Ads by Google Ads by Google

Ta’utino molimau malo na vaai ia Siaumau o ia fana le ta’avale leoleo


[ata: SN]
ausage@samoanews.com

Na taua e se tasi o molimau a le malo i luma o le vaega iloilo iuga i le aso lona 5 ao fa’agasolo le fa’amasinoga autu i le va o le malo ma Thomas Siaumau, sa ia vaai ia Siaumau ma lona nephew o la ta fana le ta’avale leoleo i le po o le aso 14 o Tesema, 2017 i tua o le malae Baseball i Tafuna.

 

“Sa ou vaai ia Thomas o ta’i lana fanau i le ta’avale leoleo ma ia tafana fa’alua le ta’avale. Sa ou vaai fo’i i lona nephew o T.L o ta’i fo’i lana fana i le ta’avale leoleo, ma ia tafanaina fo’i le ta’avale leoleo.”

 

O se vaega lea o le fa’amatalaga a le molimau fa’atuatuaina a le malo, lea ua fa’amoemoe le malo o lana molimau o le a mafai ai ona ta’usala Siaumau i le mataupu o lo o tu’uaia ai o ia, ona o le fa’alavelave na tafana ai se ta’avale leoleo a o i ai le leoleo i totonu.

 

O tama’ita’i loia sili lagolago e to’alua ia Christy Dunn ma Laura Garvey o loo fai ma sui o le malo i lenei mataupu, ae o ali’i loia mai le Ofisa Loia a le RDA Law Firm ia Richard deSaulles ma Daniel Holladay o loo tula’i mo Siaumau.

 

E to’a 6 isi molimau na valaau e le malo i le aso lona 5 talu ona fa’agasolo le fa’amasinoga autu a Siaumau. O ia molimau e aofia ai ni tagata faigaluega se to’alua a le malo, to’alua fanau e laiti i lalo o le tulafono, o se leoleo, faapea ai ma le molimau autu lea e fai mai le malo sa vaai tino lava i le taimi na tula’i mai ai le fa’alavelave.

 

E to’atele leoleo na fesoasoani i le momoliina atu o le molimau autu a le malo i le fa’amasinoga, ona o le puipuiga o lona saogalemu. Ina ua mae’a ona fesiligia e loia le molimau, sa toe momoli fo’i o ia e leoleo i le nofoaga faapitoa lea o loo tausia ai o ia i lalo o le vaavaaiga a le malo i le taimi nei.

 

O le molimau autu a le malo, o ia lea o J. M, e 23 tausaga lona matua, sa nofo muamua fo’i i le aiga o Siaumau e pei ona ia taua i lana fa’amatalaga.

 

Na faailoa e le molimau i le vaega iloilo iuga e fa’apea, o le taimi lava na mae’a ai ona tuuina atu lana fa’amatalaga i leoleo e tusa ai o lenei fa’alavelave, na taofia ai loa o ia i lalo o le vaavaaiga a leoleo mo lona saogalemu, ina ia aua ai ne’i toe i ai se avanoa e maua ai se fesootaiga i le va o ia ma le ua molia, poo nisi fo’i e taumafai e fa’alavelave i lana molimau.

 

Na fesili le loia a le malo ia J.M e fa’asino lona lima poo fea o totonu o le potu faamasino o loo nofo mai ai Siaumau. Na faliu J.M ma tusi lona lima i le itu o le potu faamasino o loo nofo ai Siaumau, i tafatafa o lana loia.

 

I le po na tula’i mai ai le fa’alavelave, sa i ai J.M i lona fale i Petesa. I se taimi o le itula e 8:30 i le po lava lea, na taua ai loa e J.M lona aga’i atu i le nofoaga o loo eva ai ana uo i tua o le fanua o le aiga o Siaumau ma le fa’amoemoe latou te tafafao ai. O le fanua lea, e sosoo ma le pa o loo tuaoi ma le malae Baseball i Tafuna.

 

“Ina ua ou taunu’u i le vaega o loo i ai a’u uo, sa ou vaai ai ia Thomas, o lona nephew ia T.L faatasi ai ma isi o a’u uo ua leva ona i ai i le nofoaga lea, ma amata ai loa ma le matou tafaoga i lea po. Sa matou inu uma i le pusa pia o le Busch Ice na fa’atau atu e Thomas,” o le fa’amatalaga lea a le molimau.

