Ads by Google Ads by Google

Tala I Vaifanua


O le va'aiga lea i le tumutumu ae le'i taina le ono i le aso To'ona'i na te'a nei. O i latou ua lolofi atu ina ia maua se pepa talosaga fa'atumu mo avanoa faigaluega i le fale Fasimanu i Niu SIla ma Ausetalia. [ata: Leua Aiono Frost]

O le aso Gafua nei o le a amatalia ai ona fa'aaogaina Mita mo Pakaga o Ta'avale i lou ulufale atu i le Malae Va'alele i Faleolo i Samoa. [ata: Leua Aiono Frost]

TOATELE AUTALAVOU UA MANANA'O E MALAGA FAIGALUEGA I AUSETALIA & NZ

 

I totonu o le malo o Samoa, o se va'aiga i le to'atele o i latou na lolofi atu i le Faletele o le ACB [Accidental Compensation Board] i Apia ina ia piki ni a latou pepa talosaga mo avanoa faigaluega i Fale Fasi Manu i Niu Sila ma Ausetalia i le taeao po o le aso To'ona'i, ua iloga ai le to'atele o i latou o lo'o mana'omia avanoa faigaluega i atunu'u i fafo.

 

O i latou nei ua na'o le usu ane e piki pepa fa'atumu o avanoa e 250 mo Niu Sila, 250 fo'i avanoa mo Ausetalia, ao avanoa e fa'ata'ita'i ai ona galulue i so'o se vaega o Fale fasi Manu i na atunu'u ua matala mai ai avanoa nei mo talavou i le va o le 25 tausaga se'ia o'o i le 43 tausaga o le soifua.

 

Mai le televise sa fa'asalalauina ai nei avanoa, ae faia pasese ma pepa talosaga o visa e nonofo ma fai galuega ai e le Malo.

 

O le to'atele o ulugali'i talavou sa va'aia le o atu uma lava ma nai a latou fanau, ona o lea avanoa e iloga ai se fa'aputuga oa mo i latou e atina'e ai o latou aiga fa'ato'a amata. I se tala mai a se tasi o tina, sa fa'aalia ai lona taofi, "Ua fa'atumu uma lava ma'ua pepa, ua fa'aaoga fo'i ma'ua igoa a'o le'i fa'aipoipo, afai ae manuia po'o ai lava o i ma'ua e malaga, ae ua mae'a se taumafaiga ia malaga lava se tasi. Ae o ai fo'i a ita pe afai ae talia uma i ma'ua. E tu'u sia ma fanau lea e na'i le tolu tausaga ma le tasi le tausaga i ma'ua matua, ae malaga e tau fai saili. O le lumana'i mai le taimi nei, o lo'o fuafua i ai se manuia."

 

Ona o le vaega a le ACB lea e taua'aoina mai ai pepa, ua le fesiligia ai le sao o le Accidental Compesastion Board i nei avanoa, aua afai ae maliu ai se tasi i nei galuega o le a ma'au atu i ai, o i latou lea o le Inisiua tau fa'alavelave fa'afuase'i e a'afia ai so'o se tagatanu'u o Samoa Tuto'atasi, o i latou nei e tali i lea fo'i pagatia, ia mautinoa se vaega tupe e tu'ua mo aiga o nisi o le a le toe taliu mai o soifua pea.

 

Ua fa'ailoa mai o nei pepa talosaga e fa'atumu e toe taliu atu sui uma e fa'ao'o atu i lea Ofisa na taua'ao mai ai i le aso Gafua a le malo i sisifo. Ona tatalia lea o le taimi e faia ai fa'atalanoaga ina ia mautinoa lou malaga ma lou le auva'a atu i na avanoa.

