Ads by Google Ads by Google

Tau saili se tama’ita’i na ave fa’amalosi ae fa’ai’u i le maua ai o aisa


[ata: SN]
ausage@samoanews.com

Na ese le fa’aiuga o le mataupu sa pisi ai se vaega to’atele o Leoleo i le amataga o le masina lenei, ina ua aga’i atu e tau saili le tama’ita’i e 21 tausaga le matua na ripotia le ave fa’amalosi e se tagata, ae fa’ai’u i le molia ai o ni ali’i se to’alua ina ua maua i ai e Leoleo vaega o le pauta fa’asaina o le aisa ia te i laua.

 

O le au ali’i e to’alua ua molia i lenei mataupu e aofia ai Soo Savelio ma Sharnel Sagote. O loo molia i laua i le moliaga mamafa o le umia fa’asolitulafono lea o vaega o le pauta fa’asaina o le aisa.

 

O le tama’ita’i loia fautua lagolago ia Anna Wells na tula’i mo i laua i le taimi o le la ulua’i iloiloga i le vaiaso na te’a nei, ae o le tama’ita’i loia sili lagolago ia Laura Garvey sa tula’i mo le itu a le malo.

 

Talu ai tulaga fa’aletonu o pepa nofomau o le ali’i o Savelio, ua faia ai e le afioga i le ali’i Fa’amasino ia Fiti Sunia le fa’aiuga ina ia taofia pea o ia i le toese i Tafuna e aunoa ma se tupe e tatala ai, se’i vagana ai Sagote lea ua fa’atulaga e le fa’amasinoga le $10,000 e tatala ai o ia i tua.

 

E tusa ai ma fa’amaumauga a le fa’amasinoga, na ulufale mai Savelio i le atunu’u i le masina o Novema o le tausaga na te’a nei i se pemita e 30 aso, ma nofo fa’asolitulafono ai lava e aunoa ma ni pepa nofomau, seia oo i le taimi na pu’e faapagota ai o ia e Leoleo ona o lenei mataupu.

 

O le aso Faraile na te’a nei na tutula’i ai Savelio ma Sagote i luma o le fa’amasinoga maualuga, ma la teena ai tu’uaiga fa’asaga ia te i laua. Ua toe taofia nei i laua i le toese e fa’atali ai le isi la iloiloga lea ua fa’atulaga mo le masina fou o Tesema.

 

TAGI A LE MALO

 

O le mataupu lenei na amata mai ina ua taunu’u i le Ofisa o Leoleo i Tafuna se ripoti e fa’atatau i se tama’ita’i e 21 tausaga le matua, na ave faamalosi e se alii fa’atasi ai ma se ta’avale rental i le aso 1 o Novema 2018.

 

Na taua e le fafine na ia ripotia lenei mataupu i Leoleo e fa’apea, o le tagata e igoa ia Tautua “Govana Fiti” Letasi mai le nofoaga e taua o Logotala, o ia lea na ia avea faamalosi lana ta’avale rental, ma avatu fa’atasi atu ai lava ma lona niece e 21 tausaga le matua.

 

O le maua ai e Leoleo o lenei ripoti, na logoina ai loa se vaega to’atele o Leoleo e aofia ai ma Leoleo Suesue mai le Vice & Narcotics Unit, e fesoasoani i le sailia o le tama’ita’i ua ripotia le ave fa’amalosi.

 

Na aga’i atu Leoleo i le nofoaga e taua o Logotala, lea fo’i e iloa i le isi igoa o le “LE FILIFILI” mo le tau sailia o le fale o le tagata lenei o Letasi. E taunu’u atu Leoleo i le auala e aga’i i luga i Logotala, o loo toso mai le filifili u’amea e poloka ai ta’avale mai le aga’i i luga i le mauga i Logotala, ae o loo nofonofo ai ni ali’i se to’alua i luga o se ogalaau o loo ta’atia i le isi itu e leoleo le filifili u’amea.

 

O ali’i e to’alua sa nofonofo e leoleo le filifili u’amea, o i laua ia ua molia i lenei mataupu.

