FA'AULU 9 FANAU AOGA MAUALULUGA "MU ALPHA THETA HONOR SOCIETY

Ua amatalia le Sosaiete a Fanau A'oga Maualuga i Amerika Samoa e maualuluga togi i le Numera ma ua fa'aigoaina le latou Sosaiete lea o le "Mu Alpha Theta Honor Society (MATHS)” - lea na amatalia mai le tausaga e 1957 i le Iunivesite a Oaklahoma.

Ua mae'a ona fa'atulaga tofiga e ulufale atu e tautua ai i le MATHS ma o le aso Faraile i le itula e 5p.m. i le afiafi i le Samoana Gymnasium e faia ai le ulua'i sauniga e ulufale ai sui iloga e to'aiva, mai le vasega 10 i a'oga maualuluga i le teritori.

O i latou ua lisia mai mo le tausaga a'oga 2018-2019: Arianne Adriano; Troung Hoang; Heranihilani Togia'i [Teutupe]; Maino Tuiletufuga ; Zi Yi Yu; Rebecca Biukoto; Ianeta Hollister [Failautusi]; Jenny Liang ma Zoe Mavaega[V/President].

O lenei taumafaiga e agaga tonu ina ia to'atele le fanau a'oga e ola a'oa'oina ma finau i tomai fa'amatematika e agava'a ai i galuega i le lumana'i.

MAFAI ONA FAIA LAU PALOTA -TAUSALA PASEFIKA O LE INITENETI

Ua mafai ona faia lau palota mo le "Tausala Pasefika o le Initeneti" o se tasi o vaega o le Tauvaga Tausala Lalelei o le Pasefika lea e faia i le malo o Tonga i le taimi nei, ma e mae'a ona filifilia le tausala manumalo i le afiafi o le aso Faraile o lenei vaiaso, o le aso To'ona'i lea i le Malo o Tonga.

Aua ne’i galo lau palota mo le Tausala Lalelei o Amerika Samoa, Ms Magalita Johnson.

E to'aono Tausala Lalelei o tauva i lenei tofi i lenei tausaga mai Amerika Samoa, Samoa, Tonga, Papua Niu Kini, Cook Islands ma Tuvalu.

Ua fa'ailoa mai e te taina le "Miss Pacific Islands" i luga o lau Facebook ona maua ai lea o le Upega Tafailagi a le Miss Pacific Islands e faia ai lau palota, e faigofie lava.

O le a tapunia avanoa e te toe palota ai mo le Tausala a le Initeneti i le afiafi o le aso Tofi nei.

O le Tausala o le Pasefika 2017-2018 o le tamaitai o Matauaina Gwendolyn Toomalatai mai Amerika Samoa.

TAOFIA TAUMAFA ITUAIGA LATISI "ROMAINE LETTUCE" MAI FAFO

Ua fa'amautu mai e le Matagaluega o le Soifua Maloloina, ia taofia le toe fa'atau ma taumafaina e le mamalu o le atunu'u o ituaiga Latisi "Romaine Lettuce" lea e auina mai fafo.

O le ituaiga Latisi lea e fai si malo o lona lau, ma e le o tutusa ma ituaiga latisi lea e totoina i le vai e le tatou aufai fa'ato'aga Hydroponics.

O le fa'asalalauga ua mae'a ona tu'uina aloa'ia mai e le Matagaluega o le Soifua Maloloina, ina ua fa'amaonia mai e le CDC (Centers for Disease Control & Prevention) o lo'o feso'ota'i le taumafaina o lea ituaiga o Latisi, ma nisi ua maliliu ai. O le sapalai o nei latisi ua a'afia ai le ola o nisi, o lo ua matauina e aumaia lea i fa'ato'aga i le itu i matua ma le ogatotonu o le setete o Kalefonia.

O le aso 19 Novema, 2018 na fa'alauiloa ai e le CDC ua tatau ona taofia le toe taumafaina o lea ituaiga o latisi.  O le taimi nei fo'i ua fa'atonuina ai faleoloa e le FDA a le Malo tele, ina ia toe aveesea uma mai lea ituaiga o latisi mai fata o fa'atauga.

Ua mae'a faailoa e le Matagaluega o le Soifua Maloloina i faleoloa uma, e avea esea nei Latisi mai latou oloa fa'atau atu i le mamalu lautele ma ia fa'aleaogaina loa.

O auga ua fa'ailoa mai e ao ina matauina ua a'afia se tasi ina ua taumafa lea latisi, e tiga tutui le manava, e alu fo'i le manava pe manava tata, ma e i'u lava ina faasuati mai ma filogia fo'i le puaina.

O nisi tagata e tauau ina i ai fo'i ma le fiva tele, ae o le to'atele lava e matauina e lima aso e afaina tetele ai, ona toe fa'asolo lea ina toe fo'i mai le malosi lelei i le 5-7 aso e ma'i ai.  Afai o oe ua atoa le tolu aso a'o tata pea lava lou manava, toe o fa'atasi ma le maualuga o lou fiva, ma ua mesi mai fo'i ua filogia, pe ua le sao se mea'ai ua na'o le fa'asuati mai ma ua filogia fo'i puaina, ona iloa lea ua tatau lava ona e malaga loa i le falema'i mo togafitiga.

Afai lava e i ai se isi fa'afesili i lea tulaga, vala'au loa le Ofisa o le ASDOH i le 699-4606.

O Latisi o lo'o fa'atauina mai o tatou fa'ato'aga iinei lava ia, e le o afaina i lenei taofiga po'o le fa'asa.

FA'ATUMULIA WARDS I LE FALEMA’I O LE LBJ

I le fonotaga a le kovana ma lana kapineta i le vaiaso ua te’a sa fa’ailoa ai e le Pule Sili o le Falema'i, Faumuina John Faumuina; "Ua tutumu” ward i le falema’i, amata mai lava i le Pediatric, Medical ma le Surgical Wards."

Ua ia fa'ailoa ua tatau fo'i ona toe fa'atau mai nisi moega fou e fa'aopoopo i le sapalai o moega o lo'o ua i ai nei, ona ua va'aia le fa'afitauli o nei potu talavai.

Ona o lenei vaitaimi fo'i ua le fa'atumulia le itu o Gasegase Tau Tina, Maternity Ward, o lea ua latou aumaia ai nisi o moega mai lena itu, ma fa'aaoga i itu o le falema'i.

E ese mai le tulaga o Moega ua fai si leva fo'i, ua tatau ona suia mai nisi moega fou, ae o lo ua latalata ina fa'aletonu le sapalai o IVs mo gasegase. O lo ua fa'atalitalia le va'a i le vaiaso nei, ia maua e lea sapalai e i ai nei, ma ua taumafai lava le fa'asoa ia le sioti tele ma fa'aletonu ai togafitiga o gasegase e sulufa'i atu ae ua matua mana'omia lava se IV. I le taimi nei, ua fa'ailoa mai, o le taumfaiga sili lava e faia e so'o se tasi o i ai pili i le falema'i, o le totogia lea o se vaega o pili falema'i, ia fa'afaigofie ai lenei mataupu.

O Fanauiti e le'i uma pule a matua, e totogia uma lava e le Medicaid latou pili falema'i i vaila'au ma fuala'au ma togafitiga, ae o le pili o le moega e totogia lea e le aiga. Afai e maua fo'i lea agaga o le fesoasoani i le tatou falema'i e le mamalu lautele, ia alofagia totogi lou pili ma le fa'amoemoe e toe maua fo'i togafitiga mo isi i le lumana'i o lenei tautua.