FOA'I MANUMALO BAPTIST ACADEMY I LE SOIFUA MALOLOINA - MALAGA MAI A FOMA'I FATU

O le taumfaiga a le Matagaluega o le Soifua Maloloina ina ia auina mai se aumalaga o Foma'i Fatu i le atunu’u e toe faia talavai a fanau talavou, ua manatu ai le Manumalo Baptist Academy i lana Komiti Fa'afoe, e foa'i se vaega tupe mo le fa'amoemoe e fesoasoani atili i le fa'atupega o le aumalaga o Foma'i Fa'apitoa o le Ma'i Fatu Rheumatic Heart Disease.

O le aofa'i o le foa'i e $3,000 ma sa taua'aoina fa'apitoa lea e le susuga le Fa'atonu o le Manumalo Baptist Academy, a'o le Ta'ita'ifono fo'i o le Komiti Fa'afoe o le Manumalo Baptist, Papali'i Lauli'i Alofa i le Fa'atonu o le Matagaluega o le Soifua Maloloina, Motusa Tuileama Nua, i le taeao o le aso Tofi na te'a nei.

Na fa'ailoa e Motusa, "O le fa'afetai o le mafai ona maua o lenei fo'i vaega tupe e fesoasoani i le totogia o pasese ma le taligamalo fo'i mo foma'i uma e malaga mai mo talavai e toe siakia ai le vasega o fanau talavou a le atunu'u, pe ua a mai se faitau aofai ua toe manuia mai le ma'i fatu, pe o i latou foi ua tatau ona aga'i atu i fafo mo taotoga, ae maise o nisi fo'i ua iloga mai ua maua i lea ma'i fita."

"O talavai nei, e o mai lava foma'i ua mae'a i ai le latou lisi e toe siakia, le fanau sa i ai fa'ailo o tau maua, o nisi ua aga'i ina lelei ma te'a ese mai le tulaga fa'aletonu, ma i latou fo'i o lo'o tatalia avanoa e tatau ai ona faia loa lava taotoga ma tapenaga fa'apena. Ae peita'i o nisi lava o le fanau o le a faia talavai ma maua ane ai ua sologa manuia, a'o nisi ua tatau ona faia togafitiga,” o se tala lea a Motusa.

Ua talia fo'i e le matagaluega o le soifua maloloina so'o se kamupani, a'oga po'o le mamalu lautele o le atunu'u ma fa'alapotopotoga fo'i e fia foa'i mo lea fa'amoemoe lelei.

FOA'I NUUULI VOCTECH HIGH - VASEGA KAMUTA I LE HOPE HOUSE

Ua mae'a le foa'i taua tele a le Vasega o Kamuta a le Nuuuli VoTech High po'o le A'oga Matata Eseese i le Nofoaga o Fa'amoemoega "Hope House" i Fatuoaiga i le taeao o le aso Tofi na te'a nei.

O lea foa'i taua, sa tu'ufa'atasia ai e le fanau a'oga o lo'o tau'avea mataupu tau Kamuta Fale, Fausia o Meaafale Eseese a latou oloa ua mae'a saunia lelei uma, ina ia fa'aaoga e le Hope House mo matua ua matutua, fa'atasi ma tagata o lo'o ua i ai afaina tumau o le tino ma le mafaufau o lo'o tausia fa'apitoa ai lea nofoaga.

O a latou foa'i na fa'ailoa mai ua i ai laulau, o kapoti e fa'aaoga mo le teuina o lavalava po'o meatotino a i latou o nofoia lea nofoaga o fa'amoemoega. O nisi o oloa o nofoa, e fa'aaoga mo ali'i ma tama'ita'i faigaluega fa'apitoa e tausia lelei o tatou matua matutua ma gasegase o lo'o latou va'aia i aso ta'itasi.

O nei oloa, o se foa'i a le fanau a'oga, fa'atasi ma o latou faia'oga o lo'o galulue ai e a'oa'o fanau i lea fo'i tomai aoga, ma le pulega fo'i a le a'oga o Matata Eseese a le tatou Malo.

O le tele o nei oloa e masani ona fausia e le fanau a'oga ma latou faia'oga e va'ava'aia lelei a latou galuega, ona toe fa'atau atu lea i le taimi o le fa'aaliga o Oloa gaosi e le fanau a'o a'oa'o i le Matata Eseese, peita'i ua faailoa mai e le tama'ita'i Pule A'oga, "Ua fai sina tele o oloa ua mae'a gaosia, ma ua loto le fanau ina ia foa'i mo lea Nofoaga o Fa'amoemoega, e aoga atili mo e matutua fa'atasi ma e mama'i e fa'aaogaina."

