Ads by Google Ads by Google

Tala I Vaifanua


O se va'aiga ia i latou na tofu sao e suaina le eleele o le fale taalo a Tafuna Elementary, e aofia ai Kovana Lolo Moliga, sui kovana Lemanu Peleti Mauga, Fa'atonusili DOE Dr Ruth Matagi, le Faife'au na siitia le sauniga rev. Tanu Tanu, le ali'i Faipisinisi Faufale Ma'aelopa Bob Tuiasosopo; Sui o le Ofisa o le DOI lea e aumai ai le fa'atupega o lenei galuega Lydia Faleafine Nomura ma isi, o sui o le Aoga i Tafuna. [ata: Leua Aiono Frost]

O se vaaiga lea i le foa'i taua a le Manumalo Baptist Church e $5,000; foa'i a le A'oga Manumalo Academy e $5,000, ma le foa'i a le Pisinisi o le Paramount Builders e $5,000 sa faia mo le Koluse Mumu Amerika Samoa latou te fa'ao'o atua lea meaalofa taua i le Red Cross San Diego, ina ia fa'ao'o atu i le anoanoa'i o aiga ua fa'aleagaina meatotino, ae maise aiga o i latou ua lisia ua maliliu e to'a 88 i latou i le afi i Kalefonia i matu. [ata: Leua Aiono Frost]

SUA ELEELE E FAUSIA FALETA'ALO TAFUNA ELEMENTARY I TAFUNA

 

O le aso Faraile ua te’a na fa'atasia atu ai le Faigamalo i ona ta'ita'i, Kovana Lolo Moliga, Lutena Kovana Lemanu Peleti Mauga ma le susuga le Fa'atonu sili o A'oga Dr. Ruth Matagi - Tofiga ae maise fo'i le tama'ita'i na suia le Ofisa o le Initeria fa'alotoifale Lydia Faleafine Nomura, ma nisi o le malo e molimauina le sauniga e sua aloa'ia ai le eleele, e amatalia ai galuega a le Konekarate e fausia le Faleta'alo tele o lea a'oga.

 

O lenei galuega ua fuafua ina ia fa'atautaia mo le lima masina, peita'i ua talosagaina lava ma le agaga vaivai e le fanau a'oga i Tafuna Elementary, "Ia aoga i le matou fa'au'uga e tu'ua ai a'oga i le tausaga fou ia Me."

 

E tusa ai ma le saunoaga ale Fa'atonusili o Galuega Lautele a le Malo, Faleosina Voigt, "O le tele o lenei faleta'alo e tusa ma le 140futu lona umi i le 70futu lona lautele ma ua fausia lea i le ogatotonugalemu o le lotoa, e ofi lelei lava i ai lenei faleta'alo."

 

O le galuega e to'aiva kamupani sa tauofo ai, peita'i ua manumalo nei le ofo a le susuga Ma'aelopa Bob Tuiasosopo o le 2E Corporation Lighthouse i le tau e $144,431.40 i lona umi e fausia ai e na'o le 5 masina.

 

I le taimi nei ua tolu a'oga tulaga muamua  ua mae'a faleta'alo i le tasi, ae ua mae'a afuafua le fausaga o i si e lua.

 

Ua fa'ailoa mai fo'i, sa asiasia le a'oga sili ona to'atele i Pavaiai Elementary i le vaiaso ua te’a, ma ua tau afuafua fo'i se taumafaiga mo lea fa'amoemoe e tasi, aua e 110,000 tamaiti a'oga i Pavaiai.

 

O le aotelega o fanau a'oga i Tafuna Elementary 900+ toetoe lava atoa le 1,000 tamaiti peita'i o le Manulele Elementary fo'i le isi a'oga e to'atele na'ua fo'i e silia fo'i i le 900.

 

Saunoa Dr. Matagi-Tofiga i le vasega o faia'oga ma le pulega o le a'oga, "Tautuana ma outou se 'ai o lenei faletele. Ua le o le fale lava tatou te naunau i ai, ae o ute o nei faigamea uma, o le anofale, o fanau ia popoto ma lelei a'oa'oina."

 

O lenei galuega o lo’o fa’atupeina e le Matagaluega o le Initeria a le malo tele.

 

FOA'I MANUMALO BAPTIST, MANUMALO ACADEMY & PARAMOUNT $15,000.- KOLUSE MUMU

 

Na to'ia le laulau o foa'i taua a le Koluse Mumu Amerika Samoa ina ua tula'i mai le Ekalesia a le Manumalo Baptist, le A'oga a Manumalo Academy ma le Kamupani a le Paramount Builders ma foa'i le ta'i $5,000, aotelega i le $15,000 ina ia fesoasoani i le mamalu o e ua a'afia o latou falenofo, o meatotino ma fa'ato'aga, ae maise o i latou ua maumau le soifua e to'a 88 i latou ua fa'amauina, ona o le Mu Saesae i se vaega o Kalefonia i matu.

