Ads by Google Ads by Google

Taofia asiga i le toese ona o se ali’i pagota na sola i tua


[ata: foa'i]
ausage@samoanews.com

Na taofia asiga mo pagota i le toese i le faaiuga o le vaiaso na te’a nei, ona o se suesuega faapitoa mai le vaega o Leoleo Su’esu’e, fa’asaga i le fa’alavelave lea na sola ai i tua se ali’i pagota i le fa’aiuga o le vaiaso.

 

E to’atele ni isi o aiga o pagota na valaau mai i le Samoa News ma o latou fa’aalia lagona fa’asea, ina ua aga’i atu ma taumafa e asi o latou aiga o loo taofia i le falepuipui, ae fa’ailoa ane e Leoleo o le toese, ua taofia asiga mo na o le faaiuga lava o le vaiaso na te’a nei, se’i vagana ai le momoli atu o taumafa poo isi mea totino e moomia le fia momoli i pagota.

 

Na taua e se tasi o Tina i le Samoa News e fa’apea, o le itu ua mafua ai ona ia fa’asea, o le leai o se fa’aaliga fa’alaua’itele mai le pulega o le Toese e logoina ai aiga o pagota e tusa ai o le latou suiga.

 

“O le asiga mulimuli lea sa faamoemoe e fa’amavae atu ai la’u tama teine i lona Tama o loo taofia i le falepuipui, a o le i toe fo’i atu i Hawaii i le aso Gafua na te’a nei, peita’i, ua le taunu’u uma fuafuaga ina ua taofia asiga, ma alu ai lava si a’u tama e le i fa’atofa i lona Tama,” o le saunoaga lea a le Tina.

 

Na taua fo’i e le isi Tina e fa’apea, sa i ai le fa’amoemoe e feiloa’i atu lo latou Tina matua mai Samoa i lona tuagane o loo loka i le falepuipui, ao le i toe taliu atu le olomatua i Samoa i le aso Sa na te’a nei, peita’i, ua le o gatasi ma suiga fa’afuase’i a le pulega o le toese i Tafuna.

 

Na fa’amaonia mai e se molimau fa’atuatuaina i le Samoa News e faapea, o le ali’i pagota lea na sola ese mai i le toese i le aso Faraile o le vaiaso na te’a nei, na mafua ai ona taofia asiga a aiga.

 

E pei ona taua e le molimau e fa’apea, pe tusa o le itula e 6:00 i le afiafi o le aso Faraile na te’a nei, na sola ese ai le ali’i pagota i tua. O molimau na mafai ona maua mai e Leoleo mai ni isi o uo a lenei ali’i, sa faamaonia ai le eva ma tafafao fa’atasi le alii pagota ma ana uo i le fale piliati i le latou nu’u.

 

O se taimi o le po pe tusa o le itula e 11:00 na osofaia ai loa e le ali’i pagota se faleoloa i Tafuna, ma logoina ai loa e le pule o le faleoloa le Ofisa o Leoleo mo se fesoasoani. O ata sa mafai ona pu’eina i le masini pu’e ata a le faleoloa, na faamaonia ai o le ali’i pagota na sola i tua o loo i ai lona ata i totonu o le video.

 

O le aso Toona’i na sosoo ai na toe maua ai loa le ali’i pagota na sola i tua, ma ua toe taofia nei o ia i totonu o le falepuipui.

 

Na taua e le molimau e fa’apea, o isi vaega na maua i suesuega a Leoleo, e aofia ai se pu i le pa o loo siomia ai le toese. O lo o masalomia o le pu lea na oso ai le ali’i pagota. Ae pei ona taua, o le pu lava fo’i lea na maua e Leoleo i le taimi na tula’i mai ai le fa’alavelave i le masina na te’a nei, fa’asaga i le ali’i pagota lea na sola i tua ma ia fana se ali’i i Leone.

 

E le o se taimi muamua lenei ua tula’i mai ai ni fa’afitauli i pagota e sosola i tua mai le toese. O le 2 vaiaso talu ai, na ripotia ai fo’i se ali’i pagota sa sola i tua, ma vaaia ai e tamaiti aoga o le Kolisi Tuufaatasi i le lotoa a le aoga.

 

O le vave o gaioiga a Leoleopo o le Kolisi na vave ai ona pu’e ma taofia lea ali’i pagota. Mulimuli ane taunu’u le ta’avale a Leoleo ma toe auina atu ai loa lea ali’i i le falepuipui.

 

I le masina na te’a nei, na faila ai e le malo moliaga o le sola i tua mai le toese fa’asaga i ni ali’i pagota se to’atolu o loo tuli a latou fa’asalaga. O i latou nei e aofia ai Vatia Tugaga, Jason Muasau ma Andrew Peters.

 

O loo tuuaia e le malo e fa’apea, o le aso 6 Iulai 2018 na sosola ai i tua i latou nei, ma latou fa’atinoina ai ni isi o solitulafono e aofia ai le osofaia o faleoloa.