BAOA ASCC TOE TALIU MAI SAMOA MALAGA FA'APISINISI - MAFUTA MA MATUA

I so'o se taumafaiga a fanau a'oga e tau'avea kosi fa'apisinisi i le Kolisi Tu'ufa'atasi a Amerika Samoa, e tatau lava ona mataituina le mamalu o Matua ia 'auai, ia malamalama lelei i le tele o mea aoga o taumafai i ai le a'oa'oina o fanau ia gafatia ona galulue i pisinisi ma nisi ofisa uma o le Malo, po'o le taumafai fo'i e atina'e aiga i le fa'atutuina o pisinisi tumaoti.

Peita'i i le kosi o lo'o tau'avea nei e i latou, e mana'omia ona va'ai patino le fanau i le fa'atautaiga o pisinisi ma oloa fa'atau atu i fafo po'o le mamalu lautele o le atunu'u, atoa ai ma ala o feso'ota'iga o tautua fa'atasi ma isi pisinisi i totonu o se malo.

Ona o lea tulaga, e faia ai lava malaga ta'amilo e asiasi i pisinisi i fafo atu o le tatou malo, ina ia iloa patino e le fanau, le gaoioiga a pisinisi, le latou sao i oloa fa'atau atu i le lautele po'o maketi i fafo, ae maise o ala o lo'o fa'alautele ai a latou pisinisi ia lauiloa ma mo'omia e tagata, ina ia alumia ai.

O i latou uma e tau'avea kosi fa'apisinisi ae auga i le Maketiina atu i fafo o Oloa, fa'atasi ai ma kosi tau Pulega o Pisinisi, sa fa'atulaga e malaga ta'amilo i Samoa fa'atasi ma lo latou faia'oga, ina ia mataituina e i latou pisinisi eseese i Samoa, ma ala o lo'o latou tautuaina ai tagata lautele ma maketi i fafo.

E to'afa fanau sa malaga i lenei tausaga, Elaine Misiluki, Jessie Faleafine; Elysha Samatua ma Gwendolyn Eseroma; ona o se tasi lea o agava'a e ao ina mautu i o latou sui taumafai e iloa fa'atautaia pisinisi, ia iloa lelei ala e maketi ai latou oloa fa'atau atu, ma ia va'ai patino fo'i o gaosia aga'i i ai oloa, ma fa'aleipo lelei fo'i oloa fa'atau atu ina ia le toe taofia i tulafono ma aiaiga o oloa fa'atau atu i fafo, ona e le'i lisia mea uma o gaosia ai oloa i o latou leipo.

E ese mai lea sa mua'i faia se molimau a le tama'ita'i faia'oga e tusa o lana lea vasega 2018. "O le vasega muamua lenei ua latou ausia togi a'ia'i o le usupo ma le tautuana o le taimi. E le'i mafaia lava e a'u ona muamua mai ia i latou uma nei e to'afa, Talu mai le 2004 na amatalia ai ona alu malaga ta'amilo nei, o i latou nei ua ausia le tulaga tau le tausisia o le taimi."

I le malaga i Samoa, na asia e i latou Uncle Johnny, lea e latou te gaosia le tele o faguinu suamalie e gaosia mai le esi, mago, moli, pasio ma mea uma fa'apena ae maise fo'i o Aisikulimi o ituaiga eseese, fa'aopoopo atu i ai ma le tele o ituaiga o kone mo le asuina o aisikulimi.

Na asia fo'i le fale gaosia fasimoli fa'apitoa mo foliga e fa'amomosi atili ai foliga, le "Mailelagi Samoa" lea e auina atu i Europa ma Amerika a latou oloa gaosi, o le fagu'u mo foliga, o le fasimoli e fa'amanogi lava lea u'u i le moso'oi ma le puatausaga.

O le Pisinisi fo'i sa latou asiasi i ai "Le Vai" ma sa latou mataituina le gaosiga fa'amama lelei o le suavai taumafa ma tu'u fagu ina ia fa'atau atu i fafo, a'o mautu le mama mai siama o fa'ama'i ma nisi mea e ono le mama ai le suavai taumafa mo tagata lautele. O lo'o fa'atauina le vai mama lea i faleoloa lava o Samoa - Upolu ma Savaii.

