Ads by Google Ads by Google

Teena e le Fa’amasinoga le talosaga a Thomas Siaumau


[ata: foa'i]
ausage@samoanews.com

Ua teena e le afioga i le ali’i Fa’amasino Sili lagolago ia Fiti Sunia ni talosaga se lua na fa’aulu e le ali’i o Thomas Siaumau, tauala atu i lana loia fautua, mo se fa’atanaga mai le fa’amasinoga e mafai ai ona latou talanoa ma fesiligia sui o le vaega iloilo iuga, atoa ai ma se fa’atanaga e toe tolopo ai i tua le taimi e faila ai sana talosaga mo sona fa’amasinoga fou.

 

O Siaumau, lea o lo o taofia pea i le toese i Tafuna e aunoa ma se tupe e tatala ai i tua, na ta’usala e le vaega iloilo iuga i le vaiaso na te’a nei i moliaga eseese e 7. O ia moliaga na afua mai i le fa’alavelave lea na tula’i mai i le po o le aso 14 o Tesema 2017, ina ua ia tafana se ta’avale Leoleo a o i ai se tama’ita’i Leoleo i totonu.

 

O le vaiaso nei na toe fa’a kalena ai e le fa’amasinoga le mataupu a Siaumau, mo le finauina o ana talosaga i luma o ali’i fa’amasino.

 

O le ali’i loia fautua ia Richard deSaulles ma lona soa ia Daniel Holladay mai le Ofisa Loia a le RDA Law Firm na tula’i mo Siaumau, ae o le tama’ita’i loia sili lagolago ia Christy Dunn na tula’i mo le malo.

 

Ina ua valaau le mataupu a Siaumau, na toe fa’amanatu ai loa e deSaulles i le fa’amasinoga lana poloaiga sa tuuina mai i le aso Faraile o le vaiaso na te’a nei, e faasa ai soo se tasi o itu e lua ona toe talanoa pe fesiligia sui o le vaega iloilo iuga.

 

Na faailoa e deSaulles i le fa’amasinoga e fa’apea, talu ai le poloaiga a le fa’amasinoga e fa’asa ai le latou itu ona toe talanoa i sui o le vaega iloilo iuga, ua ia talosagaina le fa’amasinoga mo se fa’atanaga e mafai ai ona latou talanoa ma fesiligia sui e to’alua o le vaega iloilo iuga, lea ua malilie latou te talanoa e fa’atatau i lenei mataupu.

 

Na taua e deSaulles e fa’apea, a o le i tuuina mai le poloaiga a le fa’amasinoga e faasa ai se tasi ona toe talanoa i sui o le vaega iloilo iuga, o le aoauli o le aso Faraile o le vaiaso na te’a nei na fa’atulaga latou te talanoa ai ma sui e to’alua o le vaega iloilo iuga.

 

O mataupu na taua e deSaulles i le fa’amasinoga o lo o fuafua e aofia i lea fa’atalatalanoaga, o le fesiligia lea o le tulaga i le latou fa’aiuga ua mae’a ona tu’uina mai e pei ona ta’usala ai Siaumau, ae pe sa i ai fo’i se taimi na feso’ota’i atu ai se sui o le malo ia te i latou a o fa’agasolo ai taualumaga o lenei fa’amasinoga.

 

Na faamanino e deSaulles i le fa’amasinoga e fa’apea, e leai se manatu e saili ni auala e fa’aleaoga ai le faaiuga ua mae’a ona tuuina mai, pau le agaga ia manino lelei sa fa’atino le galuega a le vaega iloilo iuga i le auala tonu ma le sa’o, e aunoa ma le fa’alavelave atu i ai o se sui mai le malo, e aofia ai loia ma leoleo.

 

Sa ia toe taua fo’i i lana folasaga le mataupu e fa’atatau i le to’atele o leoleo na auai atu i le aso mulimuli o le fa’amasinoga, faapea ai ma se fa’asilasilaga sa fa’asalalau e le loia a le malo ia Dunn i luga o le Facebook, e talosagaina ai se vaega to’atele o leoleo ina ia auai atu i le aso mulimuli o le fa’amasinoga, ina ia fa’ailoa atu ai i le vaega iloilo iuga lo latou lagolagoina o le tagi a le malo fa’asaga ia Siaumau.

