FOA'I McDONALDS $6,000 - SAMOANA JAZZ & ARTS FESTIVAL

O le aso ananafi, Novema 8, 2018, na taua'aoina atu ai e le Pulega a le McDonald's American Samoa le siaki e $6,000 i sui o le Samoana Jazz & Arts Festival e fesoasoani ia i latou i le koneseti o le a fa'atautaia i le fa'aiuga o lenei vaiaso.

O le a mua'i faia lea Fa'aaliga o Taleni Pese & Tata Fa'aili ia Novema 10, i le faletalimalo o le Tradewinds Hotel ma le aso Novema 11, e faia i le Gov. Rex Lee Auditorium i Utulei. O lea fo'i koneseti ua auai fa'apitoa mai ai nisi ua iloga i lea taleni mai Hollywood, o se alo o se tasi o tama'ita'i Samoa sa iloga i lea taleni o le fa'afiafia ma le Pese.

E le gata i lea ae o lo ua avea fo'i ma avanoa lelei e fa'aalia ai taleni pese ma le fa'afiafia ma tata i mea fa'aili a le mamalu o le tatou atunu'u.

"Ona o lenei vaitau ua matele le fanau ina fa'aaogaina masini fa'aneionapo ua mae'a fa'aofi i ai i ona polokalama eseese fatuga ma le taina, ua le toe manatu ai le tupulaga ina ia fia iloa ona tata Kitara, ukulele, kamepelau, ta okeni ma piano, fa'apea ma le fatu o au lava pese ma toe fati ina ina matagofie le fa'afofoga i ai a tagata fia fa'alogologo musika, lea la ua toe taumafai ai ona atina'e le taleni i le tatou malo nei. Aua lava ne'i mamulu atu lea taleni aoga tele mai le lumana'i o le atunu'u,” o se tala lea na tau fa'amalamalama ai e le susuga Vaito'a Hans Langkilde le manulauti o tau toe fa'aolaola nei e le Samoana Jazz & Arts Festival.

Ua sapaia fiafia e le Fale'aiga o McDonalds lenei fa'amoemoe, ma ua iloga fo'i, e le na'o lea le pisinisi ua tula'i mai ma fesoasoani i lea fa'atofala'iga i le atunu'u, ae ua talia fa'afatueleele e i latou le meaalofa ua taua'aoina e le afioga Tautolo Charlie ma le Fanau ma le McDonalds American Samoa.

O le tama'ita'i CFO Delores Tautolo ma le Pule o Maketi a le McDonalds Katie Leilua sa fai ma sui o le Pulega ma le Aufaigaluega a le McDonald's American Samoa, fa'atasi ai ma lona CEO Tautolo Charlie Tautolo, ina ia molita'i lea fesoasoani i le Samoana Jazz & Arts Fest i le latou lala i Tafuna.

Na saunoa Vaito'a ina ia fa'afetaia le foa'i, o se foa'i fo'i ua latou mana'omia, ma e fa'afetaia ai le agaga fesoasoani mai o lea Kamupani i taimi o le mana'omia ona o taligamalo ia i latou fo'i o le a malaga mai fafo mo le fa'afiafiaga.

FOA'I LBJ WOMEN'S AUXILLARY - $10,000 - PULEGA FALEMA'I LBJ

O le Pule Sili o le LBJ Medical Center, Faumuina John Faumuina, sa taua'aoina i ai i le taeao ananafi e le Sosaiete a Tina galulue e le totogia, Women's Hospital Auxillary, le latou meaalofa e $10,000 ua mafai ona maua i le fa'aiuga o lenei tausaga fa'aletupe ia Oketopa 2018.

Ona o lo'o fa'agasegasea le tina Peresetene o le Auxillary, Suni Felise, o lea sa maua ai le avanoa o le tina Sui Peresetene Eseta Sili Sataua e taua'aoina aloaia lea siaki mo le LBJ.

Ua aofia fa'atasi ma ia o le nisi o totino o le Auxillary, e to'atolu, ma ua fa'ailoa fo'i le fiafia tele o Faumuina ina ua asiasi atu nei tina volenitia, ae taua'aoina lea foa'i tele mo le falema'i

Ua matou iloa, o lo'o ia te oe le tofa e te silafia lelei ai pili e ao ina vave totogia ma e aoga tele mo le auaunaga mo tagata lautele. O lea ua taua'ao sa'o mai ai le siaki, e fa'afaigofie ai ona maua mai ni vaila'au, po'o a lava mea ua e silafia e ao ina muamua totogia, ia mautinoa ua faigofie galuega a ali'i ma tama'ita'i foma'i ma tausima'i, ia fa'afailele le soifua o le atunu'u, ma tausia lelei i latou ina ia toe maua le malosi,” o se tala lea a Eseta Sataua e tusa o le foa’i.

