Ads by Google Ads by Google

Ta’usala Fiu John Saelua i le moliaga o le fa’aoolima i le tulaga tolu


[ata: foa'i]
ausage@samoanews.com

Ua ta’usalaina nei e le Fa’amasinoga Fa’aitumalo ia Fiu John Saelua i le moliaga o le faaoolima i le tulaga tolu, i le mae’a ai lea ona talia e le afioga i le ali’i Fa’amasino ia Fiti Sunia o le tali, e le tete’e a le ua molia i le moliaga e pei ona tu’uaia ai o ia e le malo.

 

O le aso 7 o Tesema lea ua fa’atulaga e lau ai le fa’asalaga a le Fa’amasinoga mo Fiu. O loo tumau pea tuutuuga o loo tatala ai o ia i tua e fa’atali ai le aso e lau ai lona fa’asalaga.

 

O le susuga i le ali’i loia ia Marcellus T. Uiagalelei o loo tula’i mo Fiu, ae o le ali’i loia tua ia David Vargas o loo tula’i mo le malo, i le mae’a ai lea ona tofia o ia e le Fa’amasinoga e avea ma Loia Tuto’atasi na te su’esu’eina le mataupu a Fiu.

 

Ina ua valaau le mataupu a Fiu i le aso Lulu o le vaiaso nei, na fa’ailoa ai e Vargas i le faamasinoga le mae’a lea ona ia faia o se maliliega i le va o le malo ma Fiu, ma ua sauni fo’i le ua molia e tu’uina atu lana tali e tusa ai o le tagi fa’asaga ia te ia.

 

Na saunoa Sunia e fa’apea, e le mafai ona fa’aauau le mataupu pe afai e le maua se avanoa o le fa’amasinoga e faitau ai i tuutuuga o le maliliega. O lea na ia poloaina ai loa Vargas e faila le kopi o le maliliega i luma o le fa’amasinoga, fa’atasi ai ma fa’amatalaga fou lea ua faila e le malo fa’asaga ia Fiu.

 

I le mae’a ai o se malologa puupuu, na toe valaau ai loa le mataupu a Fiu. Sa faailoa foi e Sunia i loia a itu uma e lua lona tauaaoina o le kopi o le maliliega sa faila e le malo.

 

Na faailoa fo’i e Uiagalelei i le fa’amasinoga, le mae’a lea ona la mauaina ma Fiu o le kopi o le maliliega atoa ai ma faamaumauga o fa’amatalaga fou ua faila e le malo fa’asaga i le ua molia, ma ua sauni fo’i Fiu e tu’uina atu lana tali e tusa ai o le tagi fa’asaga ia te ia.

 

Ina ua fesili Sunia ia Fiu, poo le a lana tali i le moliaga o le fa’aoolima i le tulaga tolu, na tali le ua molia ma leotele, “Ou te le tete’e i ai lau afioga.”

 

“E te ta’utino mai sa e tago atu i le tino o se isi tagata i se auala na lagona ai e lea tagata lau gaioiga, o se gaioiga e le fiafia i ai,” o le fesili lea a Sunia. Na tali Fiu, “O lea lava”.

 

Na talia e Sunia le tali e le tete’e a Fiu e tusa ai o le moliaga fa’asaga ia. O le aso 7 o Tesema lea ua faatulaga e lau ai lana fa’asalaga, ma ua talosagaina fo’i e le Fa’amasinoga se ripoti mai le Ofisa Faanofovaavaaia e tusa ai o lenei mataupu.

 

O le tagi fa’asaga ia Fiu na alia’e mai i le 2016, ina ua faila e se tama’ita’i sa nofo ai i lona aiga se tagi fa’asaga ia te ia, ona o amioga le tatau ma le le taupulea sa tu’uaia e lea tama’ita’i sa faia e Fiu ia te ia i le taimi o le latou mafutaga.

 

Na taua e le tama’ita’i lea e fa’apea, o le alia’e ai o le tu’uaiga fa’asaga ia Fiu, na fa’afuase’i ai ona taumafai ni ali’i Ofisa o Femalagaaiga e tipoti fa’amalosi i laua ma lona to’alua i Samoa e aunoa ma se solitulafono.

 

Ae na mafai ona taofia lenei gaioiga ina ua vaaia e se alii faigaluega mai le Ofisa o Femalagaaiga le tama’ita’i ma lona to’alua i luga o le va’a o le Lady Naomi i le aso lea, ma ia taofia ai loa le taumafaiga e fa’afo’i fa’amalosi i laua.

 

E tele tausaga o taulimaina e le Ofisa o Leoleo lenei mataupu peita’i e leai ma se taunuuga na alia’e mai ai. O le mafua’aga lea na tofia ai loa e le Fa’amasinoga Maualuga le ali’i loia ia Vargas e avea ma Loia Tuto’atasi na te suesueina i lenei mataupu.

 

Na faamaonia mai fo’i e le Loia Sili ia Talauega Eleasalo Ale i le Samoa News i le tausaga na te’a nei, o Vargas lea ua tofia e le fa’amasinoga na te suesueina le mataupu a Fiu, atoa ai ma le mataupu fa’asaga i le Fofoga Fetalai ia Savali Talavou Ale. Sa ia faamaonia mai fo’i i le Samoa News le mae’a lea ona tauaao e lona Ofisa o ripoti a Leoleo e tusa ai o le mataupu a Fiu ma Savali.

 

Na maua le avanoa e fa’atalatalanoa ai e le Samoa News le tama’ita’i na a’afia i lenei mataupu, o ia lea o se Tina ua 33 ona tausaga i le taimi nei, ma ua to’a 2 fo’i ona alo.

 

Na taua e lea Tina e fa’apea, o le tausaga e 2014 na amata mai ai uiga le taupulea a Fiu ia te ia, e ala i lona lafo atu o upu e fa’ailoa atu ai lagona tu’inanau, seia oo lava i se taimi o le tausaga e 2016 ao pisi i faatosina o le palota ina ua tago atu Fiu i lona itutinosa i nofoaga lautele.

 

O lea gaioiga e pei ona taua e lea Tina na iloa atu e lona to’alua, ma fa’afuase’i ai loa ona fesili atu lona to’alua ia te ia, pe fai se la faanunumi ma Fiu. O iina na amata mai ai le vevesi i le va o ia ma lona to’alua, seia oo lava ina alia’e lenei mataupu.