Ads by Google Ads by Google

Tasi aso sisiga fu’a 2019 - Aperila 17; tu’uuga fautasi Aperila 13


O se tasi o ata sa fa’aalia e le Komiti o le Fua i lenei tausaga e fa’alauiloa ai le polokama o le Sisiga Fu’a o le 2019. [ata: FS]

I le fonotaga a le kapineta a le kovana i le vaiaso ua te’a sa fa’alauiloa ai e le Komiti o le Fu’a le polokalama fa’ataoto o le sisiga fu’a i lenei tausaga ma e tasi le aso o le sauniga e faia i le aso 17 o Aperila i le Veterans Memorial Stadium i Tafuna.

 

Sa fa’ailoa foi i le fonotaga e fa’apea i le taeao o le aso 13 Aperila, e faia ai tuuga fautasi, ma e fuafua lava i le tulaga o le tau le taimi e amata ai faiga mea i le tai.

 

Ae fia fa’ailoa atu e le Samoa News o le aso 13 o Aperila e taunuu ai i Amerika Samoa le meli-la’u pasese o le Star Princess. Ua le gata i lea o le isi meli la’u pasese e afea Amerika Samoa i le aso 16 o Aperila.

 

Ae i le folasaga a le Komiti o le Fu’a, lea sa saunoa amata ai le tofa ia Malemo Tausaga, o le sui failautusi o le Ofisa o Mataupu Tau Samoa, e le’i fa’ailoa ai le tulaga o meli la’u pasese e afea le teritori i le aso 13 o Aperila - o le aso To’anai.

 

Ae sa saunoa Malemo e fa’apea e i ai nai suiga i le polokalama i lenei tausaga mai i isi polokalama i tausaga ua te’a.

 

Saunoa foi le afioga i le Lutena Kovana, Lemanu Palepoi Sialega Mauga, o lo’o avea ma ta’ita’i o le malo i lenei vaitau a’o si’i ma’i i fafo le afioga i le kovana ia Lolo Matalasi Moliga. O Lemanu o le soa ta’ita’i komiti o le Komiti o le Fu’a. Fa’ailoa e Lemanu i afioga i fa’atonusili ma ta’ita’i o vaega a le malo le manaomia lea ona lagolago atu i latou i le polokalama ina ia mautinoa e ‘iu i le manuia e pei o tausaga ua te’a.

 

I le folasaga a le komiti, sa fa’ailoa ai o le aso 12 o Aperila, aso Faraile, e amata ai polokalama masani, e pei o le fa’alauiloaina o oloa mai kamupani tu’a ae maise tautua a le malo, e faia i le malae o le Su’igaula o le Atuvasa i Utulei.

 

E amata mai i le itula e 12 i le aoauli e oo atu i le 5 i le afiafi. O le itula e 6 i le afiafi ona amata lea o fiafiaga fa’aSamoa e fa’afiafia ai fa’alapotopotoga ma aoga ua ma’ea ona tofia.

 

I le aso 13 o Aperila, aso Toana’i, ua fa’atulagaina i le taeao tuuga fautasi, ma toe fa’alia e le komiti, o le taimi e amata ai e fuafua lava i le tulaga o le tau. E le’i fa’aalia i le taimi nei le aofa’i o fautasi e tauva i lenei tausaga. I le aoauli e fa’aauau ai polokalama a kamupani tua ma le malo, soso’o ai i le afiafi ma fa’afiafiaga fa’aSamoa.

 

I le isi itu o le auala i le malae a le Aoga Maualuga a Samoana e fa’agasolo ai polokalama mo fanau ma aiga. I le itula e 8 i le po, ua fa’atulaga mo Fireworks.

 

O le aso Sa, Aperila 14 i le itula e 3 i le aoauli e amata ai le sauniga lotu o le Fu’a i le Fale Laumei i Utulei.

 

O aso 15 o Aperila e o’o i le aso 16 o Aperila e fa’aauau ai polokalama fa’ataoto i le Su’igaula o le Atuvasa i le aoauli ma fa’afiafiaga fa’aSamoa i le po. O le a i ai nofoaga e fa’atau ai mea taumafa i lea malae i aso uma o ia polokalama.

 

I le aso fa’atulaga ina o le sauniga o le Fu’a ia Aperila 17 ua fa’atulagaina polokalama masani i le sisiga fu’a, soso’o ai le savaliga, soso’o ai fa’afiafiaga o siva ma pese mai aoga maualuluga a Leone, Tafuna ma Samoana.

 

O le polokalama fa’atulaga e pei ona fa’ailoa o le afioaga o Saleaumua e suia le malo o Samoa ae peitai sa fa’ailoa foi e fa’apea o le fa’aiuga e faia e le Palemia o Samoa. Ma o le au malaga mai Samoa e api i le Pago Pago Youth Center.

 

O le a saunoa le kovana i lea aso ae o le saunoaga fa’apitoa ua tuuina atu i le Matagaluega o le Initeria a le fetarale.

 

Ua ma’ea fa’ailoa foi i matagaluega a le malo o le aso 5 o Aperila ua fa’atulaga mo le fa’amamaina o le atunu’u ae o le aso 10 o Aperila e teuteuina ai le atunu’u a’o le’i amata polokalama mo le sisiga fu’a o le 2019.