Ads by Google Ads by Google

Talosaga Siaumau i le Fa’amasinoga mo sona fa’amasinoga fou


[ata: foa'i]
ausage@samoanews.com

Ua taoto atu nei i se faaiuga a le Fa’amasinoga Maualuga le talosaga na faaulu e le susuga a Thomas Siaumau ma lana loia i le vaiaso na te’a nei, e talosagaina ai le Fa’amasinoga mo se avanoa e faia ai se isi fa’amasinoga autu fou a Siaumau.

 

O mau na folasia e le itu a Siaumau i luma o le fa’amasinoga, o lo o lagolagoina ai le latou fa’afinauga atoa ai ma lo latou talitonuga, o mau fou nei e alaga tatau ai ona faia se fa’amasinoga fou.

 

O le masina na te’a nei na lau ai le fa’asalaga a Siaumau, e nofosala i le toese i Tafuna mo le 30 tausaga, ina ua ta’usala o ia e le vaega iloilo iuga i moliaga eseese e 7, lea na mafua mai i le fa’alavelave lea na ia tafana ina ai se ta’avale Leoleo i le po o le aso 14 o Tesema 2017 i tua o le Malae Baseball i Tafuna, a o i ai se Leoleo i totonu o le ta’avale.

 

O le ali’i loia ia Daniel Holladay mai le Ofisa Loia a le RDA na tula’i mo Siaumau, ae o tama’ita’i loia sili lagolago e to’alua ia Christy Dunn ma Laura Garvey na fai ma sui o le malo i lenei mataupu.

 

O le vaiaso na te’a nei na finauina ai e Siaumau ma lana loia lenei talosaga i luma o le fa’amasinoga. E 3 molimau na valaau e le itu a Siaumau. O ia molimau e aofia ai Rosita Fepulea’i, o le tina lea o le molimau autu a le malo i le taimi o le fa’amasinoga a Siaumau i le masina o Mati na te’a nei; o le ali’i Leoleo ia Raymond Faiilagi, ma le tama’ita’i ia Lapu Laufiti Savelio, o se sui o le Ofisa Loia o le RDA.

 

O molimau na valaauina e le itu a Siaumau, sa latou taumafai e faailoa i le Faamasinoga, e i ai mau faamaonia fou e le i mafai ona faailoaina i le taimi o le fa’amasinoga autu a Siaumau, ma o mau ia ua alaga tatau ai se isi poloaiga a le Faamasinoga ina ia faia se faamasinoga fou.

 

MOLIMAU A ROSITA FEPULEA’I.

 

Na taua e Fepulea’i i lana molimau e fa’apea, e le sa’o le molimau a lana tama o Josaiah Makulino lea sa avea ma molimau autu a le malo i le fa’amasinoga a Siaumau, fai mai sa ia vaai tino lava o fana e Siaumau le ta’avale Leoleo.

 

Na faailoa e Fepula’i, e lei i ai Makulino i le nofoaga na tula’i mai ai le fa’alavelave i le po o le aso 14 o Tesema 2017, ae sa i ai lava o ia i le latou fale i le po atoa lea. O le fa’amaoniga o lea tulaga e pei ona molimau Fepulea’i, sa fai le latou ta’aloga Bingo i le po lea ma Makulino ma isi uma tagata o le latou aiga.

 

Na taua atili fo’i e Fepulea’i e fa’apea, i le aso 15 ma le 16 o Tesema o le tausaga lava lea, na la o ai ma lona to’alua i le Ofisa o Leoleo i Tafuna, ma la talanoa i Leoleo e fa’atatau i le pepelo o le molimau a Makulino ua tuuina atu ia tei latou e tusa ai o le fa’alavelave sa tula’i mai.

 

O le ali’i Leoleo ia Savelio e pei ona taua e Fepulea’i i lana molimau, sa ia faamatalaina i ai le pepelo o le faamatalaga a lana tama lea ua tuuina atu i Leoleo.

 

Na taua fo’i e Fepulea’i lona talanoa i se tasi o loia mai le Ofisa Loia a le RDA e tusa ai o lenei mataupu.

 

Na fesili Garvey i le molimau, pe sa i ai lona igoa i le lisi o molimau a le itu a Siaumau i le taimi na fa’agasolo ai le fa’amasinoga, na tali le molimau, ioe.