 

Na fesili Leoleo i alii e to’alua pe la te iloa se tagata e igoa ia Letasi, ae na tali Sagote, e lei leva nei lava na aga’i atu i luga o le mauga i Logotala ia Letasi, o loo alu atu o ia i le ta’avale rental. A o faia talanoaga i le va o Leoleo ma i laua e to’alua ua molia, na vaaia e Leoleo le paepae solo i luga o le vaega o loo latou talanoa ai pepa iila laiti ia e masani ona fa’aaoga e utu ai i totonu le pauta o le aisa.

 

A o faia talanoaga i le va o Leoleo ma ali’i e to’alua ua molia, na vaaia e Leoleo le fai ma fetagofi i laua i totonu o taga o la ofu o loo faia. Na fesili se tasi o Leoleo i le au ali’i ia poo i ai ni mea i totonu o la taga, na tali i laua e leai.

 

Na fa’aauau le talanoaga ma ua tele fo’i fesili a Leoleo ua fesiligia ai alii nei e to’alua, peita’i, sa molimauina pea le fai ma fetagofi i laua i taga o a la ofu o loo faia, e foliga mai o loo i ai se mea o loo la taumafai e aveese. Sa vaaia fo’i e Leoleo le taumafai o i laua e togi ese se mea sa aveese mai i totonu o taga o la ofu.

 

Na toe fesili Leoleo i ali’i ua molia poo i ai ni mea i totonu o taga o a la ofu o loo faia, ae na tali fo’i i laua e leai. Ona o masalosaloga e mafua mai i gaioiga a i laua nei, na mafua ai loa ona talosaga Leoleo pe mafai ona saili o la tino, lea fo’i sa ioe i ai alii nei e to’alua.

 

Na saili e Leoleo tino o Savelio ma Sagote ma maua i ai pepa iila atoa ai ma paipa tioata o loo i ai vaega o le pauta fa’asaina o le aisa.

 

E 2 paipa tioata e fa’aaoga e ula ai le aisa na maua i le taga taumatau o le ofu a Savelio, ae o le taga agavale na maua i ai le isi paipa tioata o loo i ai vaega o le pauta o le aisa. O Sagote na maua i le taga taumatau o lona ofu le tinoitupe e $506 faapea ai ma se pepa iila o loo i ai vaega o le pauta o le aisa, ae o le taga agavale o lona ofu sa maua i ai le tele o pepa iila e fa’aaoga e utu ai le pauta o le aisa.

 

Na faia se suega i mau faamaonia na maua ia Savelio ma Sagote ma faamaonia ai, o le pauta pa’epa’e sa maua ia tei laua, o vaega ia o le fualaau fa’asaina o le aisa.

 

Na taua e Sagote i Leoleo e fa’apea, i le taeao po o le aso lea, na tu’u atu ai e Letasi pepa iila o loo i ai vaega o le pauta faasaina o le aisa ia te ia ma le fa’amoemoe na te tulei ma fa’atau atu i isi tagata. Na taua atili e Sagote lona fa’atauina atu o pepa iila o loo i ai le pauta o le aisa i le tau e $50 i le pepa iila e tasi.

 

Na ioe fo’i Savelio ia Leoleo, o le vaega o le pauta fa’asaina o le aisa sa maua ia te ia, o mea na avatu e Letasi ia te ia.

 

O le ali’i o Letasi na molia muamua e le malo i moliaga o le umia faasolitulafono o vaega o fualaau fa’asaina o le aisa ma le maruana ma le fa’amoemoe e tulei ma fa’atau atu i isi tagata.

 

O le masina o Setema na te’a nei na fa’ataunuu ai le fa’amasinoga autu a Letasi, peita’i na fa’aleaoga e le Fa’amasinoga Maualuga lea fa’amasinoga autu, ina ua le mafai e le vaega iloilo iuga ona autasi i se fa’aiuga se tasi.

 

O le masina fou o Tesema lea ua fa’atulaga e toe faia ai le fa’amasinoga autu a Letasi i luma o le Fa’amasinoga Maualuga.