 

“E lei umi ona alu le inuga, ae tula’i loa Thomas ma lona nephew o T.L ma aga’i ese atu ma le nofoaga o loo matou eva ai, ma ou vaaia ai ua la savavali aga’i atu i le itu o loo i ai le malae Baseball.”

 

“E lei umi ona te’a ese atu Thomas ma T.L ae matou faalogoina loa le papa mai o fana. Sa ou tu i luga ma ou savali e vaai poo ai lea sa ia faapapa mai fana, ina ua ou oo atu i tua o le pa o loo tuaoi ai le fanua o Siaumau ma le malae Baseball, sa ou iloa atu Thomas ma T.L o loo la faapapa fana ma feei i luga.”

 

“Sa e vaai o uu e Thomas ma T.L ni fana,” o le fesili lea a le loia a le malo. Na tali le molimau, “Ioe, e umi le fana na uu e Thomas ae puupuu le fana na uu e T.L”.

 

E lei umi se taimi talu ona tuana’i le faapapa o fana, ae vaaia loa e J.M le aga’i atu o se ta’avale a leoleo. Sa malosi le susulu o moli o le ta’avale a leoleo ona o le taumafai e saili poo ai sa ia fa’apapaina fana.

 

“Ina ua liliu le ta’avale leoleo o le a toe fo’i, o le taimi lea na ou vaaia ai loa Thomas ua ta’i lana fana i le ta’avale leoleo. Sa ou vaaia fo’i T.L ua ta’i fo’i lana fana i le ta’avale leoleo. Sa ou vaaia ua tafana e Thomas ma T.L le ta’avale leoleo ao aga’i malie ese atu le ta’avale mai le nofoaga sa matou i ai,” o le fa’amatalaga lea J.M.

 

Ina ua maua le avanoa o le loia a le itu tete’e e fesiligia ai le molimau, na fesiligia ai loa e deSaulles ia J.M, pe aisea ua taofia ai o ia i lalo o le vaaiga a leoleo. Na tali le molimau, o taumafaiga lava ina ia malu puipuia lona saogalemu, atoa ai ma le puipuia o lana fa’amatalaga mai le toe faalavelave ai o se isi tagata.

 

“O le a la le auala o loo tausia ai oe e leoleo i le taimi nei?” o le fesil lea a deSaulles. Na tali le molimau, “O loo latou fafaga ma tausi fa’alelei ia te a’u.”

 

“Na e fai i leoleo e fafaga ma tausi faalelei oe?” o le fesili lea a deSaulles. Na tali le molimau, “E leai, o latou lava na latou ave a’u ma tausi i lalo o le latou vaavaaiga ma fafaga a’u.”

 

“Na e vaai tino lava ia T.L o ia uuina se fana?” o le isi lea fesili a deSaulles ia J.M. Na tali le molimau, “O lea lava.”

 

Na toe fesili deSaulles i le molimau pe sa i ai se taimi na ia faailoa ai i leoleo ua ia le fia molimau i lenei mataupu. Na tali le molimau, e na o le taimi lava na ia vaai ai i lona stepmother, o lea na ia fai ai loa i leoleo e le fia molimau, ona sa popole lava lona stepmother ia te ia atoa ai ma lona saogalemu.

 

Na toe fesili deSaulles i le molimau, pe na te manatuaina se taimi na moe ai i luga o le paepae maa i le po na faia ai le latou inuga, na tali le molimau, e leai.

 

O isi molimau na valaau e le malo e aofia ai le Fa’atonusili o le Ofisa o Paka, susuga Kenneth Tupua, lea na ia faamaonia i le vaega iloilo iuga, e 7 moli sa faaleagaina i le po na tula’i mai ai le fa’alavelave, ma e tusa ma le $12,800 le tupe a le malo na fa’aalu e toe fa’aleleia ai moli.

 

O le isi molimau o le inisinia a le Ofisa o Leoleo, susuga Epensea Iakopo, lea na ia faamaonia i le vaega iloilo iuga, e silia i le $1,000 le tau na toe fa’afou ai tioata e lua na faaleagaina o le ta’avale leoleo lea na afaina i le faalavelave.

 

O isi molimau e to’alua na valaauina a le malo, o ni ali’i talavou e ta’i 14 tausaga le matutua. O i laua ia sa ta’i 12 tausaga le matutua i le po na tula’i mai ai le fa’alavelave. Na taua e molimau ia e to’alua e faapea, sa la fa’alogo i le papa o fanau i tua o le malae Baseball, peita’i la te lei iloa poo ai na faia lea gaioiga, ona sa pogisa le nofoaga.