Ads by Google Ads by Google

Tala I Vaifanua


O se vaaiga i le taimi ua gaugau ai le agiagia a le Malo Tele sa fa'ataua e le ali'i fitafita tuai James Stewate mai Kalefonia, lea ua lagomau ma o lona toe sauniga lea i lona oliolisaga tumau i Pavaiai i l aso Lulu na te'a nei, Novema 14, 2018. [ata: Leua Aiono Frost]

A'o le'i amatalia ona tu'utu'u malie atu i lalo lona Sa i le tuugamau, sa saunia lelei fo'i lona teu fugala'au mo lona toe sauniga. [ata: Leua Aiono Frost]

LAGOMAU FITAFITA TUAI - JAMES STEWATE I PAVAIAI

 

O le ali'i fitafita tuai ua atoa le tolu masina o i ai i le Falemaliu i le falemai o le LBJ, ua mafai nei ona fa'atautaia ona toe sauniga, ma ua alofagia fo'i e lagomau i eleele o le Aiga Sa Galoia i Pavaiai.

 

O James Stewate sa fa'aipoipo i se tama'ita'i mai Samoa, Arietta Barbara Nunufolau, mo le 28 tausaga.

 

O le masina o Me 2018 na maliu ai lea tama'ita'i, ae nofo ai pea Stewate i Fogagogo. O le afuaga lea o le taumafai ona sailia le aiga Stewate i Kalefonia ma faila fo'i a le Ofisa o Vetereni i le teritori, ina ne'i manatu i latou e fa'afo'i atu lona tino maliu i lona aiga.

 

Ona o Arietta o se tama'ita'i mai Samoa, ua na'o nai fanau a lona uso o lo'o aumau iinei, ma ua feagai i latou nei ma le taumafaiga e faia toe sauniga uma o le ali'i Fitafita Tuai i'inei ina ua le maua mai se tala mai ni suli o lona aiga i Kalefonia.

 

O le vaega a le VFW na latou tula'i mai ma le fesoasoani, e totogia le pili falema'i o le ali'i Vetereni, ae se'i aumaia lona tino e lagomau. E o'o fo'i i le pusa sa fa'atino uma e le VFW ma ua iloga ona tutula'i mai lea vaega o fitafita tuai, O Fitafita nei sa tautua mai Tafa o Taua i fafo atu o eleele o Amerika: Veterans of Foreign Wars.

 

O le tama'ita'i o lo'o fa'aautu i ai le Ofisa o le VFW i Hawaii Igafo Maria Brown-Va'a ae maise o le ta'ita'i o le VFW iinei Asosi Ah Ping ma a latou sui Ofisa e aofia ai Tusipasi Suiaunoa ma isi, e le'i fa'afiti i latou e auai i toe sauniga ma le lagomauina o Stewate i le aso 14 Novema, 2018.

 

I le sauniga mamalu o le Agiagia a le Malo tele sa ufita'i ai lona va'a, sa taua'aoina aloaia lea i le tama'ita'i sa tausia fa'atama tausi e le susuga le Vetereni ma lona faletua, Princess Ta'afua.

 

Ua fa'afetaia mai fo'i e le VFW le afioga le Faipule o Amerika Samoa i le Konekeresi, Aumua Amata ona o lana fesoasoani tele ua totogia ai le ta'avale e tautuaina le va'a o le ali'i fitafita tuai ua masoe nei, fa'atasi ai ma lona fe'avea'iga. O le tauaofai o le pili na totogia e le VFW ua fa'ailoa mai e $1,330 ma le totogia o le ta'avale e feavea'ia le Sa o lana susuga $250.

 

Peita'i o lona nofo totogi ai i le fale sa alaala ai Stewate ma ona togafitiga uma a'o soifua, ua mae'a totogia uma lava e le Medicare.

 

Na tapenaina fo'i le tali fa'aaloalo a le pa'ia o le aiga ali'i Sa Ta'afua mo le mamalu sa auai i ona toe taimi.

 

FA'APINE TAUTUA "ECE FAIPULE" GALULUE MO AIAIGA I LENEI TAUSAGA

 

Ina ua mae'a le tausaga atoa talu ona galulue sui na tofia fa'apitoa mai ECE ta'itasi i le teritori ina ia latou tu'u asiasia ECE Ta'itasi ma va'ai toto'a po'o fa'atautaia latou galuega fita o le a'oa'oga o fanauiti, ia gatusa ma aiaiga o le ECE na fa'avae mai ai, ona faia lea o le fa'atasiga mulimuli ma tufatufaina ai latou tusi pasi.