 

Na toe fesili le loia a le malo i le molimau, pe aisea na le valaauina ai o ia e molimau mo le itu a Siaumau, na tali le molimau, e le i fa’atagaina o ia e le fa’amasinoga e molimau, ona o le tele o taimi sa i ai o ia i totonu o le potu fa’amasino i le taimi a’o fa’agasolo le fa’amasinoga.

 

MOLIMAU A FAIILAGI

 

Na taua e Faiilagi i lana molimau e fa’apea, na te manatuaina le taimi na o atu ai Fepulea’i ma lona to’alua i le aso 15 o Tesema 2017 ma talanoa atu ia te ia, i le pepelo o le molimau a Makulino sa tuuina atu i Leoleo.

 

I le latou talanoaga, na taua e Faiilagi ma faailoa atu e Fepulea’i ia te ia, e pepelo le molimau a Makulino ua tuuina atu i Leoleo.

 

Na logo e Faiilagi isi Leoleo e tusa ai o le faamatalaga a Fepulea’i, ma aga’i atu ai loa le Leoleo e to’atasi i totonu o le potu o loo i ai Makulino e talanoa i ai. I se taimi mulimuli ane, na toe suia ai loa le fa’amatalaga a Makulino e tusa ai o le fa’alavelave na aafia ai Siaumau.

 

Na fesili Faiilagi ia Makulino pe aisea ua sui ai lana fa’amatalaga sa tuuina atu muamua, ae na tali Makulino, ua mafua ona e alofa i lona Tina.

 

Na taua atili e Faiilagi e fa’apea, sa ia fesili ia Fepuleai e faatatau ia Makulino, ma faailoa sa’o atu ai loa e Fepulea’i lona loto, e le mana’o e molimau lana tama i le fa’amasinoga a Siaumau.

 

Na taua atili fo’i e Fepulea’i i lana molimau, o ia ma lona aiga e nonofo i le fale mautotonu a matua o Siaumau i Petesa.

 

MOLIMAU A SAVELIO

 

Na taua e le tama’ita’i o Savelio i lana molimau e fa’apea, ina ua maua e le latou itu le lisi o molimau a le malo, sa faatonuina ai loa o ia e amata ona ia fesoota’i i molimau ma fesiligia e tusa ai o le fa’amasinoga a Siaumau.

 

E na o Makulino lava le molimau e lei mafai e Savelio ona maua, ua fiu e fesoota’i i ai ae ua le mafai lava ona ia maua. Mulimuli ane maua le tala, o Makulino o loo i lalo o le vaavaaiga faapitoa a Leoleo, ona o le taumafai e puipui o ia mai le ono suia lea o lana fa’amatalaga e tusa ai o le fa’alavelave sa tupu.

 

FAAFINAUGA FAAI’U

 

Na taua e Holladay i lana faafinauga faai’u e fa’apea, o mau ua folasia e le latou, ua lava ma totoe e lagolagoina ai le tatau lea ona toe faia se isi fa’amasinoga fou a Siaumau.

 

E le gata sa faailoa e Fepula’i i Leoleo le pepelo o le fa’amatalaga a Makulino, ae lei faailoa atu fo’i e le malo i le latou itu le taimi na toe sui ai le fa’amatalaga a Makulino. E oo fo’i i le leai o se avanoa na fesiligia ai e le itu a Siaumau le molimau autu a le malo, o le isi lea tulaga e talitonu le itu tete’e, e tatau lava ona silasila toto’a i ai le fa’amasinoga mo sana faaiuga.

 

Na finau Holladay e fa’apea, latou te lei iloaina na i ai Makulino i lalo o le vaavaaiga faapitoa a Leoleo, atonu o le mafu’aaga lea na fiu ai le latou ofisa e tau saili o ia mo se avanoa e faatalatalanoa ai.

 

Na tete’e malosi le itu a le malo i le talosaga a Siaumau. Na taua e Garvey e fa’apea, o mau ia ua faailoa e le itu tete’e, e le o ni mau fou, e le tatau fo’i la ona taliaina le latou talosaga mo se fa’amasinoga fou.

 

O afioga i ali’i Fa’amasino Lagolago ia Mamea Sala Jr ma Tunupopo Alalafaga na lagolago i le afioga i le Fa’amasino ia Sunia i lenei mataupu.