Ua sauni atu nei le alo o Amerika Samoa ia Falaniko Tasi Tauta, e tausinio i le ta’amilosaga o le Youth Olympic Games, lea e faia i Argentina i le masina o Oketopa o le tausaga nei, i le ta’aloga o fusuaga.

O le tausaga na te’a nei na fa’amautuina ai lea avanoa maualuga mo Tauta, ina ua mataina lana taalo i se ta’amilosaga sa faia i Ausetalia i le masina o Aperila, e filifilia ai tupulaga talavou mai atunu’u eseese o le Pasefika e maua avanoa e tausinio ai i ta’aloga o le Olimipeka a Tupulaga Talavou mo lenei tausaga.

Ae o le ta’amilosaga a le Oceania Boxing Championship lea na talimalo ai Samoa i le 2 vaiaso talu ai, na toe fa’amautuina ai le avanoa o Tauta, ina ua mataina lana taumafaiga i le ta’amilosaga atoa, e ui sa manumalo i le pine apamemea.

O le ta’amilosaga a le Oceania lea na talimalo ai Samoa, na fa’aaoga e le Faalapotopotoga o Fusuaga a le lalolagi (AIBA) lea ta’amilosaga, e fai ma ta’amilosaga e fili mai ai tagata e ulufale atu i le Olimipeka.

Na malaga Tauta ma lana faiaoga, susuga Okesene Malala, o ia fo’i lea o le sui peresetene o le ASABA mo le fa’amoemoe i Samoa. E le gata la ua saga fa’amautuina ai le avanoa o Tauta i le Olimipeka, ae na siisii ai i luga le tomai o Malala i aoga fa’a faiaoga ma laufali, ina ua ia ausia le tusi pasi o le “Two-Star Coaching Certificate” mai le AIBA.

O se tala fiafia lea na mafai ona fa’asoa mai e le susuga Malala e fai ai ma sui o le ASABA, i se feiloaiga ma le Samoa News i le vaiaso na te’a nei, e tusa ai o le tulaga ua mafai ona ausia e lenei alo talavou o le atunu’u.

“O se tala fiafia lenei mo le atunu’u, o lea ua maua le avanoa o Tauta e tausinio ai i le Olimipeka mo Tupulaga Talavou. O se fa’aeaea maualuga ua mafai ona ausia e lenei alo talavou o le atunu’u, e ala i le tuuina atu o le mea sili na te mafaia e atina’e atili ai lana taleni,” o se saunoaga lea a Malala.

“O le auala e aga’i atu i le Olimipeta e le faigofie, e tatau i le tagata taalo ona matua fa’amaoni i le fa’atinoina o le ta’aloga, e aofia ai le auai i koleniga ma ta’amilosaga eseese fa’avaomalo, ina ia mafai ai ona maua sona avanoa e tausinio ai i le tumutumuga o ta’amilosaga i le lalolagi, o le ta’aloga lea o le Olimipeka.”

O le ta’amilosaga e pei ona faia i Samoa, sa aofia ai tama fusu iloga e i lalo o le 18 tausaga le matutua mai atunu’u tetele o le Pasefika, lea e aofia ai Ausetalia, Niu Sila, Fiti ma Samoa i le ta’aloga o fusuaga.

E le i manuia taumafaiga a Tauta mo se pine auro i lea ta’amilosaga, ae na maua lona avanoa e manumalo ai i le pine apamemea. Ae ui i lona mauaina o le apamemea, na taua e Malala le tulaga ese ma le maualuga sa i ai le taumafaiga a Tauta.

O le fa’aiuga la o le ta’amilosaga sa faia i Samoa, na toe iloilo ai loa e le Komiti o Fusuaga a le lalolagi, le AIBA le tulaga sa i ai taumafaiga a tama fusu uma sa auai i le ta’amilosaga, ma faia ai loa le filifiliga ina ia tumau pea le avanoa e tausinio ai Tauta i le Olimipeka o le tausaga nei.

Na amata mai le taleni fusu a Tauta ao aoga o ia i Aoga Tulaga Muamua ina ua fa’atoa 12 ona tausaga, fa’atasi ai ma le lagolago malosi a lona aiga, seia oo lava ina filifilia o ia e fai ma sui o Amerika Samoa i fusuaga fa’avamalo.

I le masina o Tesema 2016, na aofia ai Tauta i le aumalaga e to’a 10 tama fusu mai Amerika Samoa, sa tausinio i le ta’amilosaga o le Samoa Games Boxing International Championship i Samoa, ma ia manumalo ai i lana ulua’i pine auro mai le aupaga o le middleweights.

Na sosoo lea ma lona auai i le ta’amilosaga o le Oceania Boxing Championship sa faia i Samoa i le masina o Fepuari 2017, lea fo’i na ia toe manumalo ai i le isi pine auro, ina ua ia fa’ato’ilaloina le siamupini mai Ausetalia i le au paga lava o le middleweight. O le ta’amilosaga la lea na maua ai loa le faitoto’a e ulufale atu ai Tauta i le ta’amilosaga tele sa faia i Ausetalia i le masina o Aperila o le tausaga lava na te’a nei, e sailia ai ni ali’i talavou e sao atu i le Olimipeka o le tausaga nei.

I le ta’amilosaga i Ausetalia sa faia ia Aperila o le tausaga na te’a nei, na mataina ai le taumafaiga a Tauta, ma filifilia ai loa o ia e tausinio i le Olimipeka.

O se tusi sa tuuina mai e le Fa’atonu Aoao o le AIBA i le Perestene o le ASABA, afioga Paepaetele M. Jamais, o lo o fa’amaonia ai le filifilia pea o Tauta e fai ma sui o Amerika Samoa i ta’aloga a le Olimipeka ia Oketopa o le tausaga nei, faapea ai ma le ta’amilosaga o le World Youth Boxing Championship, lea e faia i Budapest, Hungary ia Aokuso 19 e oo atu ia Setema 01, 2018.

I se talanoaga ma le afioga a Paepaetele, sa ia taua ai i le Samoa News lona fiafia tele ina ua ausia e Tauta lenei matati’a mo Amerika Samoa, e tausinio ai i tumutumuga o ta’aloga a le lalolagi, le Olimipeka, atoa ai ma le susuga a Malala, lea ua maua lona tusi pasi lona lua i tulaga fa’a faiaoga ma laufali i fusuaga.

Na taua e Paepaetele le galulue pea o le ASABA e atina’e le ta’aloga o fusuaga i le atunu’u, ina ia mautinoa e to’atele tupulaga talavou e fa’aaoga tatau a latou taleni i le lumana’i.