Ads by Google Ads by Google

TATALA LE FALE FA'APITOA A'OINA FANAFANAGA - US ARMY RESERVE


O se va'aiga i nisi o ali'i leoleo ua latou asia le nofoaga mo fanafanaga, ua va'aia fo'i le mana'omia e i latou ona auai atu i ai mo latou a'oa'oga i lea tomai fa'apitoa mo le fa'atinoga o tiute i le galuega. [ata: Leua AIono Frost]

Ua va'aia le so'ofa'atasi o ali'i leoleo ma le vasega o fanau i le Militeri i le fetufa'i o latou iloa i tulaga o auupega ua fa'aaogaina i o latou tiute fai. [ata: Leua Aiono Frost]

I le afiafi o le aso Faraile ua te’a na tatala ai faitoto'a o le Fale A'otau ai Tomai Tau Fanafana a le USArmy Reserve i Tafuna.

 

I lea sauniga, sa avea le afioga i le Loia Sili, Talauega Eliasaro Ale, ma sui o le malo, ona o ia foi o lo’o avea ma taitai le tumau i le taimi nei, ona o le vaiaso ua te’a sa malaga ai i fafo Lutena Kovana, Lemanu Peleti Mauga.

 

I le taligamalo mo lea fa'amoemoe, sa auai ai le ali'i Ta'ita'i o le USArmy Reserve a le 9th Mission Support Command, Brigader General Douglas F. Anderson, mai le Ofisa Autu i Hawaii, ua le 31 tausga o ia i le USArmy Reserve.

 

"Ona o lenei tomai e mana'omia lava ona toe gasolo le fanau ua mae'a tautua i le USArmy Reserve e toe pasia mai lea agava'a i fafo i nofoaga fa'apenei e a'oa'oina ma toe siaki ai le fanafana, o se fa'amama avega lea i le fanau i nei fo'i faiva ma tautua, aua o le a le toe gasolo i fafo ae o le a pasia lava iinei,” o se tala lea a Anderson.

 

O le tau aofai o le galuega e $9miliona, ma sa fa’atupeina e le Army.  O le sauniga sa fa'atautaia e le Faife'au EFKAS i Fagatogo, Rev Iasepi Ulu, ma sa ia siitia mai le mau Salamo 18: 1&2 - O le Atua o lo'u malosi lea, o lo'u Olo, o lo'u Maluapapa....O Upu e fa'amalosi ai i le fitafita o taua, ma o se fa'amoemoega mautu lea o i latou e o'o mai ai le vala'au e tula'i ma tau.”

 

I le avanoa mo Anderson, sa ia fa'ailoa "O le fale A'oga Fanafana lenei, o le ituaiga fou lea ua mafai ona fausia ma fa'atula'ia i se Nofoaga a le US Army Reserve. O lona uiga, o ituaiga tomai uma lava e a'otauina ai le fanau i fanafanaga mamao i nofoaga vaimaoa, e o'o mai i fanafanaga a'otauina i totonu o nofoaga fa'apenei, lea ua aotelega uma i le fale mo fanafanaga lenei ua fa'atuina i Amerika Samoa. O lo ua le mautinoa pe o fea le isi nofoaga o le a soso'o mai ona fausia ai se isi nofoaga e fa'aluaina lenei Modular Small Arms Range.”

 

O le isi mea ua mautinoa nei, e tasi lava le ituaiga pulufana ua fa'atagaina ona fa'aaogaina o le ituaiga fana o le 9mili i ona pulufana 556M4.

 

O le fale lenei e a'otau ai fitafita a le USArmy Reserve ma i latou fo'i o lo'o ua ulufale i le USArmy ma ua tapenapena mo le aga'i atu e fa'apasia kosi fa'amiliteri e agava'a ai i tiute fa'afitafita tautua.

 

O le susuga Lauti Fa'afetai Lauti sa avea ma fofoga o le polokalama fa'asolo o lea afiafi matagofie, ma sa tutulai fo'i Talauega, le afioga Pulu Ae Ae Jr ma Anderson e ooti le lipina e tatalaina ai le fale.

 

"I le nofoaga lea ua le mafai ona sao atu i fafo se pulufana lava e tasi ua fanaina. Afai fo'i e se ese se pulufana mai le laina ma le talipupuni o lo'o agatonu atu i ai, ua mae'a punitau uma le vaega atoa o le fale i fafo ma totonu, i ona puipui ua mae'a fa'aatulua, ina ia 100% le saogalemu o so'o se tasi e fafo atu o le fale lenei,” o se fa'amatalaga lea a Anderson i le mamalu sa aofia potopoto.

