O lo o taofia i le potu tigaina (ICU) a le falema’i o le LBJ i Faga’alu se alii pagota, ona o manu’a tuga o loo aafia ai lona ulu, e mafua mai i le fa’alavelave lea na tula’i mai i le aso Toona’i na te’a nei, ina ua fasi fa’amo’amo’a o ia e isi pagota i totonu o le lotoa o le toese i Tafuna.

O lenei fa’alavelave, e le gata na fa’amaonia mai e se sui o le aiga o lea ali’i pagota i le Samoa News, ae sa fa’apea fo’i ona fa’amaonia mai e se molimau fa’atuatuaina. Na maua fo’i e le Samoa News ni telefoni mai ni isi o le atunu’u, o lo o valaau mai e fia malamalama i le tulaga o lenei fa’alavelave.

E tusa ai o se ripoti ua maua e le Samoa News, o lo o taua ai e fa’apea, o le fa’alavelave na tula’i mai ina ua mae’a le asiga a le aiga o le ali’i pagota, ona tuua lea e le aiga o le nofoaga o le toese i Tafuna, ae toe fo’i atu le ali’i pagota i le potu o loo loka ai o ia. O iina lea na taua e molimau na tula’i mai ai loa le fa’alavelave, ina ua fo’i atu o ia i lona potu ae osofaia ai loa o ia e ni isi o pagota.

E talitonu le Samoa News, o lo o fa’agasolo i le taimi nei se suesuega a le Vaega o Leoleo Suesue (CID) e uiga i lenei mataupu.

O le ali’i pagota o loo tau fa’aola i le falema’i, o Nick Mataia, o se tasi lea e to’atolu i ai ali’i na pu’e fa’apagota e Leoleo ma molia i le vaiaso i ona tua atu, ona o le fa’alavelave e pei ona tu’uaia ai i latou, i lo latou faia lea o amioga le taupulea i ni tama’ita’i se to’alua e ta’i 14 tausaga le matutua.

Na asia e le Samoa News le potu tigaina o le ICU (Intensive Care Unit) i le aso Gafua na te’a nei, ma fa’amaonia mai ai e se tagata faigaluega e le fa’ataga ona ia talanoa i le Tusitala e uiga i lenei mataupu, e taofia ai lea o se gasegase e suafa ia Mataia i le ICU.

Na taua atili fo’i e le tagata faigaluega lea e faapea, e fa’asa tagata o aiga ona latou asia ia Mataia. O lo o i ai fo’i se Leoleo o loo tiute i le faitoto’a ina ia mautinoa e leai lava se isi o le aiga o Mataia, poo soo se tagata fo’i e mafai ona aga’i atu e asi o ia.

Na taua e se sui o le aiga i le Samoa News e fa’apea, na aga’i atu le aiga e asi Mataia i le taeao o le aso Toona’i na te’a nei i le falepuipui, e tusa ai o asiga masani mo aiga o pagota o loo taofia i le toese.

O le mae’a ai o le asiga, na toe aga’i atu ai loa Mataia i lona potu, ma o iina lea na taua na tula’i mai ai le fa’alavelave.

“Na matua fasi fa’amo’amo’a lava e pagota Mataiaa, toeitiiti lava oti. O lo o taofia nei o ia i le ICU, ae o se itu e fa’noanoa ai, e le o fa’atagaina si ona to’alua ma lana fanau e to’alua ona asiasi ia te ia,” o le molimau lea a se sui o le aiga.

Ae ui i le le maua o se avanoa o le aiga e asia ai Mataia, na mafai ona fesoota’i le aiga ma ni isi o tagata faigaluega, ma latou maua ai le tulaga o loo i ai ia Mataia.

“O loo matua faigata lava i le aiga ona taumafai e saili le mafua’aga tonu o lenei fa’alavelave. Sa faia lona faata ma fa’ailoa mai ai le tele o se a’afiaga i lona ulu, ma o loo i ai o ia i se tulaga matuia i le taimi nei.”

E ui i le naunau o le aiga i lo latou fia maua o se fa’amatalaga sa’o e uiga i lenei faalavelave, peita’i e le o mafai ona latou maua se atoaga o le mea sa tula’i mai. Sa taua fo’i e le sui o le aiga e fa’apea, e oo lava fo’i i Leoleo o le toese sa tiute i le taimi na tula’i mai ai le fa’alavelave, sa latou taua e fa’apea, e leai ma se isi na vaai i le taimi na tula’i mai ai le fa’alavelave.

Na taua e se molimau fa’atuatuaina mai totonu o le toese e fa’apea, na te lei vaai i le taimi na tula’i mai ai le fa’alavelave, ae na te fa’amaonia le i ai o le fa’alavelave na tula’i mai i le toese, lea na manu’a tigaina ai le ali’i pagota o Mataia.

E le i mana’o le molimau e fa’ailoa lona igoa, ona o puipuiga i lona saogalemu. Ae sa ia taua e fa’apea, o le fa’alavelave na tula’i mai i le nofoaga o loo taofia ai pagota e le i mae’a taualumaga o a latou fa’amasinoga.

“Na ou faalogo i tala o loo salalau solo i totonu o le falepuipui e fa’apea, o ni isi o ali’i o loo taofia i le toese, o i latou ia na fa’atinoina le fa’alavelave. O lo o faagasolo i le taimi nei suesuega a Leoleo Suesue mai le CID e uiga i lenei fa’alavelave, talosia ae maua ai le mafuaaga tonu o le fa’alavelave,” o le saunoaga lea a le molimau.

O le tula’i mai ai le fa’alavelave, na fa’afuase’i ai loa ona taofia ma asiga mo pagota i le aso Toona’i lava lea atoa ai ma le Aso Sa.

O le fa’alavelave e pei ona tula’i mai i le taimi nei, o le tuuina atu lea e Leoleo o ki o sela taitasi i ni isi o pagota, ma mafai ai e pagota nei ona latou tatalaina sela o loo loka ai pagota ma maua ai le avanoa latou te fa’atinoina ai gaioiga faapenei i pagota e le o fiafia i ai.

I le 2 vaiaso talu ai, na fasi ai fo’i se isi pagota i totonu o le toese. Na tulaga lelei foliga o le ali’i pagota i le aso na fa’atoa tula’i ai i luma o le fa’amasinoga, peita’i o le taeao na sosoo ai ina ua toe tula’i o ia i luma o le fa’amasinoga, na vaaia ai tulaga faaletonu i ona foliga.