Ads by Google Ads by Google

Talitonu Gafatasi ua tatau ona tumaoti le puleaina Fale Televise a le malo


Le afioga i le ali’i Faipule mai le Itumalo o Leasina ia Gafatasi Afalava. [ata : AF]
ausage@samoanews.com

O le iloiloga a le Komiti o le Faagaioiga o le Malo a le Maota o Sui i le vaiaso na te’a nei, ma le Pulega a le Fale Televise a le malo, e talanoaina ai le mafua’aga ua le mafai ai ona toe pu’e sauniga lotu i tua i afioaga, na sauoa manino ai loa le afioga i le ali’i Faipule ia Gafatasi Afalava e fa’apea, ua tatau ona tuu atu le Fale Televise e pulea e se kamupani tumaoti, ina ia mafai ai ona si’itia ma fa’aleleia le auaunaga.

 

O le afioga i le Fa’atonusili o le Fale Televise ia Tuimavave Tauapa’i Laupoloa ma ona sui lagolago e to’alua ia Tiaaluga Vince Iuli ma le Faletua ia Tautinei Misioka Olo na auai i le iloiloga.

 

O le mataupu sa autu i ai le iloiloga, o le fia malamalama lea o le maota i le mafu’aaga ua le mafai ai ona toe pu’e sauniga lotu a Ekalesia i tua i malumalu, ae ua pu’e tasi uma lava i le nofoaga autu o le Fale Televise i Utulei.

 

O le afioga i le ali’i faipule ia Gafatasi na ia lagaina lenei mataupu, ona o se fesili na fa’atula’i e lona itumalo aemaise ai le Ekalesia, i le mafua’aga ua faia ai nei suiga. Saunoa Gafatasi i le aso na ia fa’aalia ai lenei mataupu e fa’apea, e talitonu lava lona itumalo faapea le Ekalesia, e mamalu lava sauniga lotu i Aso Sa pe afai e pu’e i tua i malumalu o afioaga, nai lo le fa’aaoga o le nofoaga autu o le Fale Televise.

 

Na faamalulu Tuimavave i le komiti ona o suiga i le auaunaga a le Ofisa ua mafua ai le iloiloga, ae o le suiga ua i ai nei, na afua mai lea i se fautuaga mai le afioga i le ali’i Kovana ia Lolo Matalasi Moiiga, sa faia ona o ni fa’afitauli na alia’e mai i se taimi ua tuana’i.

 

Na taua e le Fa’atonusili e faapea, sa i ai sauniga lotu atoa ai ma isi polokalame na malaga lana aufaigaluega e pu’e mai tua i afioaga, ae ina ua taumafai e toe ki le lipine mo le siakiina o le polokalame, na iloa ai, e le o maua le sauniga sa pu’eina.

 

Mo se faata’ita’iga e pei ona saunoa Tuimavave, na pu’eina le sauniga lotu a le Ekalesia EFKAS i Nua ma Seetaga, ae ina ua siaki le lipine na iloa ai e le o maua le sauniga lotu. Sa pu’eina fo’i le sauniga lotu a le Ekalesia EFKAS i Pago Pago, ae siaki atu fo’i le lipine e le o maua fo’i le polokalame atoa.

 

“Sa i ai fo’i le sauniga lotu sa pu’eina i Aunu’u ae ina ua siaki le lipine na iloa ai e le o maua le polokalame atoa, e fa’apena i le sauniga lotu sa pu’e i Fitiuta i Manu’a a le Ekalesia EFKAS, faapea ai le polokalame a le Humanity sa faia i le malumalu o le Ekalesia Metotisi i Nu’uuli, e le’i maua fo’i le polokalame sa pu’eina,” o le saunoaga lea a le ali’i Faatonu.

 

E ese mai i fa’aletonu i masini pu’e ata, e i ai isi fa’aletonu na tutupu ao faagasolo le auaunaga a le aufaigaluega e pei ona taua e Tuimavave.

 

Mo se faataitaiga o ia faaletonu o le faafitauli lea na tula’i mai i le taimi na pu’e ai mafutaga a autalavou a le Katoliko i le masina o Tesema na te’a nei, lea na motusia faafuase’i le pu’eina o le polokalame ina ua taumafai le Ta Piano a le isi autalavou e se’i ese le uaea o lana piano, ae se’i fa’atasi atu ai ma le uaea o loo fesoota’i ai masini pu’eata, ma i’u ina motusia ai le pu’eina o le polokalame.

