Ads by Google Ads by Google

TALA I VAIFANUA


O se va'aiga i le aumalaga mai Stockbridge High School, Michigan o lea ua toe tu'uva'a atu i Hawaii mo le toe malaga taliu atu i fanua, ae ua matua fa'afiafiaina i latou aua ua ausia uma a latou matati'a sa manatu e fa'atutuina o se fa'aiuga o lenei malaga mai. [ata: Leua Aiono Frost]

AUMALAGA A LE INVENTEAM MAI STOCKBRIDGE HIGH I MICHIGAN

 

I le fa'atausiusiuga o le taimi atofa mo le aumalaga a le fanau a'oga e to'a 13 ma faia'oga e to'alua mai le A'oga Maualuga a Stockbridge, Michigan, sa faia ai loa le latou folasaga taua e fa'atatau i le latou malaga, le mafuaga na malaga mai ai ma le latou sini na fa'atu mo lea malaga, pe ausia pe leai.

 

O le toe taeao o le latou taimi atofa e nonofo ai ma fefa'asoa'i ma fanau a'oga maualuluga a Amerika Samoa, Aso Gafua Tesema 03, 2018 na fa'ataunu'u ai loa le latou avanoa lea i le "Tauese PF Sunia Center" i Utulei, le Ofisa autu o le Nationa Marine Sanctuary o Amerika Samoa, e fa'afofogaina ai e le tatou malo ma sui iloga uma o a latou pa'aga i lenei misiona, lo latou sao ua maua.

 

O le susuga Bob Richards na tula'i muamua e fa'afeiloa'ia le mamalu ina ia fa'afofogaina ma le toto'a le fa'asoa a le fanau e to'a 13 na latou malaga fa'atasi mai, atoa ai ma lona fesoasoani o Lori Zemke, i lea aumalaga.

 

A'o le'i faia lea faasoa, o Lutena Kovana Lemanu Peleti Mauga sa saunoa fa'apitoa e tusa o le taua o aumalaga fa'apenei, ina ia tumau le galulue feso'ota'i o fanau a'oga iinei ma isi a'oga i fafo atu o le atunu'u ae maise i a'oga maualuluga ua talafeagai o latou a'oa'oga ma tatou fanau, ia fa'atusalia le tomai o lo ua tatou maua iinei ma atamai o fanau o a'oa'oina i fafo, i mataupu ma suesuega fa'apitoa fa'asaeaniai ma tomai fa'amatematika ae maise o tomai fa'atekonolosi lea ua tatou i ai nei.

 

Lona lua i le folasaga a le tatou Lutena Kovana, o lona tima'ia lea o tatou fanau ina ia va'ai toto'a i le lumana'i, ma le mafuaga tonu ua malaga mai ai lenei aumalaga taua mo i latou, ia mataituina le afaina o le alititai ma meaola uma o lo'o ofaga i o tatou gataifale. O le gataifale o i tatou lea e agaga mai i ai lenei malaga suesue ma latou a'oa'oga ina ia toe fa'aleleia.

 

I sana fa'amalamalamaga atili o le naunau mai o lea vasega e to'a 13 o fanau a'oga mai Stockbridge sa ia fa'ailoa ai, "E leai se sami e si'omia pe matafaga i ai le setete o Michigan, peita'i na'o ona vaito'a po'o vaituloto e avea ma latou so'otaga ma vai po'o le sami. O lona uiga, o lo'o latou fiafia e o'o mai ma va'aia i tatou e si'omia e le moana, o le tatou tofi fo'i o tatou sami, aua o lona puna'oa e maua mai ai le isi afa o tatou mea tausami. O lo'o avea fo'i le moana ma faasinomaga o le tele o muagagana o le tatou Gagana Samoa, o lo tatou tofi lava lea."

 

"O fea a tatou aga atu i ai i le lumana'i o lenei so'otaga? Le tupulaga talavou, ia avea lenei malaga mai ma ala e fa'aosofia ai manatu lelei, ma avea ma sosia e fa'alauteleina ai lo outou malamalama, ia fai ma sao e una'ia malosi ai outou, e su'esu'e ma iloa atili lo tatou gataifale, le puna'oa o le tatou atunu'u ma le aganu'u, ae maise o le isi itu tele o le tatou soifuaga i lo tatou malo fa'aatumotu o Amerika Samoa."

 

O lana fa'afetai i le aumalaga, na ia fa'afetaia ai sui Faia'oga na malaga mai, Bob Richards ma Lori Zemke, aua o le fa'asoa a faia'oga e mau'oa ai le fanau o a taeao i so'o se atunu'u. O i la'ua fo'i sa una'ia malosi lea fa'atofala'iga ua afua ai ona malaga mai, ma fefa'asoa'i ma tatou fanau talavou i a'oga maualuluga, o le fua ua maualuga ma e ao ina faafo'i le fa'afetai i lo latou manatu mai, i fanau talavou i le atuvasa.