 

TOTOGI PAKAGA I MALAEVA'ALELE I FALEOLO I SAMOA E FA'AAOGA AI MITA

 

Mai le malo o Samoa, ua fa’ailoa ai o le aso Gafua o le vaiaso lenei ua amatalia ai ona fa'aaogaina MIta totogi mo pakaga i le malaeva'alele fa’avaomalo o Faleolo i Samoa. Ua fa'ailoa mai e le o taugofie lava le totogi o nei mita ma ona taimi fa'ataga e paka ai lau ta'avale i le malaeva'alele, ae na'o le $2 e te alu atu ai e tu'u lau pasese ma toe taliu ese mai.

 

O le tau ua amatalia ai le totogia o lou tu mo le itula atoa e $5.00 ona amata si'itia loa lea o lau paka i le pakaga e pei lava o fafo. Ua fa'ailoa e i ai nisi o le mamalu lautele o le atunu'u ua latou le fiafia i lenei tulafono ua fa'amamalu, peita'i e le taofia ai fo'i le galuega a le Malo e fa'aleleia atoatoa ai le tautuaina o va'alele, e o'o i malae va'alele ma o latou vaega uma o tautuaina ai le mamalu lautele.

 

Pe afai fo'i o le a tatou o atu i Samoa ma fa'auia lea malaeva'alele tele i Samoa, ia tatou mua'i malamalama fo'i ua mae'a faamamaluina lea tulafono, ina ia fa'amama avega fo'i i nai o tatou aiga, pe afai o le a le va'aia i latou o tatalia i tatou i lo tatou taunu'u atu. E sili mamao lava le tatou tulaueleele, fa'amaopopo uma tatou ato ma uta, ona faato'a vala'au lea i aiga ua mae'a tulaueleele ina ia fa'ato'a o atu loa i totonu e piki mai i tatou.

 

O lona uiga o le a le toe totogia lau tupe i le faitoto'a, ae o lou taliu mai i fafo o le a fa'ato'a oso a'e ai lau pepa e iloa ai lau pili i lou paka ai i totonu o le malae va'alele. Ua tele fo'i fa'atalatalanoaga i luga o le alaata o le televise i Samoa e fa'alauiloa ai lea tulaga, ua i ai fo'i ma fa'asalalauga fa'alaua'itele i Leitio ma nusipepa e fa'ailoa ai lea fuafuaga a le Malo o le a fa'amamaluina ma fa'atautaia i le amataga o le vaiaso nei.

 

TOTOGIA E LE UNITED AIRLINE PILI & MALIU O MALIU NA FESETA'I I VA'ALELE

 

Ua fa'ailoa mai ua talia e le kamupani Va'alele a le United Airlines lo latou totogia o fa'aletonu uma na i'u ai ina taulaueleele mai le isi a latou va'alele e fa'ao'o mai le Va'a o le Maliu i Amerika Samoa i le aso Lua o le vaiaso na te'a.

 

O le sasi na feseta'i ai nei Pusa Maliu ua patino lea i le United Airlines ma ua latou feso'ota'i atu i aiga o i latou na feseta'i i a latou galuega fai ma ua fa'ailoa atu fo'i ia i latoou, ua latou sala i lea tulaga ma o le a fesoasoani atu i le totogia o toe aso o latou pelega.

 

"I le taimi lava ua matou iloa ai ua sasi le matou tautua, ua matou vave feso'ota'i loa ma faia galuega e tatau ona fa'atino, ina ia toe fa'asa'o ai le sasi ua tupu. Ua mae'a fa'ailoa atu fo'i i aiga lo matou agaga fa'amaulalo i le sese ua fai, ae maise o le matou fa'amaise i le tiga ua ia te'i latou,” o se tala lea a le susuga Maddie King o le sui o le United Airlines.

 

Ua toe fa'afo'ia atu nei le totogi o le aumaia o Sa o nei pelega i le va'alele atoa ai ma le fesoasoani fo'i i aiga mo toe sauniga o e ua tu'ua i latou.

 

Ua o'o fo'i i le Kamupani Va'alele a le Hawaiian Air, ua latou fa'ailoa le latou fa'anoanoa fa'atasi ma aiga ona o lea sasi i le tautua.