 

"O lenei tausaga e ui ina faigata, aua e ese fo'i le avea ai ma sui e fai a'oga, ae ua fa'ae'e mai le isi ia tiute e sili ona taua, aua e a'oa'oina i aiaiga uma o polokalama fa'atautaia i totonu o le ECE ma mataituina mea uma ua faia i totonu o ECE ta'itasi i le tausaga atoa. E tele fo'i se lu'iga i ECE uma ina ia nofouta i taimi o asiasiga, ae o le va'ai toto'a fo'i, ina ia fa'atautaia sa'o le polokalama e tusa o ona fa'atonuga fa'aletulafono.” o se tala lea a le tama'ita'i o Tuloto Elise Fa'atonu sa avea ma Faipule tofia mai le latou ECE i le tausaga ua mae'a nei.

 

I le latou fa'atasiga e le o toe atoatoa le numera sa amatalia mai ai le tausaga ia i latou na tofia mai ECE ta'itasi, o nisi ua malaga i fafo, ma ua le auai i le latou toe aso. Peita'i o le vaiaso na te'a na fa'atautaia ai lea fonotaga mulimuli ma fa'aalia ai le fiafia tele o le tama'ita'i e fa'auluulu i ai lenei polokalama, ona o se galuega mae'ae'a sa latou fa'atinoa i le tausaga atoa.

 

"Afai e matauina e i matou se mea o fa'aletonu, e fa'atonuina loa, ina ua usita'ia, e fa'ao'o fo'i se ripoti i le fa'auluuluga ona o se faaletonu, peita'i e va'aia lava nai sasi laiti e le o ni mea o afaina tele ai le a'oa'oina o fanau, ae lelei tele lenei mea o le siakia lelei o le polokalama po'o fa'atautaia sa'o e tusa ma aiaiga o lo'o fa'atupe mai ai fo'i ina ia faia aga'i i ai le galuega,” o sana toe tala lea ina ua fesiligia i afaina po'o ni faaletonu na va'aia i le tausaga atoa i le polokalama.

 

Ua i ai le vasega fou o Faipule filifilia mai ECE ta'itasi o le a faia lea fo'i faiva mo le tausaga a sau nei, ma e fa'amae'a fo'i i lenei vaitau i le tausaga fou. O i latou na ua avatu fo'i i ai le fa'atuatuaga o le pulega atoa a le ECE.

 

6 FANAU A'OGA TAUVA HAWAII SCIENCE SYMPOSIUM & SUSTAINABILITY:

 

Ia Novema 9, 2018 na faia ai le tauvaga Poloketi Fa'asaeanisi ma mae'a ai fo'i ona filifilia e le vasega o fa'amasino tofia mo le Science Symposium i latou ua agava'a mo le fa'ailoga muamua se'ia o'o i le fa, latou te suia Tamaiti Aoga mai A'oga Maualuluga i Amerika Samoa i le tauvaga a le High School Science Symposium - STEM lea e faia i Hawaii ia Ianuari 19-20, 2019.

 

O i latou na filifilia ua aofia ai:

 

• Tulaga muamua - Da In Myung o le SPA;

 

• Tulaga lua - Emily Kennach o Tafuna High

 

• Tulaga tolu - Sophie Young o le SPA ma Gloria Park o le Pacific Horizons

 

• Tulaga fa - Geraldine Ofisa o Tafuna High;

 

• tulaga lima - Koneferenisi Purcell o Manumalo Baptist

 

• Tulaga ono - Heyao Yang o le SPA

 

• Tulaga fitu - Carl Daniel Balauro o Fa'asao Marist High ma Raquel Mamea o Manumalo Baptist Academy

 

• Tulaga valu - Talofa Fea o Tafuna High

 

• Tulaga iva - Hewlwrr DE Lara o Manumalo Baptist

 

• Tulaga sefulu - Taumafa Masunu mai Manumalo Baptist Academy.

 

O i latou na maua le tulaga muamua i le tulaga ono, o fanau aoga ia o le faia ma sui o Amerika Samoa.

 

E to'a 22 i latou na tauva ai mai a'oga maualuluga uma a le teritori i lenei tausaga.

 

Na tofusia le to'a 12 tulaga muamua o lenei tauvaga ma meaalofa na tauaaoina i lea aso: O Ipu ma latou afifi e aofia ai ma le Tusi Pasi ma ato ua fa'atumuina i mea e aoga i a latou a'oga.

 

O i latou e to'aono o le a malaga mo le tauvaga i Honolulu o le a totogia o latou pasese e malaga ai ma toe taliu mai faapea ai ma le nofoaga saogalemu e alaala ai.

 

O lenei tauvaga e faia faaletausaga ma e agava'a ai le fanau a'oga mai le vasega 9 e o'o i le vasega 12 i a'oga maualuluga uma lava i le teritori.