Ads by Google Ads by Google

Talosaga faipule Larry Sanitoa lipoti tulaga tupe a le malo ma le ASTCA

Ina ia maua atili se malamalamaaga o afioga i faipule o le Maota Sui, o le mafuaaga lea ua talosagaina ai e le afioga i le faipule ia Larry Sanitoa lipoti o tupe a le faigamalo a Amerika Samoa, ae maise le Ofisa o Feso’otaiga (ASTCA).

 

O ia talosaga sa fa’ailoa i tusitusiga i le aso 25 o Ianuari ma tuuina atu i le ofisa o le Fono (Legislative Finance Office) - o lo’o gafa ma le vaaiga o tupe o lea lala o le malo.

 

I lipoti o tupe a le malo, sa fa’ailoa e Sanitoa e fa’apea sa saunoa ta’ita’i o le faigamalo i se taimi lata mai e fa’apea e tusa ma le $3.9 miliona o lo’o lelei ai le tupe fa’asoasoa a le malo ina ua tapunia le tausaga tupe ia te’a 2018.

 

I le tauaofiaga fa’apitoa a le Fono Faitulafono i le aso 14 Ianuari, sa fa’ailoa ai e le afioga i le Kovana Sili, Lolo Matalasi Moliga, e fa’apea e ma’ea le tausaga tupe 2018, o lo’o i ai tupe totoe a le male i lona aofaiga e $3.9 miliona e ui lava sa i ai le tele o aitalafu i tausaga tupe ua te’a.

 

O nisi o lipoti i le tala o le tupe o lo’o talosagaina e Sanitoa aofia ai le lipoti a su’etusi mo le tausaga fa’aletupe 2017; lipoti o tupe maua ma tupe fa’aalu mai le Teutupe ma le Ofisa o le Paketi mai ia Oketopa 1, 2017 e o’o atu ia Setema 30, 2018; lipoti o tupe maua ma tupe fa’aalu o le kuata muamua - Oketopa 1 e o’o atu ia Tesema 31, 2018 - o le tausaga tupe lenei 2019.

 

I le tulaga o lipoti i le tala o le tupe a le ASTCA, sa muamua ona fa’ailoa e Sanitoa e fa’apea, o le masina ua te’a sa tapunia ma fa’atauina ai e le malo - e ala i le Amerika Samoa Economic Development Authority (ASEDA) - ia pone o le 2018 i lona aofaiga e sili atu i le $50 miliona.

 

Mai lea aofaiga, e $28.8 miliona sa fa’atulaga e totogi ai aitalafu a le ASTCA i le Hawaiki Cable system.

 

Fa’ailoa e Sanitoa e fa’apea o lea vaega tupe fou ua ova atu ma le $30 miliona lea ua ma’ea ona tuuina atu i le ASTCA i lalo o se nonogatupe mai le Ofisa o le Litaea a le malo. Ma o lea nonogatupe i le lua tausaga talu ai, e ave i le Hawaiki cable.

 

E pei ona fa’ailoa e Sanitoa i lana tusi i le Ofisa o tupe a le Fono, e manaomia lava ona malamalama le Maota o Sui i le tulaga tau tupe o lo’o feagai ma le ASTCA.

 

O nisi o lipoti o lo’o talosagaina e Sanitoa, o le lipoti a su’etusi o tausaga tupe 2017 ma le 2018 a le ASTCA; lipoti o tupe maua ma tupe fa’aalu i le va o Oketopa 1, 2016 e o’o atu ia Setema 30, 2017; tupe maua ma tupe fa’aalu mai ia Oketopa 1, 2017 e o’o atu ia Setema 30, 2018; lipoti fa’apitoa o aitalafu a le ASTCA mo tausaga tupe e 2017 ma le 2018.

 

I le tauaofiaga a le Maota o Sui i le aso Tofi o le vaiaso ua te’a sa fa’ailoa ai e Sanitoa lona manaoga mo se iloiloga a le Maota o Sui e fesiligia ai sui o le faigamalo i le tulaga o le pone ma le auala e totogi ai lea aitalafu i le lumana’i. Sa ia fa’ailoa i le maota e fa’apea o lo’o maualuga se vaega tupe mai le pone ua fa’atulaga le malo e tuuina atu i le ASTCA, ona o aitalafu i le Hawaiki ma e tatau ona fesiligia nei tulaga.

 

Fa’ailoa e Sanitoa e fa’apea e silia ma le $230 miliona o le a nofo aitalafu ai le malo i le isi 20 tausaga o lumana’i ona o le pone.

 

Tali le afioga i le Fofoga Fetalai, Savali Talavou Ale, ma ia talosaga le komiti a le Maota e taga’i i lenei mataupu ma fa’atulaga se iloiloga.