Ads by Google Ads by Google

Tapunia Falema’i Fa’aitumalo mo Talavai — Tatala na’o Tui Puipuia Misela

Fa’ailoa e le fa’atonu sili o le Matagaluega o le Puipuiga o le Soifua Maloloina Motusa Tuileama Nua, pe afai o lo’o mana’omia ona gasolo a’e i Falema’i Fa’aitumalo o le atunu’u i Leone ma Amouli, o le a le toe faia i ai nisi lava talavai e pei ona masani ai, ae ua fa’asifo le tautua atoa i nei falema’i faia lea o tui puipuia o le Misela ma le inumia ai o fuala’au o le Mumu Tutupa.

 

O se tasi o mafuaga ua faia ai lea suiga, ona o lo ua vaeluaina atu nisi o tausima’i i le Hope Dialysis Center, ma ua fa’aitiitia ai le vasega o tausima’i sa galulue i le matagaluega. O le isi lua vaiaso o le a fa’amalosia ai lea tulaga se’ia mae’a fa’atulaga mai nisi o le aufaigaleuga e tau’avea tiute i tatou falema’i fa’aitumalo nei.

 

O lenei suiga, o le taumafaiga lea ia vave ona mae’a faia tui puipuia o le fanau mo le Misela, fa’atasi ai ma le toe fa’amae’a maua lea o le aotelega o le atunu’u e ao ina inumia fuala’au o le Mumu Tutupa e pei ona matua mafuli le Matagaluega.

 

O le fa’atasiga a le Au Fa’asalalau ma le Matagaluega o le Soifua Maloloina i le aso Faraile na te’a, lea sa fa’ailoa mai ai lea. Pe afai o le a fia mana’omia talavai masani e le mamalu o le atunu’u, ia fa’agasolo ane i le Falema’i itumalo i Tafuna ma le LBJ i  Faga’alu mo isi talavai uma.

 

Ua faailoa fo’i, afai e femalaga’i le mamalu o le atunu’u i Samoa po’o isi malo tuaoi, ua fautuaina ina ia malaga ma avatu ai pepa tui o le fanau, ina ia fesiligia fo’i e matagaluega o na malo le mae’a faia o tui puipuia o le misela, ma inumia fuala’au o le Mumu Tutupa.

 

Ua fa’ailoa mai fo’i o le a faia fo’i e le Matagaluega ia ituaiga o suesuega i e to’ai taunu’u ma ulufale mai i le tatou Malae Va’alele fa’apea ma le uafu, o ala ia o lo’o ulufale mai ai nisi ma aumaia le Misela i totonu o so’o se malo.

 

Ona e le o pepesi i le teritori le Misela i le taimi nei, ae ua mautu mai i suesuega ma fa’amaumauga e to’afitu i latou ua o’o ane i le falema’i tele i Moto’otua i Samoa, o lo ua maua i le misela, e to’alua tagata matutua, ae o le fanauiti uma le isi to’alima. O nisi o nei sui ua fa’amaonia o nisi na malaga mai Niu Sila.

 

Manatua o le misela e i lou tino le siama e mafua ai mo le 3 vaiaso fa’ato’a alia’i ua e maua i le misela ma sasao mai ai le pata i le tino ae maise o le tetele o le fiva ma e tiga tele le ulu.

 

E matua fa’aitiitia uma nei mea uma pe afai e o’o ane le pipisi a le misela ia te oe ae ua mae’a faia lou tui puipuia. Ua fa’ataga fo’i ona faia tui puipuia o le Misela mo tagata matutua, pe afai ua e mautinoa lelei, e le’i faia lava sou tui puipuia o lea ma’i aua e toe maua lava fo’i tagata matutua i le Misela.