 

O taimi uma lava e fa’aletonu ai le pu’eina o faigalotu a Ekalesia i tua i nu’u, e toe valaau ai lava le Faifeau ma le Ekalesia ina ia toe oo atu i le nofoaga autu i Utulei mo le toe pu’eina o le latou faigalotu.

 

Mai nei mau faafitauli e pei ona taua e le ali’i Fa’atonusili, na mafua ai loa ona fesiligia se fautuaga mai le Kovana i se gaioiga e tatau ona faia ina ia taofia ai le toe tula’i mai o ni isi faaletonu i le lumana’i.

 

“O le fautuaga la a le afioga i le ali’i Kovana, ia aumai loa sauniga lotu o Aso Sa e pu’eina uma i le nofoaga autu o le Ofisa i Utulei, ina ia taofia ai le toe tula’i mai o nisi lava fa’afitauli i le lumana’i,” o le saunoaga lea a Tuimavave.

 

Ina ua fesiligia poo i ai se Inisinia faapitoa e galue mo le fa’aleleia o masini, na saunoa le ali’i Fa’atonusili, e le o i ai se Inisinia i le taimi nei, se’i vagana ai lava tagata faigaluega o lo o i ai le potu masani i le fa’aleleia o masini o loo maua mai ai le fesoasoani. Ua fiu fo’i e fa’asalalau le avanoa mo se Inisinia ae lei maua lava, ona e fai lava si taugata o le totogi, ae le o lava se tupe a le Ofisa e fa’atino ai lea manaoga.

 

Saunoa le Sui Fofoga Fetalai ia Fetu Fetui Jr, e lagona lona faanoanoa i le tulaga o loo i ai le Fale Televise, na muamua faatu nai lo televise i Samoa, ae o le taimi nei, ua sili atu le manaia o auaunaga a kamupani televise i Samoa nai lo tatou iinei.

 

I le faafofoga ai o le komiti i le folasaga a le ali’i Faatonu i le tele o le mau fa’afitauli sa tutupu i le auaunaga a le Ofisa, na fesili ai loa Gafatasi, po ua i ai se gaioiga ua faia ina ia foia ai le fa’afitauli.

 

“E le o se Fale Televise fa’atoa tatala ananafi e faigata ai ona iloa mea o loo faaletonu, ua leva na tatau ona silafia auala e foia ai faafitauli o loo tutupu. Ua savali i le 3 tausaga o lau nofoaiga ao lea lava e faaletonu. O le mea moni lava, o taimi o fa’afitauli ma fa’aletonu e iloa ai le Ta’ita’i mata’ala ma le mata’alia. E tula’i ma saili auala e foia ai fa’afitauli o lo o tutupu.”

 

“O lea ua e fai mai e leai se Inisinia e faia masini, ae o le a lau mea o loo fai ae le su’e mai se Inisinia. Afai ua le mafai lava ona foia nei faafitauli, e sili ai loa pe a tapuni le Fale Televise.”

 

“O lau vaai i le tulaga o loo i ai la outou tautua, e le i taitai sogi sogi outou i se mea e ta’u o se Fale Televise, e mafua mai, ua to’atele naua tagata faigaluega ae leai ni galuega o faia. O la’u fautuaga sa’o lea o le a tuu atu, afai ua le mafai e le malo ona faatino le auaunaga tau televise, e sili ai loa pe a tuu atu i se kamupani tua latou te fa’afoeina le fale televise a le atunu’u.”

 

Saunoa Gafatasi e fa’apea, o le isi itu e le o tulaga lelei i le tautua a le fale televise, o a latou polokalame. O polokalame lava ia na fa’aali i le isi vaiaso, lea fo’i ua toe fa’aali i le isi vaiaso, o le mafua’aga lena ua le toe matamata ai lava i polokalame a le tatou fale televise, ae ua totogi lava lana cable e matamata ai.

 

Sa ia taua fo’i e fa’apea, e sili atu le manaia o sauniga lotu o lo o pu’e e se alii pu’e ata o loo fealua’i i tua i afioaga e pu’e sauniga lotu a Ekalesia, ona ave lea fa’asalalau e le fale televise a le atunu’u, ma ua molimauina fo’i le talafeagai o le tupe o loo totogi e ekalesia i lea ali’i ma le tulaga manaia o lana tautua o lo o i ai.