 

Na amatalia le folasaga a le ali'i ta'ita'i malaga Bob Richards i lona fa'ailoa mai, O le Nationa Marine Sactuary i Stockbridge Michigan o se tasi lea o uso tau NMS i Amerika Samoa nei, ma e talu mai le tausaga e 2008 sa avea pea i tatou ma latou pa'aga e galulue fa'atasi e agaga lea i fa'asao i le Gataifale ma Vaomatua.

 

Ona o lea so'otaga sa feutaga'i mai ai so latou avanoa e asiasi mai ai, ma avea ai lenei vaitau ma se taimi ua gafatia ai ona fa'atino lea miti matagofie tele, aua o lea ua o'o mai, a'o se atunu'u ese lona talimalo, fesoasoani ma fa'amasani vave o latou tagata ma i latou o le aumalaga. E afua mai le ulua'i aso na to'ai mai ai i fanua, e o'o i le taimi o le a fa'amavae ai, ua ese o latou lagona e toe fo'i ma i latou.

 

"E ese le ituaiga fa'afeiloa'iga ma laufofoga fiafia, a'o le agaga fo'i e matua ese le agalelei, ua outou fa'afeiloa'ia ma fa'amasania ai i matou uma. Ua o gatasi i ma'ua o faia'oga ma le fanau a'oga na malaga mai i lea tulaga, o se fiafiaga ese lea ua maua atu i Amerika Samoa, ma o le a le galo lava ia i matou uma."

 

"E ese mai sini sa fa'atutu ina ia ausia e i matou ona fa'atino i lenei malaga, ua sili mamao atu mea ua matou va'aia, ola ai ma fefa'asoa'i ai ma outou fanau a'oga maualuluga, ae maise o le mamalu lautele o lenei malo, i ona tagatanu'u i afio'aga ma motu sa matou asiasi i ai, ae maise o pulega i a'oga ma fanau a'oga sa matou asia, ma ola fefa'asoa'i i ai i tomai na matou o mai ma i matou." O se tala lea a le ali'i faia'oga Bob Richards.

 

"I le matou matati'a fou ua fa'atuina nei, ua silia ma le 200futu le mamao i le alititai ua mafai ona fa'aaogaina ai a matou ROVs i le gataifale o Amerika Samoa, ma o se mea muamua lea ua sili atu nai lo le mea sa matou fuafua e fa'atulaga ma fa'aaoga i ai matou masini pu'eata i le alititai po'o ROVs."

 

Mai le to'a 13 o i latou na faia a latou ta'utinoga i se mea sili ua latou maua mai lenei malaga i Amerika Samoa e to'a 8 i latou na muamua lava saunoa e tusa o le latou mafutaga ma isi talavou ma tagata uma ua feiloa'i i ai i Amerika Samoa nei, ona o le aganu'u matagofie e fa'asilia ai le alofa atu ma le fealofani lelei ma isi.

 

Ina ua fesiligia le aumalaga, po'o le a se lumana'i  o lenei polokalama i le fanau sa latou feso'ota'i iinei, ae ua faailoa e Richards, "I le lumana'i e matou te le tu'ua lava le feso'ota'i mai, ua atili nei ona fa'apa'aga i matou ma le tatou so'otaga i le NMS Amerika Samoa, ina ia fa'aauau lenei galuega lelei. Peita'i o le fanau talavou a'oga iinei, o i latou ia e tele lo latou sao i le fa'aauauina o lenei ituaiga tomai iinei, po'o le a lava lou tofi ua e manatu e te auauna ai i ou tagata ma lou malo i le lumana'i, matou te fa'afetaia pe afai ua una'ia malosi sou naunauta'iga ina ia fa'aaoga le ROV ma ona tomai eseese e avea ma sou tofi e te galue malosi ina ia e agava'a ai e fa'aauau lea tautua mo Amerika Samoa ma le atuvasa."

 

Na iloga le fiafia o le fanau a'oga uma i Samoana sa fa'atasi ane i lea fa'asoa, ma ua latou fa'amausali atili a latou ala o so'otaga ma le fanau na malaga mai, aua o nisi o i latou sa fa'ailoa mai i a latou folasaga, "O uo ua matou maua iinei, e le toe motusia le matou feso'ota'i mai i ai, ina ia mautinoa, e i ai 'aioevaga ma 'aiomalaga fa'apenei i le fa'atumauina o le lumana'i manuia o tatou atunu'u e lua."