Ads by Google Ads by Google

TALA I VAIFANUA

MALO TAUSALA PAPUA NIU KINI - TAUSALA LALELEI O LE PASEFIKA

 

O le tama'ita'i tausala lalelei mai le malo o Papua Niu Kini, Ms Leoshina Mercy Kariha, e na'o le 18 ona tausaga, ua manumalo nei i le tofi "Tausala Lalelei o le Pasefika" o se i'uga lea o le tauvaga tausala sa faia i Tongatapu, Malo o Tonga i le vaiaso ua te'a.

 

O lenei tausaga ua tulaga lua ai le tama'ita'i Tausala Lalelei o Samoa, Sonia Piva ae tulaga tolu ai l tama'ita'i Tausala Lalelei mi Tuvalu, Emelipelesa Panapa.

 

O le tala mai na fa'apaleina le tausala Lalelei o le Pasefika i le mae'a ai o le tauvaga na faia i le 'Atele Indoor Stadium' i Tonga i le taeao lava Tesema 01, 2018.

 

Ua fa'ailoa mai, o le tama'ita'i lea sa pito i to'atele lava i latou na fa'afiafiaina i ana taleni lautogia sa fa'atino. Na ia mauaina le fa'ailoga muamua i le Taleni, o le Fesili ma Tali; Tausala o le Turisi ma le fa'ailoga o le Tausala Tausa'afia lana amio. O nei fa'ailoga uma sa taua'aoina lea i le siva tele na fa'atautaia e fa'amae'a ai le tauvaga na faia i po e lua i le Malo o Tonga.

 

O le tausala lalelei ua fa'apaleina nei, o se tama'ita'i o lo'o a'oga i le Divine Word University i Madang Province PNG, ma o lo'o sailia lona fa'ailoga Bachelor of Arts i le PNG Study Relations, ma o lo'o i ai lona fa'amoemoe e avea o ia ma sui mamalu o lona Malo i le fa'aiuga o lana lea sailiga.

 

O le tausala tulaga lua mai Samoa Sonia Piva - na mauaina le Ofu Taele togisilia ma le La'ei fa'a-le Aganuu tulaga muamua a'o le tausala mai le Atu Kuki, na ia mauaina le Tausala Ata lelei ma le Tausala o Feso'ota'iga Tau Initeneti.

 

O le fa'alua ai lenei ona maua e Tausala Lalelei mai Papua Niu Kini fa'ailoga o le Tausala Lalelei o le Pasefika talu mai lona amataga. O le taimi muamua na umia ai e se tausala lalelei o Papua Niu Kini lea tofi o le 2015, o ia lea o Abigale Havora.

 

Ua fa'alua ona umia e le Malo o Tonga lea fo'i tofi, ma sa mua'i umia e le Tausala Lalelei o Ma'ata Mo'ugaloa i le tausaga e 1995 ma toe maua fo'i e le tausala lalelei o Tesi Toluta'u i le 2007.

 

Ua fa'atolu fo'i ona talimalo ai le Malo o Tonga i lea tauvaga, 1995, 1999 ma le 2005.

 

MANA'OMIA LBJ MED. CENTER 24 MOEGA - FA'ATAU MAI NA'O LE 5:

 

Ua fa'ailoa mai ua mae'a avatua nei le oka a le Falema'i tele i Faga'alu mo le na'o le 5 moega fa'apitoa a le falema'i, peita'i e mana'omia le 24 o moega nei i le taimi nei.

 

O lenei se fa'aaliga ua mae'a fa'ailoa mai e le CEO o le falema'i tele i Faga'alu, Faumuina John Faumuina, ma ua ia fa'ailoa mai fo'i, "Ona o lo'o i ai isi mea e ao ina ave fo'i i ai le fa'amuamua i tulaga o togafitiga e mana'omia lava vaila'au ma fuala'au, ae maise o le tulaga o sapalai o isi mea e fa'aaogaina e foma'i ma tausima'i mo le tausiga fa'apitoa o gasegase ua fa'ataotolia i le falema'i, e tatau ai ona faia lea fa'aiuga e oka na'o le 5 moega, ae o lo'o mana'omia lava le 24 moega i le taimi nei."

 

"E le o toe mamao la ae maua mai moega fa'apitoa nei mo le ER po'o le potu o talavai mo le mamalu lautele o le atunu'u."

