Ads by Google Ads by Google

Talosaga se ali’i pagota i le fa’amasinoga e toe iloilo lona fa’asalaga


[ata: foa'i]
ausage@samoanews.com

O le ali’i pagota lea o loo tuli sona fa’asalaga fa’a falepuipui e 15 tausaga le umi, e mafua mai i le fa’alavelave lea na ia faia ai uiga mataga le taupulea i lona afafine fai e 15 tausaga le matua, ua ia talosaga i le Fa’amasinoga Maualuga e fa’aleaoga lana faaiuga ua mae’a ona tuuina atu ia te ia, ae toe iloilo lelei se isi fa’aiuga talafeagai.

 

O le vaiaso na te’a nei na fofogaina ai i luma o le fa’amasinoga le talosaga a le ali’i o Wayne Otto Smith. O le ali’i loia ia Thoman Jones mai le Ofisa Loia a le RDA Law Firm sa tula’i mo ia, ae o le tama’itai loia sili lagolago ia Christy Dunn na tula’i mo le malo.

 

O le afioga i le ali’i Fa’amasino Sili ia Michael Kruse, ma ana Fa’amasino Lagolago ia Faamausili Pomele ma Muasau T. Tofiili sa tuuina atu le fa’asalaga o Smith, o i latou fo’i ia sa fa’afofogaina le talosaga a lenei ali’i i le vaiaso na te’a nei.

 

Na taua e le ali’i loia ia Jones i le fa’amasinoga e fa’apea, o le faafinauga a le malo i le aso na lau ai le fa’asalaga a Smith ina ia fa’asala le ua molia i le fa’asalaga pito maualuga o loo faatulaga mai e le tulafono, ua atagia mai ai lo latou faia o se mea sese.

 

Na taua e Jones e fa’apea, i tuutuuga o le maliliega sa sainia e Smith ma le malo, sa malie ai le malo o le a latou le finau mo le fa’asalaga pito maualuga o loo fa’atulaga mai e le tulafono.

 

Na tete’e le loia a le malo i le faafinauga a Jones. Na taua e Dunn e fa’apea, e leai se folafolaga a le malo sa faia i totonu o le maliliega ma Smith, o le a latou le finau mo le fa’asalaga pito maualuga.

 

Na taua e Dunn le manino o la talanoaga ma le ali’i loia ia Richard deSaulles (o le isi fo’i lea loia a Smith) i luga o le imeli, lea sa ia faailoa i ai, e ono finau le malo mo le fa’asalaga pito mamafa. Na taua atili e Dunn e fa’apea, sa fesili atu deSaulles ia te ia poo le a le ituaiga fa’asalaga lea ua fuafua le malo e talosagaina mo Smith.

 

I le talitonuga a Dunn, e le tatau ona aofia talanoaga i luga o imeli i le taimi e iloiloina ai mataupu tau fa’asalaga a le fa’amasinoga.

 

Na faaiu le faafinauga a Dunn i lona talosagaina lea o le fa’amasinoga ina ia teena le talosaga a le itu tete’e.

 

A o lei faia le faaiuga a Kruse e tolopo ai le mataupu a Smith, sa ia faailoa nisi o fa’amatalaga sa faia i le aso na tali ioe ai Smith i le moliaga e pei ona ta’usala ai o ia.

 

Saunoa Kruse e fa’apea, i le aso na tolaulauina ai le tali ioe a Smith, e le gata sa fa’atautoina o ia e le fa’amasinoga, ae sa i ai fo’i fesili na fesiligia ai o ia e le fa’amasinoga e tusa ai o lana tali ioe ua tuuina atu. I le talitonuga o le fa’amasinoga, sa malamalama lelei le ua molia i ana tali sa tuuina atu i luma o le fa’amasinoga.

 

Sa fesiligia e le fa’amasinoga ia Smith pe ua malamalama i tuutuuga o le maliliega. Sa tali le ua molia, o lea lava.

 

Sa toe fesiligia o ia, poo aofia uma i totonu o le maliliega ua ia sainia vaega uma sa latou talanoa i ai ma le malo. Sa tali fo’i le ua molia, o lea lava.

 

O isi fesili nei sa fesiligia ai e le fa’amasinoga ia Smith. “Ua faamalieina oe i fautauga uma sa tuuina atu e lau loia ia deSaulles e tusa ai o lenei mataupu. Na tali le ua molia, o lea lava.”

 

“Ae e te lei sainia le maliliega, sa lua talatalanoa ma lau loia ia deSaulles e faatatau i tuutuuga uma o le maliliega. Na tali le ua molia, o lea lava.”

 

“Sa i ai se isi na taumafai e fa’afefe oe, pe ofo atu ni taui ina ia e sau ai ma tali ioe i lenei mataupu. Ua e malamalama i tuutuuga uma o le maliliega. E te faapea mai nei ua e nofosala i nei moliaga, ona o lou lava talitonuga o oe ua nofosala. Sa tali le ua molia, o lea lava.”

 

O le fesili taua na toe faamanatu e Kruse sa fesiligia ai e le fa’amasinoga le ua molia, o le fesili lea, “Afai matou te taliaina lau tali ioe, e te malamalama e le mafai ona e toe sau ma faapea mai e toe ave i tua lau tali ioe ua tuuina mai i luma o le fa’amasinoga. Sa tali le ua molia, o lea lava.”

 

Na toe faamanatu fo’i e Kruse i loia a itu e lua, le fesili sa fesiligia ai e le fa’amasinoga le loia a le malo i le aso na lau ai le fa’asalaga a Smith, pe mananao e faasala le ua  molia i se faasalaga faanofovaavaaia, poo le faasalaga pito maualuga. Sa talosaga le malo i le fa’asalaga pito maualuga.

 

Ua toe tolopo le mataupu a Smith, ae ua fautuaina e Kruse ia loia ina ia tuuina atu ni fa’afinauga e fa’atatau i lenei mataupu, a o le i tuuina mai se fa’aiuga a le fa’amasinoga.