Ads by Google Ads by Google

Talimalo Amerika Samoa fonotaga US Coral Reef Task Force


Sei va'ai i le gataifale o Afonotele, o nisi o ata sa mafai ona maimoaina ma le mo'omo'o o le au usugafono o lenei tausaga a le US Coral Reef Task Force i le matagofie ma le lafulemu o le gataifale o lea fo'i afio'aga, o lo'o mana'omia pea ona fa'asao mo a taeao. [ata: Leua Aiono Frost]

O le vaiaso lenei, sa talimalo ai Amerika Samoa ae maise fo'i o le National Marine Sanctuary, DMWR fa'atasi ma latou pa'aga o lo'o nafa ma le puipuiga, o ‘aau ma amu o le gataifale i le fonotaga a le US Coral Reef Task Force.

 

E silia ma le 50 sui usufono mai Amerika ma ona teritori sa au ai i le fonotaga, lea na tapunia i le aso ananafi. O nisi o le au usufono sa malaga i Manu’a i le fa’aiuga o le vaiaso ua te’a, e matamata i 'amu tetele o lo'o i gataifale o Ofu ma Ta’u.

 

O le naunau tele o lenei aumalaga e fia pa'i ma maimoa tonu i nei 'amu ua a'ave atu ona tala, sa maua ai le avanoa e malaga uma ai le to'a 12 o nisi iloga i le Manu'atele mo lea maimoaga taua.

 

"Ua matou fa'alogo i tala, ua matou faitau i ai, ma matamata i ata na lomia ma ata fa'asolo, ae le tusa ma mea ua matou va'ai i ai. Matagofie tele 'amu i Ofu Manu'a,” o se tala lea a le ali'i o David G Delaney PhD, Program Specialist Coral Planner i le Department of Land & Natural Resources a Hawaii.

 

O le aso Faraile lea na tu'ua ai e le aumalaga fia maimoa i le 'amu ma a'au o Manu'a le tatou motu nei ae faimalaga uma i Ta'u ma Ofu, ma toe taliu mai ai i le aso To'ona'i nisi a'o nisi sa fa'ato'a taliu mai i le aso Sa i le taeao, ae aoauli ai faia le fiafia i le 2Dollar Beach i Alega, lea na fa'ia ai se tasi o le tatou Komiti Faafoe o le Coral Task Force, le susuga le Fa'atonu o le Matagaluega o Si'omaga o Amerika Samoa, Ameko Pato.

 

Fa'afetaia fo'i lana tautua, aua e le o se tautua e fa'atemeteme i so'o se taimi e fa'amatu'u atu ia ia te ia ni na tiute fa'atino, ua iloga lana tautua matavela e ala i lana matagaluega ma ona faiva fa'atino mo le atunu'u i so'o se mea e vala'auina e fa'ataunu'u.

 

I le fonotaga fo'i lenei, e tele sona sao sa tatau ona fa'atino ai, peita'i ua afemoe ona faiva, ae iloga pea lana tautua i mea sa ia mae'a tapena mo lenei taligamalo. Sa i ai fo'i se taimi atofa i le fonotaga atoa lenei i le toe taeao o le fonotaga, sa latou manatua ai Ameko Pato, i lana fa'asoa i le Komiti fa'afoe, ae maise o le fa'atinoga o ona tiute, ma ona uiga tausa'afia. O se uo mamae fo'i ia i latou. "Ua vala'auina e malolo, a'o faia lava ona tiute e tatau ona fa'atino. Fa'afetai Ameko Pato mo lau tautua ma lou sao i lenei Komiti." O se tala lea a le sui na tula'i mo le fa'alauiloaga o le latou taimi to'afilemu e manatua ai o ia i le tauaofiaga lona 40 o le fonotaga a le US Coral Reef Task Force.

 

I le aso Gafua sa fa'atautaia pea fonotaga a komiti laiti AIC i le faletalimalo o le Sadies ae tatalia ai le asiasiga o le Land Grant i le Kolisi Tu'ufa'atasi o Amerika Samoa i le aoauli ma toe taliu mai i le fonotaga fa'ai'ua le AIC a'o le'i amatalia le fonotele i le Aso Lua pe a mae'a le 'ava o feiloa'iga' na tapena i ai le Malo. O le fonotele e tauaofia lea i le Gov. Rex Lee Auditorium i Utulei, i le mae'a o le ava o le usu fa'aaloalo a le Malo e talia ai le 'au usufono malaga mamao mai.