 

Na mua'i fa'ailoa lea tulaga e le susuga le Pule Sili o le falema'i LBJ Med Center i le fonotaga fa'apitoa a le Kapeneta ma le Kovana Sili i le vaiaso ua te'a, ma sa ia fa'ailoa ai, "Ua pa'u teisi le aofa'i o Pepe e soifua mai, ma ua fa'afetaia lea tulaga, aua ua to'atele ma tutumu isi potu talavai a le Medical Ward ma le Surgical Ward, lea ua fa'aaoga ai moega sa fa'aagaaga mo le potu o failele ma Gasegase Tau Tina.

 

Ua faailoa fo'i e Faumuina John, "Ona o lea ua fa'ailoa mai e le Teutupe a le Malo, "Ua i ai tupe fa'aagaaga a le malo i le taimi nei, atonu o le a toina mai loa e le Malo le vaega patino mo le falema'i i le taimi nei, ona o le tulaga o le mana'omia o i ai."

 

FOA'I NHS TAFUNA HIGH $7,000. - GASEGASE O LE FATU [RHD]

 

Ua fa'ailoa mai ua mae'a le galuega tele sa nafa ma le Sosaiete a Tamaiti A'oga e Maualuluga togi i Mataupu o tauavea i le a'oga i Tafuna, ma ua latou taua'aoina ai le aotelega o le tinoitupe e $7,000. i le DOH/RHD.

 

O lea foa'i e aga i le taumafaiga ia lava le tinoitupe e fesoasoani e aumaia ai le aumalaga o foma'i fa'apitoa o le Fatu e sailia a tatou fanau po'o ua a mai togafitiga tau le fatu o lo'o nafa ma nisi, ae toe siakia fo'i nisi sa nofo va'ava'aia o latou fatu mai isi suesuega muamua na faia i le tatou nei malo.

 

O le tatou faitau aofai o i ai nei o fanauiti ma talavou i Amerika Samoa ua a'afia o latou fatu e 12.8% ma o se faitauga sili ona maualuga lea i le lalolagi.

 

O le taumafaiga lenei a Tafuna High NHS na faia i le vaitau o le Aso Fa'afetai ma o le latou gaoioiga na faia o le Color Run ma sa fa'apa'aga ai i latou ma le Matagaluega o le Soifua Maloloina.

 

O le tama'ita'i o Margaret Sesepasara na suia le afioga le Fa'atonusili o le Soifua Maloloina, Motusa Tuileama Nua e taua'aoina i ai lenei foa'i a le NHS Tafuna High, ma sa fa'afetaia fo'i e lenei tama'itai iloga o lea matagaluega le agaga tonu na faia ai e le fanau lenei taumafaiga ma le foa'i taua.

 

NOGATUPE TOTOGI AI A'OGA I LE KOLISI - KOSI MATATA ESEESE:

 

Ua fa'ailoa mai ua mafai nei ona talosaga nisi o fanau e le agava'a i le Financial Aid ina ia maua ni nogatupe mai le Faletupe o Atina'e e totogia ai latou pili a'oga i le Kolisi Tu'ufa'atasi o Amerika Samoa.

 

O i latou e agava'a mo nei nogatupe o i latou ia e tau'avea ituaiga mataupu tau Matata Eseese, Inisinia, Kamuta ma isi.

 

O lenei avanoa ua taumafai ona faia, o se taumafaiga ina ia fa'ateleina ai i latou e agava'a mo nei matata e galulue ai i totonu o le atunu'u ma mafai fo'i ona auina atu i fafo e sailia tusipasi maualuluga i nei lava ituaiga kosi, toe taliu mai ma faigaluega i le tatou lava malo.

 

O le to'atele lava o taumafai ina ia iloa nei ituaiga o matata, ae le'o agava'a ona e le'i tau'avea nei ituaiga o kosi i a'oga,  o lea ua tapena ai fa'apenei le tatou Kolisi ia fesoasoani i lea tulaga i o tatou tagata lautele.

 

O lo ua fa'ailoa mai, ua agava'a ai fo'i fanau nei o le a fa'au'u i le vaiaso a sau, ma e tatau ona fa'aulu mai a latou talosaga mo nei fa'atupega, ia le silia le aso Lulu o le vaiaso a sau nei.

 

Ua maua fo'i lou avanoa e talia ai nisi fa'afesili pe afai e te talanoa i le Student Services a le tatou Kolisi.