 

Ua mae'a fa'aauupegaina le fale ina ia vave ona mita'i se afi e sasao ae i totonu, ua saogalemu fo'i ona atugapuipui ina ia mautu le saogalemu o i latou i totonu o le potu ua fa'atonutonu atu ai galuega uma o lo'o faia i totonu o le fale o fanafanaga.

 

Na maimoaina ma ua asiasia fo'i e le afioga le Komesina o Leoleo lea maota i lea afiafi, ma o ia fo'i ua mae'a fa'atulaga le aso e sainia ai se maliliega fa'apitoa ma Ta'ita'i o le US Army Reserve ina ia fa'ataga pe tu'u avanoa lenei fale mo fanafanaga, ia a'otauina ai ali'i Leoleo o lo'o fa'aauupegaina i la'au malosi, i tomai tau fanafanaga.

 

Na i ai le keke matagofie na saunia fa'apitoa mo le sauniga lenei, ma sa saunia lea e le PX mo le fa'amoemoe.

 

SAINIA LE MALILIEGA VA O AMERIKA SAMOA & US ARMY RESERVE:

 

I le sauniga sa fa'atino i le taeao ananafi, i l potu fono o le US Army Reserve Canter i Tafuna, ua mae'a sainia atoatoa ai e le Loia Sili Talauega Eliasaro Ale, le afioga le Komesina o Leoleo, Le’i Sonny Thompson, ma le susuga le Ta'ita'i o le USArmy Reserve 9th Support Command Brigadier General Doulas F. Anderson, ina ia mafai ona faaaogaina fo'i e le Matagaluega o le Puipuiga o le Saogalemu Lautele o Amerika Samoa, ali'i ma tama'ita'i Leoleo, lea nofoaga mo fanafanaga a le USArmy e a'oa'o ai i latou i lea fo'i tomai.

 

Peita'i, i lea maliliega ua mae'a fa'atulaga ai ina ia mua'i sailia ma su'ea e ali'i ma tama'ita'i Leoleo agava'a patino i le National Security Eligibility Test, o se su'ega o le agava'a e umia ai la'au malosi i faiva fa'aleoleo a le Malo tele. Afai e le'i pasia muamua e i latou lea su'ega taua, e le mafai ona latou fa'aaogaina e i latou le fale mo fanafanaga lenei.

 

O lo ua fa'amauina fo'i le afioga le Komesina o Leoleo, i le taimi nei, e avea ma se tasi na te mua'i va'ai toto'a i agava'a nei o sui e mafai ona fa'ataga e fa'aaogaina lea Maota mo le A'oga Fa'apitoa o le Fanafana.

 

O isi vaega o le maliliega ua mae'a fa'ailoa mai, e na'o fa'aiuga o le vaiaso e mafai ona talosagaina ai le fa'aaogaina e ali'i ma tama'ita'i Malu o le Malo ua agava'a lenei maota o fanafanaga, pe fa'aulu fo'i le talosaga i nisi o aso ae muamua ona fetu'una'i i le va o le Pulega a le USArmy Reserve ma le afioga le Komesina o Leoleo nei talosaga.

 

Ua leai fo'i se totogi lava e tasi e totogia e ali'i ma tama'ita'i leoleo, po'o le malo fo'i ina ia fa'aaogaina ai lenei fale mo fanafanaga ma a'oga fanafana a ali'i ma tama'ita'i leoleo.

 

O le umi ua fa'atulaga ai lenei Maliliega, e na'o le lima tausaga ma ua amatalia i le aso 29 Aperila, 2019. Ua fa'amauina ma ua fa'alauiloa lona amatalia ona aoga lenei maliliega i le aso fo'i lea ma faitauina ai le 5 tausaga e aoga ai.

 

Ua fa'amauina, afai e toe talosagaina se isi maliliega fou, o sui fo'i o tutula'i i nei tofiga o le Malo, fa'atasi ai ma le US Army Reserve o le a toe fa'afouina lea maliliega. A i ai fo'i ni fa'aletonu e tutupu mai ali'i ma tama'ita'i leoleo a'o fa'aaogaina le nofoaga lenei, o le soalaupule fo'i sui nei e to'atolu ma faia le fa'aiuga tatau i so'o se mea na tupu.