O mau faamaonia na maua e le malo mai totonu o le ta’avale sa fa’afoe e Tautua Letasi i le taeao o le aso 21 o Me, 2017 ina ua taofia o ia e Leoleo, atoa ai ma isi mau fa’amaonia na maua mai i lona fale i Aoloau i le aso lea, ua lava ia e lagolagoina ai le talitonuga o le malo, o Letasi, o se ali’i sa ia tulei ma fa’atau atu fualaau fa’asaina i tagata lautele.

Ae sili atu ai i lo lena, na lagolagoina e le malo le latou mau e ala i lo latou fa’apea mai, o se tasi o fa’amaonia e iloa ai o Letasi o se tagata sa ia tulei ma fa’atau atu fualaau fa’asaina, ona sa maua fo’i ia te ia a’upega e masani ona maua mai i tagata e umia ma tuleiina atu fualaau fa’asaina.

O le ali’i Leoleo Suesue ia Det. John Paselio, o le molimau lona 3 lea na valaauina e le malo i le fa’amasinoga iloilo o le ali’i o Letasi, lea o lo o molia i lona umia faasolitulafono o vaega o le pauta fa’asaina o le aisa ma le mariuana, ma le fa’amoemoe e tulei ma fa’atau atu i isi tagata. O lo o tu’uaia fo’i o ia i lona umia o ni aupega e le i lesitalaina.

O le ali’i loia fautua lagolago ia Ryan Anderson o lo o tula’i mo Letasi, ae o le ali’i loia sili lagolago ia Woodrow Pengelly o lo o tula’i mo le itu a le malo.

E to’a 6 sui o le vaega iloilo iuga na filifilia i le aso Gafua o le vaiaso nei latou te fa’afofogaina mau fa’amaonia o lenei mataupu. O le to’a 3 o i latou o tama’ita’i ma le to’a 3 o ali’i.

Na taua e le ali’i Leoleo Suesue ia Paselio i lana molimau e fa’apea, o mau fa’amaonia sa maua i totonu o le ta’avale na fa’afoeina e Letasi e aofia ai se fana, ma se ato fa’afafa na maua i ai se vaega tele o fualaau fa’asaina o le aisa ma le mariuana. Sa faapea fo’i ona maua i ai ma vaega e fa’aaoga e i latou mo le tuleiina atu o le aisa ma le mariuana i tagata lautele.

E 4 pepa iila feololo sa maua i ai se vaega tele o le pauta o le aisa. Sa fa’apea fo’i ona maua i ai ma ni tama’i taga pepa iila se lua e tai foliga o se stamp lona lapo’a, ua uma ona utu ai i totonu vaega o le pauta fa’asaina.

E 3 pepa iila feololo sa maua ua uma ona utu i ai lau lanumeamata o le mafiuana. Sa faapea fo’i ona maua i ai ma se sikaleti mariuana se tasi.

Na fesili le ali’i loia ia Pengelly i le molimau, poo le a se eseesega o fualaau fa’asaina sa latou maua mai le ta’avale a Letasi, ma fualaau fa’asaina e masani ona latou maua mai isi a latou osofaiga.

Na taua e Paselio e fa’apea, o le tele o osofaiga a Leoleo sa masani ona auai atu i ai, e fa’aiu lava i le molia o se tagata i lona umia fa’asolitulafono o fualaau fa’asaina. O fualaau fa’asaina fo’i e maua i ia tagata, e atagia mai ai o fualaau faasaina lea e fa’aaoga mo i latou lava. E mafua lea tulaga, e na o le tasi lava se tama’i pepa iila e maua i ai vaega o le pauta fa’asaina, atoa ai ma se paipa e ula ai le aisa e maua i lea tagata.

Ae o le mataupu a Letasi, ua lava ma totoe mau fa’amaonia sa maua ia te ia e atagia mai ai, na te le o fa’aaogaina fualaau fa’asaina nei mo ia lava, ae sa ia umia ma le fa’amoemoe e tulei ma fa’atau atu i isi tagata.

Na fesili le loia a le malo i le molimau, pe aisea e umia ai e tagata o loo faatauina atu fualaau fa’asaina ia a’upega malolosi, na tali le molimau, e le gata e puipuia ai i latou, ae o ni isi o nei aupega e avatu e tagata ina ia fa’afesuia’i ma fualaau fa’asaina.

O lo o fa’aauau pea i le vaiaso nei le mataupu fa’asaga ia Letasi.

O le afioga i le ali’i fa’amasino sili ia Michael Kruse o lo o taulimaina lenei mataupu, i le lagolagosua a afioga i ali’i Fa’amasino Lagolago ia Fa’amausili Pomele ma Muasau Tasina Tofili.