Na maimoaina e i latou le tapenaga ma le gaosiga o le Elei a tina o lo'o fa'atau atu a latou Oloa i le Maketi, atoa ai ma le eleiga o Mitiafu ma ie lavalava, fa'atasi ai ma la'ei ua mae'a ona su'ia. O i latou na sa latou toe tufatufaina atu i ai le tele o oloa na faimeaalofa ane ai ia i latou Pisinisi sa latou asiasi i ai. Ona e la'eia lava e i latou ofu o lo'o fa'ailo ai le Kolisi Tu'ufa'atasi, o lea sa latou taua'aoina fo'i pusa apa Wahoo mo Pisinisi ma le teutusi o lo'o i ai meaalofa tupe mo pisinisi uma sa latou asia.

O le pisinisi i Salafai sa latou asiasia o le "Swim with the Turtles" i Salelologa. O lea Pisinisi e fa'atautaia e le aiga atoa, ma ua o'o nei i le tusa ma le 24 Laumei ua i ai, ae matua lalata lava ma e iloa lelei e i latou le taimi e fagaina ai i latou.

I lea 'aiga fa'atasi ma matua, sa latou toe taua'aoina ai teutusi fa'ameaalofa, ona o le tapua'iga a Matua, ma lo latou sao e sapaia fo'i a latou taumafaiga i a'oa'oga.

Na tofu meaalofa fo'i le vasega o le fa'auluuluga a le Kolisi sa auai, Peresetene Rosevonne Pato, le sui Peresetene Lina Scanlan, Pule o Mataupu Tauave i le Kolisi ma isi na aofia. Na tomuli mea uma i le 'aiga fiafia ma le tapenaga matagofie a le vasega e maimoa a latou ata fa'asolo o mea uma sa latou i ai ao asiasi i pisinisi i Samoa.

O lea vasega, ua agava'a ai le fanau ina ia mafai ona latou pasia vasega mo fa'ailoga maualuluga i kosi fa'apisinisi i Iunivesite, ma ua atoa i ai le tomai e mo'omia e le fanau a'oga ina ia iloa lelei fa'atautaia le pisinisi ma fa'atulaga ana tupe maua, ia olaola pea ma fa'alautele atili lana tautua.

MATAUPU SA FIA TALANOAINA MA LE DOI - AUMALAGA NA MASI'I ATU

O le mataupu muamua lava sa tatau ona talanoaina ma le DOI e le au malaga na masi'i atu i Uosigitone, lea ua mae'a talanoa nei ma le susuga Doug Domenech, o le Falefono ma lona fausaga.

Lona lua o le tulaga o le Pemita a le Star Kist e mafai ai ona fa'aalu le lapisi o le falei'a i le sami ma le mataupu lona tolu o le fa'atupega o le Hawaiki Cable.

O le aumalaga lea a le Malo na ta'ita'ia lea e le susuga le Lutena Kovana Lemanu Peleti Mauga ma sa maua le latou avanoa e talanoa ai ma le susuga le Sui Failautusi o le Initeria, Doug Domenech ma Nikolao Pula.

O le mataupu tau le Fale Fono ua fa'atulaga ai le fonotaga fa'apitoa a le tatou aumalaga lenei ma le vaega tonu a le FEMA Region 9 i Oakland, Kalefonia, ina ia taumafai ona feutagai i se ala e mafai ai ona toe pasia mai lea fa'aauau o le galuega lea o le tatou fale Fono fou.

MOLIA LE TOALUA O LE CEO UTOS - MASALOMIA SA FAIA SONA SAO I LEA SOLITULAFONO

Ona o lo'o to'atele fo'i nisi o lo'o teuina latou tupe teumau po'o inivesi i le UTOS i Samoa, o lea e ao ai fo'i ona fa'alauiloa atu le maliu fa'atopetope o le tama'ita'i sa avea ma CEO po'o le Pule sili o le UTOS, Central Bank i Samoa.

O le tama'ita'i o Sa'u Justina Sa'u o se tasi ua sili ona leva lana tautua i lea vaega o le Faletupe Tutotonu o Samoa [Central Bank] ma na sailia e ali'i leoleo su'esu'e se mafuaga tonu ua maliu fa'afuase'ia ai o ia.

Sa a'ami fa'apitoa mai le ali'i foma'i su'esu'e mai Niu SIla, na te fa'atautaia le suesuega fa'apitoa i le tino maliu o le tama'ita'i CEO ma ua maua ane ai i fa'amaumauga i sailiga nei, sa fasiotia o ia.

Ua lipotia e leoleo i Samoa e moni ua saisaitia nei le susuga Kolani Junior Lam, le to'alua o Sa'u Justina, ona ua masalomia o ia i le mafuaga ua maliu ai le tama'ita'i CEO o le UTOS.