Na talia e le aiga potopoto o le tama’ita’i o le Vasega 8 mai le Aoga a Pava’ia’i Elementary School lea na maliu ina ua malemo i le vaiaso na te’a nei, le ifoga a le Puleaoga ma Faiaoga, peita’i sa toe fa’afo’i le meaalofa e aofia ai le ie toga ma le seleni.

“O le agaga atoa o le aiga, ia matou talia le ifoga ona o i matou fo’i o tagata Kerisiano e malamalama i le loto fa’amagalo, ae o meaalofa sa tuuina atu e le aoga, sa toe fa’afo’i e lo matou aiga, ona o lo matou talitonuga, e le fa’atauina le ola o si o’u afafine i ni tulaga fa’apea.”

O le saunoaga lea a le Tama ia Sililo Toese i se feiloaiga ma le Samoa News i le vaiaso nei, e tusa ai o le fa’alavelave ua mafua ai ona motusia le mafutaga ma si ona afafine matua, ona o le fa’alavelave e pei ona malemo ai i le taelega i le Pala Lagoon i le aso Lulu o le vaiaso na te’a nei.

O le ulua’i taimi lea ua mafai ai ona maua se feiloaiga a le Samoa News ma se tasi o matua o le tama’ita’i o Tinian Makewijere Tuileto’a Toese talu ona tula’i mai lenei fa’alavelave matuia, ua mafua ai ona ufitia le aiga i le ao pogisa.

Saunoa Toese e fa’apea, talu mai lava le aso na tula’i mai ai le fa’alavelave, e leai ma se isi o le aoga na oo atu ia tei laua ma lona to’alua ma talanoa atu e tusa ai o le mea sa tupu. E oo fo’i i le aso Lulu na malemo ai lona afafine, e leai ma se isi o le aoga na telefoni atu e fa’afeso’ota’i atu i laua e tusa ai o lona afafine ua malemo.

“O a’u sa ou i ai i le falema’i mo le vaiaso atoa, ona sa taofia ai lo’u atali’i laitiiti. I le aoauli o le aso Lulu na malemo ai Tinian, na ou fa’alogo atu ai o talanoa le matou Olomatua sa ma i ai i le falema’i ma lo’u to’alua i le telefoni, fai mai e alu se isi i le potu o le ER (Emergency Room) o loo tigaina ai si o’u afafine,” o le molimau lea a Toese.

Na taua e le Tama e fa’apea, na ona taia lava o lana fa’alogo i le tala e fa’atatau i lona afafine o loo tigaina, tu loa i luga ma savali aga’i i le ER. O le taimi lava na ia tatalaina ai le faitoto’a, na ia vaaia ai lona afafine o loo taoto mai i luga o le moega, ua uli atoa lona tino ma ona foliga o loo tafe mai ai le toto i lona isu ma ona taliga.

“Pau lava le manatu na oo ane ia te a’u i le taimi lea, o lo’u afafine ua maliu,” o le molimau lea a Toese ma loimata.

“E leai ma se isi o le aoga na sau ma talanoa mai ia maua e fa’atatau i le fa’alavelave. Mae’a le sauniga lotu i le falema’i i le aso Lulu na maliu ai lo’u afafine, sosoo ai ma le aso Tofi na ou alu ai i le fa’auuga a le Vaega o le K-5 o lo o i ai se tasi o le ma fanau, fa’asolo atu ai i le aso Faraile i le aso o le fa’auuga a le Vasega 8, e leai lava ma se faiaoga na sau ma faapea mai, e faamalulu atu ona o le fa’alavelave sa tula’i mai.”

“E mae’a le fa’auuga ae sau le Puleaoga ma fesili mai ia te ‘au, poo fea e tanu ai lo’u afafine. Na ou faalogo atu i lo’u ulu i le taimi lea, toe toe a pa i le tiga ona o le fa’avalevalea o le fesili a le Puleaoga. O lea fa’atoa sau lea e talanoa mai, ae oso mai lana fesili e matua le talafeagai lava. E fesili poo fea e tanu ai lo’u afafine ae le talanoa mai e tusa ai o le fa’alavelave.”

E pei ona saunoa Toese, na fa’atoa talanoa atu lava le Puleaoga ma faiaoga e tusa ai o le fa’alavelave, ina ua o atu mo le latou faigalotu i le po o le Aso Sa na te’a nei.

“Na amata le latou polokalame o le faigalotu mo Tinian, ae emo ane le ata i le fa’aiuga, ua tootuli le isi faiaoga fai mai o le latou ifoga lea na o atu ai. Na o atu ma le ie tofa ma le tupe. Na talia e le matou aiga le ifoga, ona o le talitonuga o le isi lea tu ma aga fa’a Kerisiano aemaise ai o le aganu’u, ae o le ie toga ma le tupe, sa toe fa’afo’i ona e le fa’atauina le ola o si o’u afafine i ni mea fa’apea.”

O se tasi o itu na taua e le Tama o loo matua tiga ai lagona o le aiga, o le eseese lea o le mau fa’amatalaga ua fa’asalalau solo e faiaoga e fa’atatau i le mafua’aga o le fa’alavelave. O ni isi o ia fa’amatalaga ua atagia mai ai, o le le usita’i o lona afafine na mafua ai ona tupu le fa’alavelave.

“O nisi o tala ua matou maua fai mai sa ma’i lo’u afafine i le aso lea. E le sa’o lea molimau, talu lava ona ola mai Tinian e le i taofia lava i se Falema’i. O isi fo’i tala fai mai o le tautalaititi o Tinian na mafua ai ona malemo, ae o le mea moni e pei ona matou maua mai i fa’amatalaga a molimau sa i ai i le taelega i le aso lea, e leai ma se faiaoga sa i ai i luga o le vai i le taimi na malemo ai lo’u afafine.”

“O ripoti fo’i fai mai o sui o le EMS lea na latou mauaina lo’u afafine o opeopea i luga o le vai, e le moni. O lea ua faamaonia mai i ripoti, e leai ni sui o le EMS na i ai i le taelega, na fa’atoa fetaui le ta’avale a le EMS ma le ta’avale na momoli mai ai le tino o lo’u afafine i le Paka Liona.”

Na tau le mafai ona gagana Toese ina ua fesiligia e le Samoa News o ia e fa’amatala le la mafutaga ma Tinian.

Na umi se taimi o tutulu Toese, ona o le faigata ona fa’agalo o le la mafutaga ma si ona afafine.

“O Tinian, o lo’u lima taumatau lea i totonu o le matou aiga. Na te faia galuega tau tama’ita’i, na te faia fo’i galuega a ali’i. Lona uiga, o ia o le tama toe teine i totonu o le matou aiga. E le lagona sona leo tomumu pe tali i se upu, ae tali mai lava i le ata. Na te le fasia se tasi o nai ona tei, ae na te faia uma feau i totonu o le aiga. E fiafia e pese i totonu o le Ekalesia, na te taulotoina uma fo’i Matua Tauloto i le sauniga o le Aumolimau a le Ekalesia,” o le molimau lea a Toese i si ona afafine.

“E le mafai ona ou faagaloina lo’u afafine. Ou te manatua pea o ia i aso uma o lo’u ola. O ia o la’u ulumatua, ae ua aveesea atu ma o’u lima. Sa ou faanaunau ina ia i’u manuia lana aoga ma maua sona lumana’i lelei, ae atonu e ese fo’i le polokalame a le Atua mo ia. Tinian, ou te alofa pea lava ia te oe si o’u afafine pele i lo’u loto.”