O lenei foa'i e faia ma le fiafia e le fanau, ma sa latou utaina uma latou oloa nei ma o atu fo'i ma o latou faia'oga e tuuina atu i le Hope House.

LEAI SE POLOKALAMA OFISA O FITAFITA TUAI - ASO FA'APITOA MO VETERENI

I le fa’amanatuina o le aso malolo mo Fitafita tuai, po’o vetereni i le aso ananafi i lenei tausaga, e leai se polokalama fa’apitoa a le malo o Amerika Samoa, ae ua na o le sauniga lotu sa faia i le aso Sa ua te’a i le EFKAS i Matu'u ma Faganeanea sa ta'itaia lea e le susuga Rev. Fouvale M. Asiata.

Ma o le aso To’anai ua te’a sa fai ai le siva a Vaega Au atoa e aofia ai le US Marines, USArmy, USCoast Guard; US Navy, US Air Force ma le USNational Guard. O lea fiafia e fa'aletausaga lona fa'atautaiga.

O lenei le tausaga e ese mai ai, aua o lea ua atoa i ai le 100 tausaga o le US Marine Corp.

Ua fa'asalalauina mai fo'i le fa'amanuiaga a le afioga le Faipule o Amerika Samoa i le Konekeresi, Aumua Amata mo fitafita tuai i le atunu’u, aua o lenei lava le aso, ua iloga ai se sao o le tatou malo ma ona tagatanu'u, ina ia manatua le latou tautua matavela sa fa'atino mai tafa o taua i nisi taimi, a'o nofoaga fo'i o vevesi ma isi tautua e toe fa'atula'ia mea na fa'aleagaina ona o ni fa'alavelave fa'afuase'i fa'anatura sa a'afia ai le Iunaite Setete ma Teritori o Amerika.

SAUNI MALISI FA'AILOGA 50 TAUSAGA TALU ONA FA'ATU A'OGA IINEI:

O A'oga a le Marist Brothers i le teritori, e aofia ai le Atu'u Marist Brothers ua tapunia fo'i, ma le Marist High School sa i Malaeloa ua tapunia fo'i, ae ua lualuagia ai nei le fa'aigoaina o le A'oga Maualuga a Marist Fa'asao High, ua latou fa'ailoa fa'alaua'itele, o lo ua nofo sauni i latou e fa'ailoga le atoaga o le 50 tausaga talu ona latou ulua'i tulaueleele ma fa'atutu a'oga i Amerika Samoa.

O nei a'oga uma e fa'amoemoe ma fa'alagolago tele i le lima foa'i, ma le malosi o le fa'asoa fa'aletupe a aiga ta'itasi o lo'o a'oa'oina latou fanau i nei a'oga uma.

O le to'atele o i latou ua tutula'i mai tofiga maualuluga i le Malo, Ekalesia ma pisinisi ae maise o fa'alapotopotoga, ua latou fa'afetaia lava le ulua'i fa'atula'ia o a'oga a le Ekalesia Katoliko e ali'i Felela a le Marist Brothers. "Aua o i latou nei sa maua ai le malamalama ma ua ala ai ona iloa ona faia galuega tele ona o le atamai sa masa'a mai le 'au Felela ae utupupuina e fanau a le atunu'u. Fa'afetai i le tou fai fanau, fa'afetai i la outou a'oa'o ma le a'oa'i, le fa'atonu ma le fa'apoto!"

O le tausaga 2019 o le a atoa i ai le 50 tausaga talu ona tulaueleele mai ai le vasega o Felela sa latou fa'atuina le Marist Brothers High School ma ua talanoaina fo'i e le vasega o tama tuai a le Malisi mo fuafuaga i lea fa’amomoe.

O le aso Toanai ua te’a sa faia ai le latou Ta'amilosaga Tapolo i le Lavalava Golf Course i Iliili ina ia saili tupe mo lea fa'amoemoe i le tausaga fou.

O lo'o lalamua ali'i iloga nei: Tauiliili Will Sword, Moseniolo Viane Etuale ina ia fa'amaopoopo mai le latou Asosi a Tama Tuai a Malisi, aua lenei fa'amoemoe, ma ua toe laga ai fo'i le mataupu tau le aoga o a'oa'oga a Felela ma Tamaitai Sa i na tausaga ua mavae, ua manuia ai olaga i le taimi nei.