Ads by Google Ads by Google

Talosagaina fesoasoani a le US Army Corps mo le uafu i Ta’u, Manu’a


[ata: foa'i]

Ona o tulaga fa’aletonu o le uafu i Ta’u, Manu’a o lea ua tuuina atu ai se talosaga a le Maota Maualuga i le vaega fetarale, U.S. Army Corps of Engineer i Honolulu, ina ia lipea vave le Uafu i Ta’u mo le saogalemu o tagata Manu’a.

 

O lea talosaga sa auala mai i se Iugafono a le Maota Maualuga sa fa’auluina e le afioga i le senetoa mai Manu’a, Nuanuaolefeagaiga Saoluaga Nua.

 

E pei ona taua i le iugafono, e le o mafai e le uafu i Ta’u ona tuta ai o ni va’a tetele e pei o le MV Sili ona e le lava le loloto. O lea la e fa’amalosia ai le MV Sili ma isi va’a tetele e taula i gatai atu, e le o’o i le uafu. O pasese ma uta e la’u e alia, ae a sou le sami, agi malosi le matagi ma timuga ona matua le sefe lava lea o lenei faiga.

 

“O se mea tatau lava le fa’asaogalemuina o le uafu ma fa’aloloto ina ia mafai ona tuta i ai le MV Sili,” o se vaega lea o le Iugafono. “Ua manaomia le fa’aloloto o le alava’a ina ia fa’alautele ai foi ma le ava mo va’a e sao atu i totonu ma toe eli totonu o le uafu ina ia lava le loloto.”

 

E le gata i lea, “ua mo’omia foi le fa’aumi atu o le taligalu ia o o i le mea e pau mai ai le a’aau e fesoasoai ai e taofi le o’o mai o le galu,” o se vaega o fa’amatalaga i le Iugafono. “O fa’avae pousima foi o le uafu ua fa’asolo ina ‘aia ma ua aliali mai u’amea e foliga mai ua le o toe mamao ae pa’u le uafu.”

 

Saunoa le afioga i le senetoa ia Nuanuaolefeagaiga e fa’apea, “ua loa ona mafatia Manu’a mai matagi, o le sousou o le sami ma le le tausia lelei o le uafu i Ta’u. O se mea ua alagatatu le faia o se faiga e fo’ia ai nei fa’aletonu ma toe faia fa’alelei le uafu ina ia tulaga saogalemu ai.”

 

O kopi o lenei iugafono ua atuuina atu i le U.S Army Corps, afigoa i le koana Lolo Matalasi Moliga, ma le faipule o Amerika Samoa i le Konekeresi, le tofa Aumua Amata.

 

E fia fa’ailoa atu e le Samoa News, ua tele tausaga o taumafai le malo mo se alagatupe e toe fa’alelei ma eli fa’aloloto le uafu i Ta’u, ona o tulaga fa’aletonu o lo’o i ai nei.

 

I le taimi nei lo’o fa’aaogaina le uafu i Faleasao mo le mamalu o le atunu’u i le motu o Ta’u i Manu’a.