MAFUTAGA TINA KATOLIKO I FAGASA - E AU LE INAILAU A TINA

O le vaiaso atoa - Novema 18-24, 2018 - na fa'atautaia ai le polokalama o le Mafutaga a Tina o le Matagaluega Sagato Petelo, Ekalesia Katoliko i Fagasa, ma sa mata'ina le tu'ufa'atasiga o lea polokalama e le laulaufono a le Mafutaga, ae maise o le vasega o ona faufautua malosi, le tina o le galuega Sesilia Toilolo ma le Faletua Mele Tupuola.

O le ulua'i aso na tatala ai le fa'amoemoe i le sauniga fa'apitoa e tutuina ai moli ga'o e fa'amanatu i Tina uma o le mafutaga lana matafaioi e ao ai ina la'ei i le onosa'i ma le fa'apalepale i fanau ma le tama o le aiga, ma e fa'ato'a maua a'ia'i lea tulaga, pe afai e nofo tatalo i aso uma.

O le aso Gafua na soso'o ai ma le folasaga na tapena e le Matagaluega o le Soifua Maloloina ma sa pa'au atu ai le tina o Margaret Ssesepasara e fa'asoa atu i ala eseese ua maua ai tina i le gasegase fita o le Kanesa o le Susu, Kanesa o le Fa'a'autama ma isi gasegase fo'i.

O le aso Lua o tima'iga mai le Matagaluega o Alamanuia mo Tagata Lautele DHSS, i ana polokalama e fesoasoani i le tausiga lelei o Fanauiti, Tina Ma'itaga ma tina fa'asusu a latou pepe, ae maise fo'i o Tama ma Tina Matutua, ma fanau ua a'afia i gasegase tumau o le tino ma le Mafaufau, lea e maua mai i le Food Stamp ma le WIC i lea matagaluega.

O le aso Lulu o folasaga a le Matagaluega o Tina ma Talavou (DYWA) ma sa latou tima'ia le mafutaga i ala eseese ua fesoasoani ai le polokalama o Kosi a le Elei ina ia avea ala e maua ai le tamaoaiga e nisi o tina ua nofo fale.

O le aso Tofi na o'o atu ai loa ma le Kamupani Inisiua a le Five Stars Life Insurance e talanoa e tusa fo'i o le mautinoa ua saogalemu atoatoa lou aiga i le tusia lea o se inisiua mo lou soifua.

Ona misia lea o le aso Faraile, ae fa'amae'a lelei loa le polokalama a le "Au le Inailau a Tina” i le aso To'ona'i i le Solo Fa'aaloalo, soso'o ai ma le latou Tauvaga Uili Paelo Teuteuina. Ae fa’aiu i fa’afiafiaga.

Peresetene o le Mafutaga a Tina, Omaiomaofaimolatoulemalo Tauatama Leuta; Sui Peresetene o Sene Tua, Failautusi o Ramona Mata'u ma le Teutupe Cynthia Paopao Soliai Tuifao.

AUMAIA NMS - FAIA'OGA & TAMAITI AOGA MAUALULUGA MICHIGAN

I lenei tausaga, ua aumaia ai e le National Marine Sanctuary le Faia'oga ma nisi o fanau a'oga mai le A'oga a Stockbridge High School i Michigan, ina ia latou fa'aalia le latou galuega fa'asaeanisi, o le Tagata Masini po'o le "Roupati" e mafai ona gaoioi i totonu o le Vai.

E to'alua faia'oga na malaga mai ma le fanau, o Bob Richards ma Lori Zemke ma ua fa'atasia uma ane i ai sui mai a'oga maualuluga i le Tauese P. Sunia Marine Center i Utulei.

O le aumalaga a tamaiti a'oga o le IvenTeam mai Stockbridge e to'a 13 i latou, ma ua matua fiafia i latou e galulue feso'ota'i ma le fanau a'oga maualuluga mai Amerika Samoa, e aofia ai Manua, e ala i le tu'ufa'atasia o a'oa'oga fa'asaeanisi, numera ma le tekonolosi ina ia fa'atino ai galuega fa'atino ua mana'omia ona fa'agaoioi ma fealua'i i totonu o le Vai. Sa vaevaeina le fanau i vaega taito'afa ma fa'atino loa le latou galuega fa'ata'ita'i e tatala ai mafaufau ma tomai o i latou i le amataga o le latou ulua'i aso galulue fa'atasi.

O le poloketi e mafai ona e fa'atula'ia maia se la'au sili ona maualuga e fa'aaogaina ai na'o le taga paluni, seleulu ma le tape fa'apipi'i. Na vave ona va'aia le galulue fa'atasi o fanau ma fa'aaoga o latou mafaufau i lea galuega fa'atino, ae mae'a ane, o le galuega fa'atino a le Fa'asao Marist na maua le tulaga muamua, ona e silia ma le 9futu le umi o le latou la'au na fausia mai na'o le taga paluni, seleulu ma le tape fa'apipi'i.

O lea aumalaga na to'ai taunu'u mai i le po o le aso Fa'afetai, peita'i e toe taliu i latou i le afiafi o le aso Gafua a sau nei, pe a mae'a lenei fa'atasiga mo le vaiaso atoa.

