Ads by Google Ads by Google

Taofia malaga o tausima'i mo gasegase e avatu i NZ

Ua fa’ailoa e le pulega o le Medicaid Office a le tatou malo, ua taofia nei le toe malaga o nisi e tausima’i (po’o escort) fa’apitoa i gasegase auina atu mo togafitiga i Niu Sila, ona ua fa’ateleina nisi o fa’aletonu e alia’i mai ai. Peita’i, e i ai nisi o gasegase o le a fa’ataga ona o tulaga e tatau ai.

 

Fa’aalia e le fa’atonu o le Medicaid Office, Sandra King Young, “Afai e le taofia nei le i ai o tausima’i e malaga fa’atasi ma nei gasegase, e o’o mai se taimi lata mai e taofia ai lenei foi manuia ua tatou selesele i ai e ala i lea faitotoa ua matala mai e togafitia ai tatou tagata e faaaoga ai le Medicare ma le Medicaid i Niu Sila, ona o mea ua tutupu mai i e tausima’i.”

 

Sa ia fa’ailoa, “Ua matele ina leaga nisi o mea o nofoaga sa nonofo ai i latou ma tausia o gasegase na malaga atu mo togafitiga, ua fa’aaogaina sese ala mo malaga fa’apitoa a tausima’i i latou talavai ma toe fo’i i le nofoaga, ae ua fa’aaoga e feoa’i solo ai i mea e le tatau, ua i ai mea i faletalimalo ua misia mai potu sa nonofo ai i latou nei, e ese mai le gasegase na si’ima’i i Niu Sila, ae ua o atu ai ma tausima’i toe mama’i ai i Niu Sila ma ua o’o ina toe si’itia fo’i ma o latou ma’i i le falema’i.”

 

“O se tasi o tausima’i ua sola ese mai le nofoaga sa tatau ona alaalata’i ai ma tausia lelei le gasegase sa la’ua malaga fa’atasi e ala i le polokalama lenei i Niu Sila. E matua tele se galuega na toe faia e le Ofisa ma Niu SIla fo’i ina ia toe sailia lea tausima’i e toe fa’afo’i mai iinei.”

 

“Ua i ai fo’i nisi mea ua tutupu mai lava i tausima’i, ua le fia faaalia fa’alaua’itele ona e mataga, e le fia talanoa ai fo’i,” o sana tala lea.

 

I le polokalama ua malilie mai i ai Niu Sila e faatautaia mo i tatou, ua fa’ataga ai ona totogia mo e gasegase o latou feoa’iga i le ea ma le laueleele faatasi ai ma nofoaga lelei e alaala ai le gasegase ma faia ana talavai, ma le 100% foi o le totogia o pili talavai a le ua gasegase.

 

Ua na’o mea’ai lava o lo’o tu’ua i le tagata gasegase ma lana tausima’i e totogia e i latou.

 

“Afai ae motusia lenei avanoa mai Niu Sila mo i tatou uma ona o lou manatu fa’apito ia te oe ma lau amio ua faia, o le a leai se mea e agava’a mo le togafitiga o isi gasegase uma lava e mulimuli mai.”

 

“E afua mai ia Oketopa 1, 2019 ua fa’ailoa atu ai nei, ua le toe taliaina ni tausima’i a le to’atele o gasegase mo Niu Sila se’i vagana ai fanauiti ma tama ma tina matutua ua tigaina tele, e ao lava ona malaga ai se tausima’i.”

 

“O Tausima’i uma fo’i e talosaga lava e ia lona visa pe afai e le o se tasi na soifua a’e i Amerika Samoa ma Amerika. E ese mai lea e ao ina i ai sou credit /debit Card talatupe ua lava le seleni o lo’o i ai mo le tausiga o oulua ma le gasegase i le taimi e te lua mau ai i Niu Sila mo talavai.”

 

“O le matutua o i latou e mafai ona avea ma tausima’i e i le va o le 21 tausaga ma le 65 tausaga le matutua, leai ma se gasegase i lona faila ma’i e taua’aoina mai le falema’i, ma e le mafai fo’i ona malaga so’o se gasegase ma se tasi o ana fanau iti. Leai ma se visa e totogia e le Ofisa o le Medicaid Amerika Samoa, aua e le o aiaia vaega tupe a le Medicaid mo na ituaiga pili.”