 

O nei tulaga uma e pei o le talosagaina e Dunn i luga o le Facebook, e ono avea ia tulaga ma mafua’aga talafeagai e tatau ai ona toe fai se fa’amasinoga fou i lenei mataupu.

 

I le mataupu o le fesiligiaina lea o sui o le vaega iloilo iuga, na fa’ailoa e deSaulles e fa’apea, latou te matua fa’aaloalogia aia tatau o sui o le vaega iloilo iuga, e pei fo’i ona latou fa’aaloalogia aia tatau o molimau a le malo i le taimi na latou taulimaina ai o latou suafa mai le malo.

 

E le gata sa latou fesiligia fa’alelei molimau a le malo, ae sa latou fa’atinoina fo’i lea tulaga i se auala e le atagia mai ai se taumafaiga ina ia fa’amalosi pe fa’afefe se tasi.

 

“O le auala sa matou fesiligia ai molimau a le malo, o le auala fo’i lava fo’i lea e tasi o le a matou fesiligia ai sui o le vaega iloilo iuga, pe afai e tuuina mai se poloaiga a le fa’amasinoga e fa’ataga ai ona matou fa’atinoina lea tulaga,” o le saunoaga lea a deSaulles.

 

Sa ia fa’ailoa i le fa’amasinoga le Tulafono 29 o loo fa’amanino mai ai le agava’a lea o Siaumau mo le failaina o sana talosaga i le fa’amasinoga mo le fa’atulagaina o sana fa’amasinoga fou, aemaise ai le Tulafono 45, o loo taua mai ai le mafai lea e itu e lua ona fesiligia ma suesue i latou uma e tuuina atu i ai e le fa’amasinoga le poloaiga e auai atu ai i le faamasinoga.

 

Na matua tete’e malosi le loia a le malo i le talosaga a le itu tete’e, ma talosagaina ai loa e Dunn le fa’amasinoga ina ia teena talosaga a Siaumau ma lana itu.

 

Na taua e Dunn e fa’apea, e le fa’atagaina i lalo o le Tulafono 43 le tuuina atu o se avanoa e faaopoopo ai se taimi e mafai ai e le itu tete’e ona faila sa latou falosaga i le fa’amasinoga mo se fa’amasinoga fou.

 

I le tulaga o leoleo sa auai i le potu fa’amasino i le aso mulimuli o le fa’amasinoga, atoa ai ma le fa’aaliga sa tuuina atu i luga o le Facebook, sa teena e Dunn lona a’afia ai i le fa’asilasilaga sa i luga o le Facebook. Sa ia fa’ailoa i le fa’amasinoga e fa’apea, na te le i fa’atonuina leoleo ina ia auai atu uma i le aso mulimuli o le fa’amasinoga.

 

Na toe faamanatu e Dunn i le fa’amasinoga le molimau a le ali’i Masela ia Michael Nix, lea sa ia taua ai le mumusu o sui o le vaega iloilo iuga e talanoa ia Siaumau ma ana loia.

 

Na toe tali deSaulles ma fa’apea atu i le fa’amasinoga, afai o lo o tete’e Dunn na te le i faia le fa’asilasilaga i luga o le Facebook, e le tatau la ona ia finau i le fa’amasinoga ina ia taofia i latou mai lo latou talanoa atu i sui o le vaega iloilo iuga.

 

Saunoa le afioga i le alii Fa’amasino ia Sunia e fa’apea, e atagia mai i le talosaga a deSaulles, e foliga mai o loo ia naunau e faia sana suesuega e fa’atatau i le faaiuga a le vaega iloilo iuga ua mae’a ona tu’uina ai. Sa ia taua atili e fa’apea, afai e i ai se suesuega e tatau ona faia i lenei mataupu, o le suesuega lea e faatautaia e le fa’amasinoga, e aunoa ma le aofia ai o ni isi lava tagata.

 

Na toe faamanatu e Sunia ia deSaulles le tumau pea o le tete’e o Dunn i le i ai lea o sona aafiaga i le fa’asilasilaga sa tuuina atu i luga o le Facebook.

 

I lona talitonuga, e tumau pea le poloaiga a le fa’amasinoga ua mae’a ona tuuina atu, e fa’asa ai se tasi ona toe talanoa i sui o le vaega iloilo iuga. Ona o lea tulaga, na teena ai loa e Sunia talosaga na fa’aulu e Siaumau ma ana loia.