Ua fa'agasolo nei ona taumafai fanau a'oga a le tatou malo e fausia ni a latou Robot e mafai ona ola pea i totonu o le Vai po'o le sami ma tapu'ea mai ata o le alititai po'o totonu fo'i o vaitafe ma vaieli.

I se tala mai a se tasi o ali'i na malaga mai, o fanau a'oga maualuga i Michigan sa ia fa'ailoa mai ai, "O le taimi muamua lenei ua matou o mai ai i Amerika Samoa, ae ua matua matou fiafia tele ua va'aia ma feiloa'i ma nisi o le fanau a'oga i le teritori nei, e toe fia asiasi mai fo'i, a leai se'i manuia a'oga ma maua galuega, e fia toe fo'i mai i Amerika Samoa."

O se tala fo'i lea a le ali'i faia'oga o Bob Richards, ua mae'a asiasi i latou i Palau, peita'i o le taimi muamua lea ua o'o mai ai o ia fo'i ma lana aumalaga o fanau a'oga i Amerika Samoa, e toe fia sau fo'i se isi ana malaga fa'apea i le lumana'i.

FA'ATELE LE "FAGATOGO PAVILION" FA'ALELEIA MA FALEUIA

Masalo ua va'aia e le to'atele fegasoloa'i le tele o mea ua feta'ia'i i le faletele mo fa'atasiga a le atunu'u i le Malaeoletalu, po'o le Fagatogo Pavilion. Ua mafua lea, ona ua taumafai nei ni suiga lelei, aua e matele ina laina le mamalu o i latou e alaalata'i ai pe a o'o i le aoauli, i le taimi ua vevela malolosi o le la, ma ua matauina o se fa'afitauli lea e masani ona taumafai e fa'aleleia pe a fa'aaogaina lea maota i ni fa'atasiga.

O le suiga fou ua fuafua e fausia nei, ua mae'a tusia lelei le ata ma pasia mai e le Matagaluega o Galuega Lautele a le Malo.

Ua fa'ailoa mai fo'i, o le a fa'aleleia atili ma le faleuia o lo'o i ai i ona autafa.

I le taimi nei, ua tele ina tutulu le maota lea, ma ua avea ma ala e toe fa'aleleia vave ai, ae toe faia ai ma suiga ua mae'a fa'atulaga nei i le konekarate ua sainia e le Triple T Services dba Pentagon Samoa, lea e pulea ma fa'atautaia e le susuga Tauileave Toluono.

Ua fa'ailoa mai e to'afa pisinisi faufale sa fa'aulu latou ofo mo lea galuega, peita'i ua malo ai le Pentagon Samoa i lea tauofoga. O i latou fo'i ia o lo'o toe fa'afouina le fale'ai ma le Umukuka i le toese i Tafuna.

O le totogi o le toe suiga atoa ma toe ato o le Pavillion i Fagatogo ua fa'ailoa mai e toeititi atoa le $120,000 ma o le a mae'a lelei e tapena ai le Sisigafu'a 2019.

ALA O FEFA'ATAUA'IGA OLOA A SAMOA - AVEA AMERIKA SAMOA & FAITOTO'A

O le susuga le Fa'atonu o Fa'ato'aga a le tatou malo, Filifa'atali Mike Fuiava, ua mae'a asiasia le tele o fa'ato'aga talo, fa'i ma isi fua o fa'aeleeleaga o lo'o fia auina atu i fafo a Samoa, ma ua talanoaina ai, se fesoasoani fo'i a le tatou malo, i le fa'amoemoe e fa'auia mai iinei fua o fa'aeleelega nei a Samoa mo fefa'ataua'iga ma Maketi i Amerika.

"Ona o le tele o le laueleele e gafatia ona toto ia lava ai ma'umaga, togafa'i ma isi mea uma i Samoa, o le ala lava lea o le palasi o le tele o manuia tau fua o fa'aeleeeleaga fa'atau atu i fafo. E le fa'atusalia le tetele o fa'ato'aga i Samoa ma i tatou iinei, ona o le eleele mauga ua tatou alaalata'i ma fa'ato'a mo le tatou fofoga taumafa, ae le lava mo le sapalai umi mo le fa'atau atu i fafo,”  se tala lea a Fuiava ina ua mae'a maimoa i fa'ato'aga i Samoa.

"O Amerika Samoa e avea na'o se faitoto'a e fa'aulu atu ai le tele o fua o fa'aeleeleaga a Samoa mo le sailiga o maketi i fafo, ma o se mea lelei lea fesoasoani mo Faifa'ato'aga i Samoa.”

I le taimi nei, o lo'o fa'atau atu e Samoa le talo ua mae'a ona vavalu ma tipitipi ma tu'u tagapepa ae le'i fa'avelaina i Amerika, peita'i e mafai ona ave atoa le talo pe afai o le a mautu le so'otaga lea o tautua ma le tatou nei malo.

E le gata i le talo nei fefa'ataua'iga, ae o lo'o ua leva fo'i ona auina atu e Samoa i fafo le latou "Ava Samoa," ae o le latou oloa lea ua fiafia tele ai fanau ua alaalata'i i nisi o setete o Amerika, o le Vailima Beer.