 

I le ava o le feiloa'iga sa auai le afioga le Sui Kovana e avea ma sui o le Faigamalo, le Ofisa o Mataupu Tau Samoa sa latou fa'atautaia lea 'ava o fa'aaloalo, ma agaia fo'i e i latou. O le tama'ita'i Tausala Lalelei o le Pasefika, o le tausala lelei fo'i o Amerika Samoa 2017-18 Matauaina Gwendolyn Toomalatai sa ia paluina le 'ava.

 

Na mua'i tapa ipu le ali'i Sinia o le Matagaluega o le Initeria, Nikolao Pula, le sa alaala fo'i i matua tala o le aumalaga, soso'o ai ma le Ipu a le afioga le Lutena Kovana Lemanu Peleti Mauga.

 

Sa afifio fo'i le Failautusi o le Ofisa o Mataupu Tau Samoa le afioga le Ma'oputasi Mauga Asuega, afifio fo'i le Toafiaoali'i Alo Stevenson o Kovana Itumalo ma le pa'ia maualuga i Fa'asuaga o Falelima ae maise le pa'ia o Pulenu'u ma Leoleo afio'aga i lea lava 'ava fa'aaloalo.

 

I le aumalaga sa latou talia fo'i a latou ava, le tama'ita'i o Patricia Montanio le Director of Habitat Conservation, Dept of Commerce. Tapa fo'i le ipu a le tama'ita'i o Deana Funderburk, Deputy Assistant Secretary of the Army, Michael Stoker - Region 9 Administrator of the US Environmental Protection Agency ma Steven Tucker Deputy Chief for Marine Protected Resources.

 

O le aso Lua loa sa talanoaina ai le aotelega o poloketi o lo'o fa'atautaia i so'o se vaipanoa o setete uma ma teritori o Amerika o lo'o aofia i le va'ava'aiga malu a lenei Komiti.

 

O galuega toe fa'aolaola lelei o le 'amu ua afaina ona o tulaga o suiga tetele o le tau o lo'o ua aofia fa'atasi uma ai atunu'u eseese ma le Iunaite Setete ma ona teritori, fa'apea ma isi poloketi o lo'o fa'atautaia i le tatou fo'i malo e taofiofi ai le tele o sologa i le talafatai o le atunu'u e maulalo ma e atiatia lava lona apitagalu e galu fafati malolosi i taimi uma, ae maise o isi poloketi tau le fa'asoasoaina o le so'ona fa'aaoga pe fagota o i'a mai le sami.

 

Na fa'afofogaina le tele o mau sa fa'aalia, na fa'afesiligia fo'i le tulaga o i ai galuega ma latou ala o fa'atupega po'o sologa lelei mea uma. Ua taua'aoina fo'i lipoti ta'itasi mai malo ta'itasi ina ia mafai ona fa'aalia i ai taofi o le Komiti lenei, pe toe siakia fo'i po'o talafeagai le faatupega ma galuega ua mae'a fa'atino o nei poloketi uma.

 

Ua aofia i nei toe siakiga le tulaga o MPA po'o vaega o le gataifale o lo'o taofia le fagotaina mo se vaitaimi ae tu'u se'i toe fa'ateleina le i'a ona toe tatala lea mo fagotaga.

 

O le poloketi tau toe fa'aolaola le 'amu o le gataifale, sa matua mata'ina ai le folasaga na tapena i ai le tama'ita'i o Andra Samoa ma le aumaga atoa i Leone. O i latou ua atoa nei le tolu tausaga talu ona toe fa'aolaola le 'amu fou ma e mataituina lava e le matagaluega o le DMWR i tausaga ta'itasi po'o a mai le olaola o lea galuega fa'atino.

 

O le afuaga o le mafuli o lea afio'aga ina ia toe fa'aolaola le amu, ona e tetele afaina o le latou gataifale ma ona sosia i le vaitau na a'afia ai i le Tsunami 2009.

 

O le isi mataupu o lo'o ogaoga nei i tulaga o le amu ma a'au, o le tulaga lea o va'a o pa'ulia ma le toe mafai ona ave'esea vave a'o le'i a'afia tele amu o le a'au o lo'o pa'ulia ai. E lua va'a o lo'o tumau pea i nofoaga sa pa'ulia ai, tasi i Leone ma le tasi i Nuuuli, i gataifale o Coconut Point.