O le aso 18 o Ianuari o le tausaga fou lea ua fa’atulaga e lau ai le fa’asalaga a le Fa’amasinoga Maualuga, fa’asaga i alii pagota e to’a 3 ia ua ta’usala i le moliaga o le sosola i tua mai le Falepuipui i Tafuna i le ogatotonu o le tausaga nei.

O le vaiaso nei na tutula’i ai i latou nei e to’a 3 i luma o le fa’amasinoga mo le tuuina atu o le latou tali ioe e tusa ai o le moliaga sa tu’uaia ai i latou e le malo. O ali’i pagota e toa 3 e aofia ai Andrew Peters, poo Luao Fagota; o Jason Muasau ma Vatia Tugaga.

Na ulua’i tu’uaia e le malo i latou nei e to’a 3 i le moliaga mamafa o le sola i tua a o taofia ai i le Falepuipui i Tafuna. Ae i lalo o se maliliega na sainia e i latou nei ma le malo, ua latou malilie ai e tali ioe i le moliaga lava lea e tasi, o le sola ese mai le Falepuipui e aunoa ma se fa’atanaga fa’aletulafono.

I le tali ioe ai o Peters i le moliaga o le sola ese mai le Falepuipui, sa ia ta’utino ai e fa’apea, i le aso 6 o Iulai o le tausaga nei, na ia sola ese ai mai le toese, a o tuli ai lana fa’asalaga fa’a falepuipui.

I le tali ioe ai o Muasau ma Tugaga i le moliaga mamafa o le sosola i tua mai le Falepuiopui, na la ta’utino ai e fa’apea, i le aso 6 o Iulai o le tausaga nei, na la sosola ai i tua mai le toese, a o tuli ai a la fa’asalaga fa’a falepuipui.

Na ta’utino atili fo’i i latou nei e to’a 3 e fa’apea, i le aso na latou sosola ese ai ma le toese, sa latou aga’i atu ai i Pago Pago ma le fa’amoemoe e fa’atau mai ai ni a latou pia.

O se tasi o mataupu na tele i ai fesili a le afioga i le ali’i fa’amasino sili ia Michael Kruse, o le taumafai lea e saili igoa moni o i latou nei.

I le mataupu a le susuga ia Peters, 26 tausaga le matua, ua manino i fa’amaumauga a le fa’amasinoga, o le igoa sa’o o lea ali’i o Luao Fagota.

Na fesili Kruse ia Peters poo ai le igoa na ia ta’u i Leoleo i le taimi na fa’atoa taofia ai lava o ia i le moliaga o le gaoi i tausaga ua mavae, na tali le ua molia, o Andrew Peters. Saunoa atili Kruse e fa’apea, e mafua ona naunau le fa’amasinoga e saili igoa moni o i latou o loo molia, ina ia taofia ai le fa’afitauli o loo alia’e soo mai, e to’atasi le tagata molia ae 3 i le 4 igoa eseese e iloa ai.

O nisi lava taimi, e faigata ai i le fa’amasinoga ona tau saili i ana fa’amaumauga poo ai tonu le igoa e tatau ona saili i ai fa’amaumauga mo se tagata ae toe molia mai i le tulafono.

Na faailoa e Kruse i le loia a le malo ia Laura Garvey, le fa’aauau pea lea ona tula’i mai o le fa’afitauli o le itu a le malo, o le molia lea o tagata e aunoa ma lo latou sailia o le igoa moni o lea tagata.

Mo se fa’ata’ita’iga o le mataupu a Peters, talu mai le tausaga e 2012 na fa’atoa aafia ai lenei ali’i i le tulafono, o le igoa lava o loo faamauina i fa’amaumauga a le fa’amasinoga o Andrew Peters. Peita’i o lea ua fa’atoa manino i le vaiaso nei ina ua fesiligia e le fa’amasinoga lenei ali’i, o lona igoa sa’o lava o loo i lona pepa fanau ma lona tusi folau o Luao Fagota.

O le igoa o Peters, o lona igoa tau valaau lea i totonu o lona aiga. O le igoa fo’i lea o loo igoa ai lona grandfather, lea fo’i o lo o valaau ai o ia e lona aiga.

FA’AMAUMAUGA O FA’ASALAGA UA MAVAE

E 7 tausaga o le fa’asalaga fa’a falepuipui a le ali’i o Peters o loo tuliina nei i le toese i Tafuna, ina ua ta’usala o ia e le fa’amasinoga i le moliaga mamafa o le gaoi, ona o se fa’alavelave na tula’i mai i le tausaga e 2012, ina ua gaoi e le ua molia se telefoni o le ituaiga o le iPhone mai totonu o se ta’avale la’upasese sa paka i luma o se faleoloa i Pago Pago.

E 28 masina na faasala ai e le fa’amasinoga ia Peters i le toese i Tafuna, o se tasi lea o tuutuuga o lana nofovaavaaia e 7 tausaga. Sa fa’atonu fo’i o ia e le fa’amasinoga e aua nei ona toe solia se tulafono.

E le i umi na magalo Peters mai le tuliiina o lana fa’asalaga, ae toe molia o ia e le malo i le 2014 i le moliaga mamafa o le gaoi, e mafua mai i le fa’alavelave lea na ia gaoia ai se pusa pia mai se faleoloa i Pago Pago.

O le faaiuga a le fa’amasinoga sa faia, o le faaleaoga lea o le nofovaavaaia a Peters mai le 2012, ae poloaina loa o ia e tuli atoa le 7 tausaga sa fa’amalumalu.

I le mataupu a Muasau ma Tugaga, o loo tuli a laua fa’asalaga fa’a falepuipui e ta’i 27 tausaga le umi, e mafua mai i le fa’alavelave lea na la fasi fa’amo’amo’a ai se Tama matua sa nofo i luga o lana va’a faila i le tausaga e 2011.

E pei ona taua i faamaumauga a le fa’amasinoga, sa onana ia Muasau ma Tugaga i le taimi na faatino ai le solitulafono. Na la aga’i atu i luga o le va’a faila ma osofa’i ai le Tama na a’afia. E le gata sa la fa’aoolima ia te ia, ae sa la fa’aaoga fo’i se mae’a e titina ai lona ua.

O manu’a tuga na a’afia ai foliga ma le tino o le Tama na a’afia, na atagia mai ai le matuia o le osofaiga sa faia e i laua nei.

Na taua e le Tama na a’afia i Leoleo lona fa’afetaia o le Ali’i ua mafua ai ona ia toe maua le ola.

O le ali’i loia fautua mo tagata lautele ia Michael White sa tula’i mo ali’i pagota e to’a 3.