Ads by Google Ads by Google

Tala I Vaifanua

SIITIA TOFIGA MATANIUFEAGAIMALEATA FA'ALATA MAGO - SATINI [E5]

 

Ua fa'ailoa mai fo'i se tasi o alo o le atunu'u ua fa'amanuiaina tulaga i le US Army ma ua si'itia fo'i le tofiga e galue tautua ai i lea itu o le Vaega Au a le Malo tele. O le tama'ita'i o Mataniufegaimaleata Fa'alata Mago ua maua nei lona tofi Satini ma ua fa'amauina ma fa'apine fo'i o ia i lea si'itaga o le tulaga.

 

O lenei tama'ita'i sa soifua a'e i le afio'aga o Fagatogo, peita'i o ona aiga e afua mai i Fasito'outa, Salelologa, Salelavalu ma Sapapali'i i Savaii. O lana ekalesia fo'i sa soifua a'e ai o le Ekalesia Metotisi lea i Fagatogo, peita'i ua alaala nei i fafo i Georgia ma ua auai i le Ekalesia Full Gospel Church Fort Stewart, Georgia.

 

O ona matua o le afioga le Matua Tau'auve'a Peseta Le'iataua Aiolupotea Leuafa'alanu ma le faletua o Failelei Leautulilagi Fa'alata.

 

I le amataga o lona soifua a'oa'oina sa amata lava i le Matafao Elementary ana a'oga, soso'o lea ma le si'itia i Kanana Fou High, ma ulufale atu ai i le ASCC ma maua ai lona fa'ailoga AA in Liberal Arts ia Me 2011.

 

Si'itia le a'oga i University of Hawaii Manoa ma maua ai lona fa'ailoga o le BEd ia Tesema 2013. Toe fa'aauau ana a'oa'oga i le Concordia University ma maua ai lona fa'ailoga Masters of Education in Curriculum & Instruction/ Leadership ia OKetopa 2016.

 

Na fa'ato'a faia lana filifiliga e ulufale i le Vaega Au US Army i le vaega a le 92Y Unit Supply Specialist ia Fepuari 2015.

 

Na muamua lava tiute o ia 385th Military Police Battalion / 139th Military Police Company i Fort Stewart Georgia.

 

Peita'i o lona tina Fialelei Fa'alata ma lona alo tama'ita'i o Atimaopa-Lei Joycelyn Mago sa latou fa'aula ia te ia e taualoa ai lona tofiga fou ua faa'e'e ia te ia i lenei masina.

 

Ua mae'a fo'i ona fa'aifo se fa'atonuga mo ia, e tatau ona tu'ua e ia lona aiga i Georgia mo Korea e faigaluega ai mo le tausaga atoa e tasi, ma e tatau ona malaga ese atu ia Oketopa, 2018.

 

MANAVA GALUEGA FALETUA FESOASOANI - MATAGI MAUGAOTEGA

 

O le tina o le galuega sa galulue ma le tama Fesoasoani Katoliko Roma Ioane Tavete Maugaotega i Ekalesia Finagalo Pa'ia i Alao, ma sa fausia ma mautu ai le Malumalu tele i luga o le mauga ona ua mafai ona so'ofa'atasia o latou finagalo ma le pa'ia o le Ekalesia e fausia ma fa'atula'ia lea malu mo le galuega a le Atua. Suia mai ai le malumalu i autafa o le alatele i Alao i lona tulaga masani ma si'itia i luga o le mauga.

 

Na mae'a lea si'itia mai i le Ekalesia Aiga Pa'ia i Pavaiai ma sa latou galulue fo'i ma lea Ekalesia ina ia fa'atula'ia le malumalu fa'atasi ma le Maota o le Galuega e aofia ai le Hall tele ma le Maota e alaala ai le Fesoasoani ma le Faletua ma aiga.

 

Tolu na galuega tetele na fa'aulufale fa'atasi uma lava. E le ona o le tagata, ae o le mana o le Atua na una'ia ai nei galuega uma ina ia mautu maota tapua'i ma maota fo'i e tua i ai le Ekalesia sa galulue ai i la'ua.

 

"E vaivai le tino, ae o le loto e tele mo le galuega atina'e i ona itu uma i so'o se mea e galulue ai. Ua i ai le loto ina ia faia le mea sili mo le galuega a le Atua, tusa po'o le a le tigaina, po'o se taumafaiga ia au." O se tasi lea o molimau sa fa'afofogaina mai sui o le ekalesia sa molimau.

 

Sa soifua a'e Matagi i ona matua Ilalio Loau & Suitupe Tulili Loau i Faleula, Samoa ia Iulai 14, 1949. O le isi ona afio'aga o Malie, le afio'aga o lona tina.

 

O ia sa avea ma Peresetene o el Sagata Ana, ma o se tasi fo'i sa iloga lona tula'i mai i lona fa'amaoni i le galuega ma ana auaunaga. I lona avea fo'i ma faletua o le Fesoasoani Katoliko, e iloga lona fai mea mafai, loto i le galuega ia ola ma mautu, ma e le mana'o i se mea e tasi e fa'aletonu o so'o se tapenaga e fa'atino. Masalo o lona soifua naunau lea i mea lelei, e ala ai ona tutula'i pea nisi o galuega sa ia auai ai, e ui ina o lea ua folau i lagima le auauna fafine a le Atua.

 

O ana galuega sa mua'i galue ai i Samoa i le Ofisa Emepasa o Niu Sila i Samoa, peita'i ina ua ulufale mai i Amerika Samoa ina ua mae'a faia lona aiga, sa amata loa ona faigaluega i le Samoa Packing ma sa o'o ina avea o ia ma Leoleo Faitoto'a o lea Kamupani, e matua fa'amaoni lava o ia i ona tiute uma.

 

"Pe a o'o ina faigaluega le tina lenei, e leai sana fanau, sona aiga, sana uo po'o nisi e masani ai, e faia lava ona tiute i le atoatoa, ma o le ala fo'i lea o le matua mau fa'atuatuaina e lea Kamupani sa galue ai mo le 15 tausaga o lona soifua galue." O se molimau lea a se tasi o le fanau, Kolotea Viliamu.