3 TAUSAGA O TAUVA A'OGA MAUALUGA I LE HOSA - ULUA'I TAIMI E TAUVA AI I AMERIKA:

O lenei le ulua'i tausaga o le malaga ai le fanau ua manumalo i folasaga po'o galuega fa'atino i Matata Fa'afoma'i ae o le lona tolu ai lenei o tausaga talu ona fa'atautaia nei ituaiga tauvaga i le fanau a'oga i A'oga Maualuluga uma i totonu o Amerika Samoa, e aofia fa'atasi ai a'oga a le Malo ma a'oga fo'i tumaoti.

I lenei tausaga, ua fa'ailoa mai ai o le a malaga i latou, ma o se fiafiaga o le fanau tauva ua manumalo nei i a latou Folasaga ma Galuega Fa'atino Fa'afoma'i ua mae'a fa'amasinoina, ma ua maua le avanoa e tauva ai i le Tauvaga Galuega Fa'atino Fa'afoma'i a le Iunaite Setete o Amerika atoa ma ona teritori.

I le tauvaga i lenei tausaga e to'aono ai le fanau a'oga mai Leone o le a malaga, to'alua le fanau vasega 10, to'atolu i latou e vasega 11 ma le to'atasi mai le vasega fa'aiuaso, lea ua tau i ai nei se fa'aletonu i sana filifiliga aua a nofo, ua le maua lona avanoa e malaga ai, ae a malaga fo'i, ua le savali fa'atasi ma lana vasega fa'aiuaso i lo latou fa'au'uga.

Ina ua fesiligia le tama'ita'i o Tusisalalau Auva'a e tusa o lea tulaga ua faia ai e ia sana filifiliga tonu, "Afai lava e leai se isi va'a e mafai ona ou malaga ai, ae maua ai e a'u le avanoa e folasia ai la'u galuega fa'atino i lea tauvaga, o le a ou malaga pea ae tu'u lou fa'au'uga ou te le savali ai."

Ua fa'ailoa e ia, "E agaga tele a'u i lenei avanoa, ua lua tausaga ua tuana'i o taumafai le fanau i lenei avanoa, lea ua maua e le matou tausaga, ae o ai fo'i na iluilu talotalo o a'u o le a fa'asino i ai se tasi o nei avanoa taua, ae toe fa'atauagavale la i lea avanoa, leai, e tatau ona tu'u le fa'au'uga, o le mea e maua fo'i se isi avanoa e toe savali ai pe a fa'aauau a'oga, ae malaga e tali le vala'au fa'apitoa ua tusilima mai ai se taumafaiga ua au mo a'u le tagata fa'atauva'a."

Manaia le manatu, peita'i, ua mafaufau fo'i i nai ona matua ma aiga, ua leva o taupule ona la'ei ma tapenaga o mea uma e savali ai e tali ona tusi pasi ma ana taumafaiga ua atoa le 12 tausaga o tausinio i ai, ae pei lava ona fa'aalia e le tama'ita'i tausinio, "E tu'u nisi mea lelei, ona o nisi mea lelei, pe afai e le mafai pe fetaui fo'i ma se va'alele la'u malaga mo Dallas Texas."

E ui ina lototele le tama'ita'i o Auva'a e faia lea fa'aiuga taua, ae ua naunau si ana faia'oga ma le matagaluega e tapena se isi avanoa, ae afai lava ua fai si soso'o tele ma le taimi e ao ina tula'i ai mo lana folasaga, ona faia lea o lana fa'aiuga ua mae'a nei.

O le aumalaga e to'atolu i latou mai Samoana i le latou fo'i folasaga, ma le sui e to'atasi mai Tafuna High School, ae to'a 6 ai lea ua tapenna mai Leone, ma faiaoga e to'alua, ona mae'a ai lea o le aumalga atoa mo Dallas Texas.

O le aso e tu'ua ai e i latou le tatou malo o Iuni 25 se'ia o'o ia Iulai 3, 2018. O le fa'aiuga o Leone High e faia tonu lava ia Iuni 25, 2018 ae faia lea sauniga mamalu, ae ua malaga ese atu le vaalele le Hawaiian Air i lea lava taeao.

O i latou e to'aono mai Leone High Sorphomores: Serena Lia Iona ma Riden Ben Jr. i le la'ua galuega fa'atino o le Health Career Board. O le to'atolu i le latou folasaga mai le vasega 11 ua aofia ai Fa'ava Saolotoga, Emazora Taiapisi ma Tagiilima Ah Foon i le latou folasaga - o le Public Service Announcement, ae o le Fa'asalalauga i le Alaata i le ea. O le sui mai Angelica Nair ma le toalua mai Samoana o Perosi Vaofanua ma Isadora.

A'o le tama'ita'i e to'atasi mai le vasega 12 o Tusisalalau Auva'a o lana galuega fa'atino o le Ulutala "Ata o Galuega Fa'afoma'i Eseese" lea sa ia tapu'eina ai ata o ituaiga foma'i eseese e tolu ma fa'alauiloa nei ata.

