I le fonotaga a le kapineta a le kovana i le vaiaso ua te’a, sa fa’amanatu ai e le afioga i le Lutena Kovana, Lemanu Palepoi Sialega Mauga, i fa’atonusili o matagaluega ma ofisa o le malo, e tatau ona latou muamua fa’ailoa i le kovana le nofoaga fou e si’itia i ai o latou ofisa a’e le’i fa’ataunu’uina lea fa’amoemoe.

E pei ona saunoa Lemanu, e i ai mataupu tulai mai ua toatele le mamalu o le atunu’u ua valaau atu i le Ofisa o le Kovana, e fesiligia po’o fea ua o’o i ai ofisa a le malo, ona e le o toe i ai i le nofoaga sa i ai muamua.

O le faigata o lenei mataupu, e pei ona saunoa Lemanu, e le iloa e le kovana le tulaga tonu ua o i ai ofisa e pei ona fesiligia e le atunu’u. “Ma e tatau ona fa’alauiloa i le atunu’u le nofoaga fou o le a si’itia i ai se ofisa a le malo,” o le saunoaga lea a Lemanu.

I fa’atonusili uma o ofisa ma matagaluega a le malo, “e tatau ona muamua logoina le kovana ma lona ofisa po’o fea ua fa’amoemoe lea vaega o le malo e si’i i ai lo latou ofisa, ae le’i fa’atau’uina lea fa’amoemoe ina ia aua ai nei tausaili e le kovana ae maise le mamalu lautele o le atunu’u,” o le saunoaga fa’aopoopo lea a Lemanu.

O se fa’ata’ita’iga, e pei ona taua e Lemanu, o se mataupu lata mai nei i le ofisa o le Historical Preservation, o lea ofisa e i lalo o le fa’amalumaluga a le Ofisa o le Kovana.

Saunoa le afioga i le lutena kovana e fa’apea o le isi afiafi sa pasia ai le auala ae vaaia le fa’ailo i le nofoaga fou o le Historical Preservation i le fale fou o le Paramount Builders - i le auala e agai atu i Fagaima.

Ae o lea fale e le’i ma’ea ona fausia, ae ua si’i atu i ai lea ofisa o le malo. Sa fa’ailoa e Lemanu tulafono a le malo, e tatau ona maua muamua fa’amoniga mai le Matagaluega o Galuega Lautele e fa’atagaina ai ona nofoia se fale.

Ae o le fale a Paramount Builders e le’i ma’ea ona fausia. O le mea lea sa ia talosagaina ai le fa’atonusili o le Matagaluega o Galuega Lautele mo se tusitusiga fa’amaonia “partial certificate of occupancy” e puipui ai le malo, ma aloaia ai le Historical Preservation i lo latou nofoaga fou ona ua ma’ea fa’atulaga uma lea ofisa o lea nofoaga.

Saunoa Lemanu sa ia fa’afesootai le ta’ita’i o le ofisa o le Historical Preservation ma fa’ailoa atu e le ta’ita’i ia te ia nate le iloa e tatau ona faia se tusitusiga fa’amaonia fa’atoa mafai lea ona nofoia lea fale.

E le’i fa’ailoa e Lemanu le suafa o le ta’ita’i o lea ofisa. Ae fa’ailo atu e le Samoa News, o ia lea e suafa ia Letitia Peau ma o ia foi o le sui taitai o le aoga a Manumalo Academy.