Ads by Google Ads by Google

Talotaloga aofia ma’i Suka & Toto Maualuga DOH TOBACCO/ DIABETES

O le taeao o le aso Faraile ua te’a na poto mai ai le to’atele o i latou na auai i le fa’amoemoe e fa’alauiloa i le mamalu fegasoloa’i o le atunu’u le manulauti — “Ia Maua’a i lou Soifua Maloloina!” O se taumafaiga fo’i ina ia fa’aitiitia i latou e po’ia i le Ma’i Suka ma le Toto Maualuga i le atunu’u.

 

I lea fa’atasiga ma talotalo e fa’alauiloa lea auau, sa fa’atasia i ai ali’i fa’atonu Motusa Tuileama Nua ma le vasega o tagata faigaluega ae maise le Komiti Fa’afoe o le DOH Tobacco/ Diabetes, o i latou na sa latou una’ia malosi le pili ina ia taofia ai le ulaula tapa’a i nofoaga faitele, ma ua alo atu nei e fa’ataua tima’iga, galuega ma togafitiga ua mafai ai ona soifua le mamalu o le atunu’u ma o latou gasegase tumau.

 

O le amataga lenei o le fa’amoemoe e fa’alauiloa le latou taumafaiga, ia fa’amasani i latou o lo’o ua po’ia i ma’i tumau, ina ia maua’a i lo latou soifua maloloina, ia mafai ona ola pea ma togafitia lelei lo latou gasegase tumau ua i ai.

 

O nisi sa auai i lenei taumafaiga e aofia ai le TAOA ma le latou fa’atonu, le faletua o Evelyn Satele Lili’o o Tama ma Tina Matutua isi nei fo’i e matua tima’ia e le polokalama lenei ina ia fa’aumiumi mafutaga ma aiga, ia iloa fo’i ona tausisi i tima’iga mai foma’i, ae maise o le tausami i mea taumafa paleni ma le fa’amalositino e fa’aalu ai le afu, o mea na e mafai ai ona soifua ma lou gasegase tumau.

 

Ole aso Lua, Novema 12, o le a amatalia ai le fonotaga fa’apitoa e faia ma le au fa’asalalau i le Tradewinds Hotel ina ia fa’alauiloa atili ai lenei fa’amoemoe ma e tolu aso soso’o o le a fa’atautaia ai lea semina i le Tradewinds i Tafuna.

 

O le fa’aiuga o le masina i lona toe vaiaso e malaga ai le Koalisi atoa i o latou sui iloga i le Ofisa ina ia fa’alauiloa lea lava fo’i fe’au taua mo le mamalu o e o lo’o alaala i le Manu’atele. E fa’amae’a mai ai i le Manu’atele le masina atoa e taualoa ai gasegase tumau ua po’ia ai le mamalu o le atunu’u, ina “Ia Maua’a i lou Soifua Maloloina.”