O le faleoloa lea o lo'o i totonu o le lotoa a le falema'i, o le ala lea o sailia ai le seleni e fa'aputuputu e le Woman's Auxillary e toe taua'ao atu i le Pulega ina ia fa'aleleia atili ai le tautuaina o tagata lautele e le falema'i tele i Faga'alu.

Ua ia ta'ua fo'i, "Sa masani ona fa'aulu atu mana'oga o vaega eseese a le falema'i, ona matou fa'atauina lea ma fa'atupe se'ia o'o lava ina taua'aoina aloaia i lena vaega o le falema'i, peita'i ua matou fono ma ua pasia ai, e sili ona foa'i tupe ia mautinoa, ua taumafai e totogia nisi o tatou pili e sili ona mo'omia ona vave fa'ate'a, ia mautinoa o lo'o sologa lelei pea le tautuaina o le soifua ma'ale'ale o le atunu'u."

O le taimi nei, o lo'o to'avalu i latou o loo avea ma totino o le Auxillary. Ua aofia ai i lena aofaiga o tina matutua ma le vasega o nai tama'ita'i talavou o lo'o galulue lava i le tatou faleoloa i aso ta'itasi, ae aunoa lava ma se totogi.

"O le to'atele lava o nai tina e maua taimi e o mai ai e faia lenei tautua, peita'i e iloa e i latou e le o totogia lava i aso uma i matou, ona le toe maua lava lea o se feso'ota'iga. Peita'i o lo'o tele le avanoa e fia maua ai nisi tina ma tama'itai e fia tautua i le mamalu lautele e ala i le galue fa'atau oloa, ae le totogia. A'o maua sou taimi e fia fa'aaoga tatau mo se tautua i le mamalu lautele ae le totogia, ona e asiasi ane lea i le faleoloa lea i le lotoa a le LBJ Medical Center ma fesiligia nisi o totino matutua ua mae'a fa'ailoa atu suafa i luga,” o se tala lea a Eseta.

PAGO PAGO TRADING FOA'I $10,000 SAMOANA JAZZ & ARTS FEST.

O le Kamupani a le Pago Pago Trading Company ua avea nei ma se tasi o pa'aga a le Samoana Jazz & Ars Fest ina ua latou taua'aoina se foa'i tupe e $10,000 mo le latou fa'amoemoe lea e loma nei i le fa'aiuga o le vaiaso.

Ua fiafia tele i latou ona ua maua se avanoa e fa'afiafiaina ai le atunu'u e toe faamanatu le olaga o se tasi o ana tama fanau, Mavis Rivers.

E le o gata ai i le foa'i mai o Kamupani e ala i tupe, ae ua fesoasoani mai fo'i le to'atele o nisi ua ofo mai a latou tautua i le tele o mea o mana'omia e le Samoana Jazz & Arts Fest i le taumafaiga e fa'atautaia le fa'aaliga ia leai ma se fa'aletonu i nei afiafi e lua, Aso Faraile i le Tradewinds ma le aso To'ona'i i le Gov. Rex Lee Auditorium i Utulei.

O le tama'ita'i CEO Ella Gurr, sa mafai ona ia taua'aoina lea meaalofa tupe i le susuga Ali'itama Sotoa o le Samoana Jazz, ma ua tu mati'e nei lea meaalofa tupe i meaalofa uma ua taua'aoina mo lea fa'amoemoe i le Samoana Jazz & Arts.

O le agaga fa'afetai lava sa fofogaina e Sotoa i le taimi na talia ai lea foa'i, ma ua lagona ai le mafanafana fo'i o le agaga fa'asamoa o le Foa'i i taimi fa'apenei e talimalo ai ma taumafai ai e tu'ufa'atasia se taumafaiga ia mautu ma lelei.

Na aofia fa'atasi fo'i ma Sotoa o susuga ia Vaito'a Hans Langkilde ma Peta Siulepa o le Komiti Fa'afoe o le Samaoana Jazz.