Ads by Google Ads by Google

Tatala Aviu Titio i tua i lalo o tuutuuga faapitoa

ausage@samoanews.com

O le ali’i lea o lo o tu’uaia fa’atasi ma ni Leoleo sa galulue i le Falepuipui o Tamaiti i Tafuna (JDC), ua tatalaina nei o ia i tua e le Fa’amasinoga Maualuga, i lalo o tuutuuga faapitoa e ao ona ia usita’i i ai.

 

O le vaiaso na te’a nei na lau ai le fa’asalaga a le alii o Aviu Asofa Titio i luma o le afioga i le ali’i Fa’amasino Sili ia Michael Kruse, ma ana fa’amasino lagolago ia Faamasuili Pomele ma Muasau T. Tofili, i le mae’a ai lea ona ta’usala o ia i le moliaga o lona taumafai lea e fa’alavelave i se molimau a le malo, o se solitulafono D i le fa’atulagaina o solitulafono mamafa.

 

E 5 tausaga na manatu le fa’amasinoga e fa’asala ai Titio, peita’i ua faamalumalu lona tuliina o lea fa’asalaga, ae o le a nofovaavaaia o ia mo le 5 tausaga i lalo o poloaiga e ao ona ia usita’i i ai. O ni isi o ia poloaiga e aofia ai lona tuliina lea o masina e 20 i le toese i Tafuna.

 

Peita’i, o le a fa’aaoga le umi e 15 masina lea na taofia ai o ia i le toese e fai ma ana fa’asalaga, ae o le umi o lo o totoe ai, o le a fa’amalumalu lona tuliina. Lona uiga, vaiaso lava na te’a nei na tatala ai i tua Titio i lalo o tuutuuga faapitoa e ao ona ia usita’i i ai.

 

O ni isi o ia tuutuuga e aofia ai le fa’asa lea ona ia toe taumafai e fa’afesoota’i le molimau a le malo na a’afia i lana solitulafono, fa’asa ona ia toe soli se tulafono, pe toe fesootai atu fo’i i Leoleo e to’afa o lo o tu’uaia fa’atasi i latou i lenei mataupu, a ia avea o ia ma tagatanu’u lelei e tausisi i tulafono a le malo, ma ia saili sana galuega e galue ai i totonu o le 90 aso talu mai le aso na tatala ai o ia i tua.

 

A o le i tuuina atu le fa’asalaga a le fa’amasinoga ia Titio, na maua le avanoa e fa’atoese ai o ia e tusa ai o lana solitulafono. Na talosaga le ua molia mo se avanoa e toe fo’i atu ai i lona aiga e fesoasoani i lona Tama i le tausiaina o le aiga.

 

Sa ia fa’ailoa i le fa’amasinoga e fa’apea, ua tele masina o taofia o ia, fa’atasi ai ma isi ona uso e to’alua i totonu o le falepuipui, ma ua leai ai se isi e fesoasoani i lona Tama i le tausiaina o le latou aiga.

 

Na taua e Titio e fa’apea, o masina e 15 sa taofia ai o ia i le falepuipui, a o fa’atalitali ai se fa’aiuga o lana mataupu, ua ia aoaoina ai se lesona taua i lona olaga, ma ua ia iloa ai, e le o se mea lelei le solitulafono, e le o se nofoaga lelei fo’i le falepuipui mo ia.

 

“Lau afioga i le fa’amasino sili, fa’amolemole pe mafai ona toe tuu mai se isi avanoa mo a’u, se’i o’u toe fo’i atu ai e fesoasoani i lo’u Tama i le tausiaina o le matou aiga,” o le talosaga lea a Titio. Sa i ai fo’i i totonu o le potu faamasino lona Tama.

 

Sa ia fa’atoese i le fa’amasinoga, le malo o Amerika Samoa, o ona matua, aemaise ai le na a’afia i lana solitulafono, ina ia fa’amagalo o ia.

 

Na talosaga lana loia ia Michael White ina ia fa’asala le ua molia i se fa’asalaga fa’anofovaavaaia, ma fa’aaoga ai le umi lea ua mae’a ona ia tuliina e fai ma ana fa’asalaga i lenei mataupu.

 

Na lagolagoina e le loia a le malo ia Christy Dunn le talosaga a le loia a Titio, ina ia fa’asala le ua molia i se fa’asalaga fa’anofovaavaaia, i lalo o ni tuutuuga faapitoa e ao ona ia usita’i i ai.

 

O Leoleo e to’afa o lo o tu’uaia fa’atasi ma Titio i lenei mataupu e aofia ai Alofagia Letuli, Olafou Wilson ma Okesene Alo, lea o lo o i ai a latou mataupu i luma o le Fa’amasinoga Maualuga, ae o Junior Utuga o lana mataupu o loo i ai i le fa’amasinoga fa’aitumalo.

 

O Letuli ua ta’usala i le umia faasolitulafono o le fualaau faasaina o le aisa, atoa ai ma le fesoasoani e fa’asola se pagota, ae o Wilson ua ta’usala i le umia faasolitulafon o le pauta o le aisa, atoa ai ma le gaoi, i lalo o se maliliega sa latou sainia ma le malo ma talia e le fa’amasinoga.

 

Ae mo Alo, o le masina na te’a nei na ta’usala ai o ia e se vaega iloilo iuga i moliaga o le umia faasolitulafono o fualaau fa’asaina faapea ai ma le fesoasoani e faasosola pagota i tua, ma ua faamoemoe o le aso 28 Setema e lau ai lana fa’asalaga.