Ua tapunia nei e le Matagaluega o Leoleo le Pala Lagoon Swimming Center i Tafuna mo se taimi le tumau,  a o fa’agasolo ai suesuega e fa’atatau i le fa’alavelave matuia lea na tula’i mai i le aso Lulu o le vaiaso na te’a nei, lea e pei ona malemo ai se teineititi aoga o le Vasega 8 a le Pavaiai Elementary School ma maliu ai lava.

E taunu’u atu le Samoa News i le taeao o le aso Tofi na te’a nei, ua mae’a ona toso le lipine a le vaega o Leoleo Suesue ma ua amata aloaia foi la latou suesuega e uiga i lenei mataupu.

E le i maua se fa’amatalaga mai Leoleo Suesue e to’atolu sa i ai i le nofoaga ina ua taunu’u atu le Samoa News.

O aoga uma, Ekalesia ma Faalapotopotoga sa fuafua e fa’aaogaina lea nofoaga mo taimi o fa’auuga a aoga aemaise ai le Aso Sa o Tama e pei ona tuana’i atu nei, ua toe taofia uma le fa’ataunu’uina o a latou fuafuaga ina ua tapunia le vai taele mo taelega ma tafaoga.

E talitonu le Samoa News, o le suesuega e pei ona amataina e le vaega o Leoleo Suesue, o le a aofia ai le fesiligia o ni isi o molimau sa i ai i le taimi o le fa’alavelave, e aofia ai fanau aoga ma faiaoga mai le aoga a Pavaiai.

Na vaaia le toa filemu o le nofoaga i le taimi na asia ai e le Samoa News. Sa i ai i le taimi lea se ali’i sa galue o se tagata fa’aola mo tausaga e tele i Amerika, lea na ia fa’ailoa i le Samoa News le matua fa’ateia o ia ina ua tula’i mai lenei fa’alavelave.

Na taua e lea ali’i e fa’apea, soo se nofoaga lava e taeele ai tagata e pei o le nofoaga i Tafuna, e tatau lava ona i ai ni tagata fa’aola i taimi uma. O le mafua’aga lena e totogi ai e tagata tupe mo tafaoga ma taelega, ina ia mautinoa e malu puipuia lo latou saogalemu i taimi e tutupu mai ai fa’alavelave fa’afuase’i.

Na taua e lea Tama lona fesiligia o le gaioiga sa faia e tagata fa’aola i le taimi na tula’i mai ai le fa’alavelave. Sa ia taua fo’i lona fesiligia o le nofoaga sa i ai faiaoga i le taimi na tula’i mai ai le fa’alavelave, pe sa i ai i le nofoaga sa taeele ai fanau, pe sa i ai i se isi nofoaga i totonu lava o le taelega.

Na taua e ni isi o matua sa i ai a latou fanau i le tafaoga e fa’apea, e lagona le fa’anoanoa ona o le fa’alavelave ua mafua ai ona maliu fa’afuase’i se tasi o fanau aoga.

Na taua e le tasi o Tina e fa’apea, o ituaiga taimi nei e tatau ai i faiaoga ona fa’aeteete i nofoaga latou te filifili e ave i ai fanau aoga e tafafao ai, a o lumana’i ai aso o a latou fa’auuga, aua e le iloa lava fa’alavelave fa’afuase’i e tutupu mai ai.

Fai mai se tasi o Tina, o le taimi lava e ave ese atu ai fanau mai lima o matua, o le taimi lea ua tuu atu atoa ai le fa’atuatuaga i faiaoga latou te vaai ma tausi faalelei lo latou saogalemu.