Tau ina ia tu'ufa'atasia fo'i se sao o Amerika Samoa i lenei taumafaiga i le Malo Tele fa'atasi ma isi uma fanau i a'oga maualuluga is setete me teritori eseese uma o Amerika. O a'oga na tauva i lenei tausaga ua aofia ai: Fagaitua High, Leone High, Tafuna High lea e to'atasi le sui ua lautogia mai ai, Nuuuli VocTech High, South Pacific Academy, Iakina Academy ma Samoana High, lea fo'i e manumalo mai le isi a latou galuega fa'atino.

25 ATOPA'U SAUNIA MO LE FA'AILO UA PAGATIA SE TASI I LE SAMI & GALUEGA LAVEA'I:

O le taeao ananafi sa o'o atu ai le susuga Bruckner Chase mo sana folasaga muamua lava i se potu a'oga i se vasega o fanau a'oga ua naunau ina ia avea ma sui e tapena mo galuega lavea'i o nisi mai le malosi o au o le sami, ma ua avea ai i latou ma nisi e fa'aaogaina atopa'u saunoga mo fa'ailo ma galuega lavea'i a le tofa Uilaolesami Bruchner Chase.

E pei ona mua'i fa'ailo ua toe fo'i mai Uilaolesami e fa'atino sona aoga mo tagata uma o Amerika Samoa, ae maise ia i latou e masani ona auau, fiafia e ta'e'ele ma fa'aaoga le sami i ta'aloga ma fagotaga.

O atoa nei e 25 ua malaga muamua mai ma Chase ua mafai ona fa'aoso ai le Sailini pe afai e tatala loa ina ia fa'aaoga. Peita'i o lo'o ua iai a'oa'oga tamau mo le sui e fia fa'aaogaina.

"Afai ua va'aia se tasi ua pagatia i le sami, aua e te oso loa e taumafai mai e lavea'i, tusa po'o le a lava le malosi o lau a'au, pe ua e iloa lelei a'au, atoa ai ma lou iloa e malosi lou tino. Peita'i, FA'ATALI mo sina 10 sekone, tatala le ato ina ia e'e mai ai le sailini. Lua fa'aaoga le fa'aili o i ai i totonu ina ia to'atele nisi e iloa le mea ua tupu. A'o e ilia pea le fa'aili, o lo'o i ai ma le maea, i lona pito mamafa ua fa'amau i ai ma le ofu fa'aopeopea e matala lava le ofu ia pe a papa'i le pito mamafa lea o le maea i le sami, togi mamao ia o'o i le sui o tau malemo. Ona e fa'ato'a oso loa lea ma oe i le sami, ae ua i ai fo'i lou fusipa'u e fa'amau muamua i lou manava, ua i ai fo'i lou ofu fa'aopeopea, e papa'i loa fo'i i le sami, matala lea ofu ma ua mae'a ona fa'atumu i le ea."

O le galuega fa'aola lea ua mae'a tapena e Chase mo le tele o nofoaga ua va'aia ua fa'atutu ai fo'i ma mama fa'aopeopea e fa'aolaina ai nisi e tau malemo i le sami, lea sa saunia e le Rotary Club. O le a i ai nei pusa ua aofia ai nei mea faigaluega e fa'aolatia ai se tasi ua pagatia i le tai. Alofagia fo'i le to'atele o tupulaga talavou ma so'o se tasi e tau ane ai, ia le tagofia ma ave'ese, aua o lo'o fa'alagolago i ai le soifua o nisi e pagatia fa'afuase'i i le sami.

O lea folasaga o le a fa'atino atoa i le 9:00 i le taeao o le aso To'ona'i i le Healing Garden i Leone, ma o le a fa'ata'ita'ia ai le fa'aaogaina o nei meafaigaluega i totonu o le ato, atoa ai ma le fa'afofogaina fo'i o le e'e a le sailini pe a matala loa le 'ato lenei.

Vala'auina tagata uma e fia va'aia, ae maise o pulenu'u ma leoleo afio'aga ina ia o ane e fa'alogo, va'ai ma fa'afesili pe afai e le iloa lelei nei tomai, ia agava'a ai mo galuega fa'aola. Ua mae'a faia nei fa'ata'ita'iga e Chase ma le vasega o le Marine Patrol a le Matagaluega o le Puipuiga o le Saogalemu Lautele o le atunu'u.

O lo ua fa'ailoa e nisi o le fanau a'oga, e tauau e talosaga i latou i ni avanoa Bay Watch i le tai pe afai e matala mai avanoa nei ua tapena i ai Chase mo le lumana'i o fanau nei ua ia talanoa i ai i le potu a'oga. O le vasega sa aofia fa'atasi mo lea folasaga o tomai eseese e fa'aaogaina i le tai, o le Leone Green Club, Ocean Marine Science ma le Earth & Space Science lea e fa'afoea e le susuga Falana'i  ma Tele'a i Leone High.