Ads by Google Ads by Google

Tatala i tua le ali’i na ia ave mariuana i se tamaititi aoga


[ata: foa'i]
ausage@samoanews.com

O le ali’i lea na ta’usala i lona tufatufa atu o sikaleti mariuana i se tamaititi aoga mai le  Aoga Maualuga a Fagaitua i le tausaga na te’a nei, ua tatalaina nei i tua e le Faamasinoga, ina ua manatu le faamasinoga ua lava masina e 12 lea na taofia ai o ia e fa’atalitali ai le fa’aiuga o lana mataupu e fai ma ana fa’asalaga i lenei mataupu.

 

O le aso Tofi o le vaiaso na te’a nei na tatala ai i tua Molieletise Salu, ina ua tula’i i luma o le afioga i le ali’i Fa’amasino Sili lagolago ia Elvis P. Patea mo le lauina o lana fa’asalaga. O le ali’i loia fautua ia Michael White sa tula’i mo Salu, ae o le tama’ita’i loia sili lagolago ia Christy Dunn na tula’i mo le itu a le malo.

 

O le aso 27 o Novema 2018 na faatulaga e lau ai le fa’asalaga a Salu, peita’i na toe tolopo mai mo le aso Lulu o le vaiaso na te’a nei, ona o se poloaiga mai le fa’amasinoga e tatau ai ona auai le Loia Sili ma le Pule o le Ofisa o Femalagaaiga i le aso e lau ai le fa’asalaga a Salu, e fa’amanino le mafua’aga ua le tali mai ai le Ofisa o Femalagaaiga i le poloaiga a le fa’amasinoga.

 

Na poloaina e le Ofisa Faanofovaavaaia le faila a Salu, peita’i e oo mai i le aso na fuafua e lau ai le fa’asalaga a Salu, e lei tuuina atu lava e le Ofisa o Femalagaaiga se ripoti i le Ofisa Faanofovaavaaia.

 

Ina ua valaau le mataupu a Salu i le vaiaso na te’a nei, na fa’amanino ai e le afioga a Patea e fa’apea, e lei atoa se 4 itula talu ona mae’a le faaiuga a le fa’amasinoga e poloaina ai le Loia Sili ia Talauega Eleasalo Ale ma le Pule o le Ofisa o Femalagaaiga ia Peseta D. Fuimaono e oo atu i luma o le fa’amasinoga, ae tau aao loa e le Failautusi a le Fa’amasinoga le faila a Salu mai le Ofisa o Femalagaaiga.

 

Ona o lea tulaga, ua manatu ai le fa’amasinoga e le toe moomia le oo mai o i laua sa fuafua e fesiligia e uiga i lenei mataupu.

 

Na ulua’i tu’uaia e le malo ia Salu i le moliaga mamafa o le umia faasolitulafono o vaega o le laau fa’asaina o le mariuana ma le fa’amoemoe e tufatufa atu i isi tagata. O se moliaga e mafai ona fa’asala ai o ia i le toese mo le umi e oo atu i le 20. Ae i lalo o le maliliega na latou sainia ma le malo, na tali ioe ai Salu i le moliaga feololo o le umia faasolitulafono o fualaau fa’asaina, lea e mafai ona fa’asala ai o ia i le toese mo le umi e mafai ona oo atu i le 5 tausaga.

 

I le tali ioe ai o Salu i le moliaga e pei ona ta’usala ai o ia e le fa’amasinoga, sa ia ta’utino ai e fa’apea, i le aso 01 o Novema 2017, sa ia tuu atu ai ni sikaleti mariuana se 4 i se alii e aoga i le Aoga Maualuga a Fagaitua.

 

Na fa’atoese Salu i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia. Sa ia taua e fa’apea, a o taofia ai o ia i le toese mo le silia i le 12 masina, sa ia aoaoina mai ai se lesona taua mo lona olaga, ma ua ia lagona ai le salamo moni.

 

Na molimau fo’i lona aunty o loo nofo ai ma ia fa’ailoa i le fa’amasinoga itu lelei o Salu, e le gata o se alii e usita’i ma fa’alogo, ae o se taimi muamua fo’i lenei ua a’afia ai o ia i se solitulafono faapenei. Na talosaga le aunty i le fa’amasinoga mo se avanoa se’i toe mafuta ai ma Salu, ma fai i ai se galuega lelei mo lona olaga.

 

Na tutu fa’atasi loia a itu e lua e finau i le fa’amasinoga mo se fa’asalaga faanofovaavaaia, ina ia mafai ai ona maua le avanoa e tatala mai ai i tua le ua molia.

 

Na fa’ailoa e Patea ia Salu le matuia ma le leaga o le gaioiga sa ia faia, e le gata ua ia tuu fualaau fa’asaina i se tamaitiiti aoga laititi, ae o se fa’ata’ita’iga leaga fo’i lea ua ia faia mo lea tamaititi, ina ia avea ai o ia ma tagata e umia fualaau fa’asaina i le lumana’i

 

Na faailoa e Patea ia Salu e fa’apea, e ui i le matuia o lana gaioiga sa faia, peita’i ua fa’afofoga le fa’amasinoga i molimau e tele e fa’atatau i lona olaga faamaoni i totonu o le aiga, ma ua  manatu ai le fa’amasinoga e tuu atu se avanoa mo ia.

 

“O le avanoa lea o le a tuuina atu, ia e fa’aaoga tatau lelei ina ia aua ai ne’i e toe aafia i se isi lava solitulafono,” o le fautuaga lea a le fa’amasinoga ia Salu.

 

O nisi o tuutuuga o le faasalaga faanofovaavaaia a Salu e 5 tausaga, o lona tuliina lea o masina e 20 i le toese, peita’i, ua manatu le fa’amasinoga, o le a fa’aaoga masina e 12 lea na taofia ai o ia e fai ma ana fa’asalaga, ae o masina o loo totoe ai, o le a taofia le tuliina. Lona uiga, ua tatalaina nei i tua ia Salu mai le toese i Tafuna.

 

Talu ai tulaga fa’aletonu i lona pepa nofomau, lea na mae’a le aoga o lona ID i le aso 24 o Aperila 2017, ua poloaina ai loa e le fa’amasinoga ia Salu na te tuua Amerika Samoa ae toe fo’i atu i Samoa, peita’i ua taofi e le fa’amasinoga le fa’ataunuuina o lea tuutuuga, fuafua lava i lona usitaia o poloaiga ua tuuina atu ia te ia.

 

Ua faatonuina fo’i o ia e totogi le salatupe e $1,000, ma ia auai i ni aoaoga e fesoasoani ai i tulaga fa’aletonu o le ‘ava malosi.