Ads by Google Ads by Google

Tapuni Ofisa Soifua Maloloina nisi o fale i totonu Toese i Tafuna


[ata: foa'i]
ausage@samoanews.com

O le vaiaso na te’a nei na tapunia tumau ai e sui mai le Matagaluega o le Soifua Maloloina ni isi o fale i totonu o le Toese i Tafuna, e aofia ai le Max security, o le fale taele, atoa ai ma le Fale’ai a pagota, ina ua fa’amaonia i se latou asiasiga sa fa’atinoina tulaga lamatia o le soifua maloloina o pagota o loo latou fa’aaogaina nei nofoaga.

 

O lea ripoti na mafai ona fa’amaonia mai e se sui sinia o le Matagaluega o le Soifua Maloloina i le Samoa News, faapea ai ma ni isi o Leoleo o le Toese.

 

Na taua e le sui sinia o le Soifua Maloloina e fa’apea, o le latou asiasiga sa autu lea i le toese atoa, peita’i o nofoaga e pei ona tapunia tumau, sa mafai ona molimauina ai tulaga fa’aletonu.

 

O le Max security, e le gata e leai se eletise e ola ai, ae leai fo’i se vai e mafai ona fa’aaoga e pagota.

 

E fa’apena fo’i i le fale taele, e matua fa’aletonu lava lona tino atoa, e le tatau fo’i ona fa’aaogaina e ni tagata soifua.

 

Ae mo le Fale’ai a pagota, o le nofoaga lea sa matua iloga le tele o le fa’aletonu e pei ona taua e se molimau i le Samoa News. O le sink o lo o fa’aaoga e fufulu ai ipu e matua palapala lava.

 

O le ulo e tasi o loo kuka ai taumafa a pagota, e mata’utia le tele o le fa’aletonu o loo i ai, e le gata i le palapala, ae o le ulo lava lea e tasi e fa’avai ai moa, o le ulo lava fo’i lea e toe kuka ai meaai mo pagota.

 

I le taimi o le asiasiga a sui mai le Ofisa o le Soifua Maloloina, sa mafai ai ona pu’eina ni ata mo fa’amaumauga. Ina ua mae’a, sa fa’apipi’i ai loa ma fa’ailoilo e fa’ailoa atu ai ua tapunia tumau nei nofoaga ona ua le toe saogalemu i le fa’aaogaina.

 

“O le soifua maloloina o tagata o lo o nonofo i le falepuipui i Tafuna, o le itu pito sili lea ona taua i le auaunaga a le Soifua Maloloina. O la matou vaavaai i le tulaga sa i ai nofoaga nei e 3, e le saogalemu mo le soifua maloloina o pagota o loo nonofo i le toese i Tafuna,” o le saunoaga lea a le sui sinia a le Soifua Maloloina.

 

O le taimi na tapunia tumau ai nofoaga e pei ona taua, na aveese mai ai loa ma pagota uma sa taofia i le Max security, ae ua tufatufa atu i isi nofoaga i totonu lava o le Toese.

 

Na taua e se molimau mai le Toese i Tafuna e fa’apea, o pagota sa taofia i le Max security, o i latou ia ua le usita’i i tulafono a le nofoaga e pei o le sosola i tua, fa’amisa, atoa ai ma isi lava tulafono ua latou le tausisia.

 

“O le Max security, e pei o se nofoaga lea e fa’asala ai pagota e ulavavale i totonu o le Toese. O se nofoaga e le fia loka ai se tagata, e leai se moli e leai fo’i se vai, e te moe i le malulu o le sima. O se nofoaga e le saogalemu mo pagota,” o le saunoaga lea a le molimau i le Samoa News.

 

Na faamaonia mai e Leoleo mai le toese, le tapunia tumau lea e le Soifua Maloloina o nofoaga e 3 e pei ona taua, lea e aofia ai ma le Fale’ai mo pagota, peita’i, e ui i le tapunia ai o le Fale’ai, ae o lo o fa’aauau pea ona fa’aaoga e pagota i le taimi nei e kuka ai a latou taumafa, ona e leai se isi nofoaga e mafai ona fa’aaoga e kuka mai ai taumafa mo pagota.

 

Na taua e se molimau fa’atuatuaina e fa’apea, o le mataupu lenei na tofu atu i le Ofisa o le Soifua Maloloina, ina ua logo e nisi o pagota o latou aiga, ma fa’afesoota’i ai loa e aiga le Soifua Maloloina mo se fesoasoani, mo se avanoa e faia ai se asiasiga i le tulaga mata’utia ma le leaga o loo i ai nei nofoaga.

 

Na taua e le molimau le fa’afetaia e pagota o le auaunaga a le Soifua Maloloina, lea ua mafai ai ona faia lenei faaiuga e tapunia ai loa nofoaga eseese nei e 3 i totonu o le Toese.