 

"O lenei foa'i matou te ofo alofa atu ai, o i matou o le fanau, i nai aiga ua pagatia ona o le malosi o le afi tele ua a'afia ai latou olaga, meatotino ae maise o le soifua. E le o se foa'i e a'ua'u ai le fa'asoa, peita'i paupau ia ae tau i Lepea e pei o lena muagagana. Ia iloa mai le agaga moni o le alofa ma foa'i atu. O a matou tatalo fo'i e le mavae lea ia i latou uma ua a'afia le soifua i nai o latou aiga, ia alofagia e le Atua i latou, aua o lenei ua tuvae mai i vaitau fiafia o le tausaga, ua fa'ailoa fo'i le agaga o le tausoa fa'atasi o tiga o lenei olaga, na'o sina pa'i alofa atu ia to'afilemu ai o latou mafatiaga."

 

O se tautalaga lea a le tama'ita'i Ta'ita'i o le NHS a le A'oga Manumalo Baptist ina ia avatu aloa'ia ai le latou foa'i e $5,000 i le Koluse Mumu i Amerika Samoa, e fa'auia atu i le Koluse Mumu i San Diego Kalefonia, o le fa'auluuluga lea o le Koluse Mumu o lo'o va'aia le lala i Amerika Samoa.

 

O le afioga le Kovana sili, Lolo M. Moliga, sa masi'i atu mo le taliaina o lenei foa'i, ma o le ulua'i a'oga, o le ulua'i Ekalesia a'o le ulua'i Kamupani fo'i lenei ua faia se foa'i e fa'ao'o atu i aiga uma ua a'afia i le afi i Kalefonia.

 

O lana saunoaga sa ia mua'i fa'afetaia ai le susuga le Faife'au Rev. Filifaatali Mike Fuiava o le Manumalo Baptist ona o le foa'i a le Ekalesa. E le gata i lea sa ia fa'afetaia fo'i le fanau a'oga, aua o lea ua latou mua'i fa'ata'ita'ia se mea lelei, ia iloa ona ola fa'asoa atu i nisi ua pagatia, ia ola foa'i ma le fiafia, aua nei fa'atauanauina. E le gata fo'i i lea sa ia fa'afetaia le pulega ma le aufaigaluega a le Paramount Builders aua.

 

Na ia saunoa e tusa o le ola foa'i a le Samoa ma lona eseesega ma le foa'i a le Palagi. "O le palagi e foa'i lava ia ona ua ia iloa, o le a maliu ae leai se isi e fa'aaoga i ai ana mea sa fa'aputu. O le isi taimi e faia lana foa'i, ona ua ia silafia lelei ua fau ma soloi le oa, ae aoga ona foa'i e fesoasoani mo nisi o pagatia. Fa'afetai lava mo nei ituaiga foa'i uma e lua. Peita'i o le Samoa, e tusa lava pe ua matua vaivai le tamaoaiga o i ona lima ma le taga o le ofu, ae foa'i lava, o le agaga ia tutusa le ola o tatou soifua fa'atasi ai, mativa pe mauoloa, ae tatou ola fesaga'i i manuia fa'atali o le Atua na te foa'i mai."

 

"Ona o lo'o maua'a le agaga alofa, ia outou foa'i fa'apena le fanau a'oga. Ia outou iloa, o nai o outou matua fo'i e ao ina outou ola ma foa'i mo i latou i taimi uma a'o maua le ola! O se fa'ata'ita'iga lelei ua outou faia i lenei aso, ae ua outou muaimalae ai fo'i i se fa'ata'ita'iga lelei."

 

Sa ia fa'ailoa o lenei meaalofa, o le a avea ma se maka lelei i le va fa'aKoluse Mumu ma i tatou o tagatanu'u sa alolofa atu. Ua iloa patino ai le agaga moni, e tusa pe vaivai, ae foa'i pea, e fa'amoemoe e alu aso e sau fo'i aso, ae tumau pea le alofa foa'i atu i o tatou tagata ma le va feagai ma nisi o pagatia i fa'aletonu o le olaga.

 

O le tama'ita'i o Sia Pearson sa i taua'aoina le siaki a le Ekalesia Manumalo Baptist ae o le tama'ita'i A'oga na ia taua'aoina siaki a Paramount Builders ma le Manumalo Academy.

 

TESEMA 01, 2018 - ASO FA'APITOA TAUALOA AI GASEGASE O LE HIV/AIDS

 

O le aso muamua o le masina o Tesema i le aso To’anai ua te’a o le World AIDS Day i le lalolagi fa’atasi ai ma Amerika Samoa. O le taumafaiga e fa'aitiitia pe matua tineia lava fo'i le ma'i leaga tele o le HIV/AIDS.

 

Fa'ailoa e le Matagaluega o le Soifua maloloina, "Tautuana, ia iloa le aga e tatau ona fai, ia saogalemu lou soifua ona ua e fa'aaogaina mea ua fa'atonu ma fa'atulaga e puipuia ai lou soifua maloloina e ala i taimi o feusua'iga. Aua le ma pe fefe e fa'atino lou tiute mo oe lava ma lou saogalemu."

 

Ua toe fa'amanatu ma fa'amamafa mai e sui o le Komiti Fa'afoe o le HIV/AIDS, Paulo Salave'a ma Magdalene Le'auanae, "Tautuana, aua lava nei e fa'atamala i so'o se taimi, e le faigata ona maua nisi i lenei fa'ama'i, pe afai e te le fa'amalosia e oe lava lou olaga mama mai feusua'iga e le sefe ma nisi o pa'aga e te le silafia lelei."

 

“O lau meaalofa lelei mo oe, ia tausia lou saogalemu, ia tasi lava lau pa'aga!"