga na te’a nei ao i ai i le aoga maualuga i Tafuna.

 

Na taua e C.K i le vaega ilioilo iuga e fa’apea, i le aso e pei ona taua, sa la nofonofo ai ma lana uo i lalo o se laau i totonu o le lotoa a le aoga, ae fa’afuase’i loa ona alu atu le Leoleopo ma maua atu laua o loo ula le la sikaleti. Na fa’atonu e le Leoleopo i laua latou te o i le Ofisa o le aoga.

 

Ina ua latou taunu’u i le Ofisa, sa su’e e le Leoleopo lana ato aoga ma sa maua ai e le Leoleopo se paipa tioata o loo i ai totonu vaega o le pauta o le aisa, o loo afifi i se mitiafu lanu mumu.

 

O le taimi lava na maua ai le paipa i totonu o lana ato, na vili ai loa ma Leoleo. Na aga’i atu Leoleo ma ave i laua ma lana uo i le Ofisa o Leoleo i Tafuna ma fesiligia ai i le paipa sa maua i lana ato.

 

O le mae’a ai ona fesiligia e Leoleo o i laua ma lana uo, na loka ai loa o ia i le falepuipui o Tamaiti i Tafuna. Mulimuli ane sa toe tatala o ia i tua. Na tua atili e C.K i le vaega iloilo iuga e fa’apea, o le paipa tioata sa ia te ia, na avatu e Alo ia te ia ao la eva ma Alo i lona fale i Lauli’i.

 

Ina ua fesiligia e le loia a Alo ia C.K, sa fa’amatala ai e le molimau se isi fo’i vaega o lana molimau na te le’i fa’amatalagaina i le vaega iloilo iuga. Ao lei faia le molimau a C.K, na fesili McNeill ia te ia pe na te iloa ia Alo, na tali C.K, “Ioe, ma te o mai fa’atasi i le nu’u o Lauli’i, o ia fo’i o le uo mamae a lo’u uso matua.”

 

“E te silafia poo Alo o se tagata e fa’amaoni,” o le fesili lea a McNeill. Na tali C.K, “Ou te le iloa lena mea”.

 

Na taua e C.K i lana molimau e fa’apea, i le aso e pei ona taua e le malo i le latou tagi, sa la eva ai ma lana uo o J.M i totonu o le lotoa a le aoga. Sa fa’atau e lana uo o J.M sikaleti mariuana i isi fo’i tamaiti aoga. I le aso lea, sa fa’atau atu ai e J.M ia te ia se sikaleti mariuana se tasi, ona ia tago lea ua tu’u le paipa tioata o loo i ai le aisa sa avatu e Alo ia te ia ia J.M e fai ai sana miti se tasi.

 

Na fesili McNeill ia C.K pe na ta’u atu e Leoleo ia te ia le igoa o Alo i le taimi na fesiligia ai o ia, na tali C.K, “E leai, o a’u na fa’ailoaina i Leoleo le igoa o Alo”.

 

Na taua fo’i e C.K i luga o le nofoa molimau lona fefe ma le le mautonu i le aso na fesiligia ai o ia e Leoleo, ona o se taimi muamua lea ua fesiligia ai o ia e ni Leoleo.

 

“O ai na avatua ia te oe le paipa tioata,” o le fesili lea a McNeill. Na tali C.K, “O Alo na aumaia ia te a’u le paipa”.

 

“Sa i ai se tagata na vaai ao tu’u atu e Alo le paipa ia te oe,” o le isi lea fesili a McNeill. Na tali C.K, “E leai”.

 

O nisi molimau na valaau e le malo e aofia ai le tama’ita’i Leoleo ia Off. Jennings, o ia lea o loo vaaia le potu o loo teu ai mau fa’amaonia a le malo i le Ofisa o Leoleo i Fagatogo. Na fa’amaonia e Off. Jennings i le vaega iloilo iuga e fa’apea, o le paipa tioata lea na maua ia C.K, o le paipa lava lea na ave i le setete o Kalefonia mo suega faapitoa, ma faamaonia ai, o le pauta pa’epa’e sa i totonu o le paipa lea, o vaega ia o le pauta o le aisa.

 

E leai ni molimau a le itu tete’e na valaau i le taimi o le iloiloga, se’i vagana ai le itu a le malo na valaau a latou molimau.

 

I le mae’a ai o molimau a le malo, na finau ai loa McNeill i le fa’amasinoga ina ia solofua le tagi fa’asaga ia Alo, ina ua le mafai e le malo ona tuuina atu ni a latou mau e fa’amaonia ai le latou tagi fa’asaga ia Alo.

 

Na teena e Kruse le talosaga a le itu tete’e. Saunoa Kruse e fa’apea, e sili pe a taoto pea i le vaega iloilo iuga le tulaga lea, o le latou tiute lea na mafua ai ona filifilia i latou.