Ads by Google Ads by Google

Tala I Vaifanua


O se va'aiga i le vaega o le Kula o Palolo ua fa'asoa mo le to'atele e le'i ta palolo ae maua le $20 e tali ai le mata'ai. [ata: Leua Aiono Frost]

TELE LE PALOLO - ULU O LE MALAE VA'ALELE:

 

Ua mae'a le aso na tu'upoina ma momo'o le to'atele ina o'o maia ae se'i tali le mata'ai, lea ua iloga ona matua fa'atumulia le kula soso'o ane ma ulo ae ua fa'atau atu fo'i i nai tau e gafatia e le to'atele, ina ia tali lava le mata'ai.

 

"O le mea lea sa i ai, o le tuai lava ona asu, ae o le palolo latou sa sau potopotoi mai ma sa mata'alia lava fo'i le au faifaiva ina ia lava ma lulu'u le aso lenei,” o le tala lea a se tasi o le auva'a, o lona ulua'i taimi lea ua avea ma se tasi e ta palolo, ae o se mea sili ona fiafia ai, aua sa tau atu lava i luga o le va'a.

 

"O le mea afai o mea ua misi atu i lata mea ta palolo ua se'e atu i le auau, ma e avea ma a'i o nisi o lo'o ta palolo mai i uta, ae o le tala e le tasi fo'i se va'a sa matou faifaiva fa'atasi i le Ulu o le malae va'alele."

 

O nisi na o fa'amatalaga a le au faifaiva na latou taina se kula o le palolo, ave'esea le isi vaega i tua i le aiga aua le mata'ai o le to'atele ma ave fa'amomoli i fafo, ae aumai i le Maketi i Fagatogo le afa kula tele e fa'aipu ai ma fa'aafifi, ina ia fa'atau atu mo se seleni fo'i a tama Tautai ma le aufaifaiva mata'alia.

 

"Ona o le i'a ua sau fa'auma masina, sa matua taupulea lea aso ina ia matua'i sasa'a le sau a le tama'ita'i o le tai, aua afai ae ela le fuafuaga tonu o le i'a, e atoa le tausaga o tatali fo'i le mata'ai latou se'ia mae'a le tausaga atoa."

 

Sa fesiligia fo'i i latou pe na tapena ni ula aua le fa'amanogia o le tai, ae tali i latou, "E leai, atonu lava o lo'o gasese i ai le au ta lea e i uta i le matafaga, ae o matou, ua o lava i tai momoe ai po'o le tolu itula ma asiasi le i'a i le taimi e a'e mai ai."

 

O tala fiafia lena o lenei vaitau, sa maua le avanoa e vala'au ai i nisi o aiga o lo'o maua telefoni ina ia asiasi mai i le Maketi i Fagatogo o lo'o fa'atau ai le sosia o le tai i lenei tausaga.

 

TAOFIA SI'ITAGA TOTOGI TUTUA O LE OFISA LESITALA

 

O le si'itaga o le totogi o tautua a le Ofisa o le Lesitala sa tatau ona fa'amalosia ia Oketopa 22, 2018, ua toe taofia nei, e tusa ma se poloa'iga a le susuga le Loia Sili, lea e fa'auluulu i ai le Ofisa o Lesitala a le Malo.

 

O le si'itaga a lea Ofisa sa fa'asalalauina fa'alaua'itele i le masina au te'a ma sa fa'alauiloa fo'i, afai e i ai se fa'atuiese po'o sou taofi fa'aalia e tusa ma ia si'itaga o le totogi o tautua e ao ina fa'ao'o ane i se tusitusiga a'o le'i mae'a le aso 1 Oketopa, 2018.

 

Ua fa'ailoa mai e le susuga le ali'i Pule o le Ofisa o Lesitala, Taito Sam White, "I le taimi nei, e na'o le lua lava tusi ua mae'a taua'aoina atu e tusa o se finagalo fa'aalia patino i le si'itaga o tau o tautua o fa'atino e le Ofisa o Lesitala.”

 

O ia tusi e lua, e tau fai tete'e uma lava i le si'itaga o totogi o tautua.

 

Ua fa'ailoa mai fo'i e Taito, "E le'i muamua faia ni fonotaga fa'alauaitele e tusa ai ma ala o le tulafono e fa'atatau i lea si'itaga ua mae'a fa'asalalau fa'alaua'itele. Ua mafua lea tulaga, sa tatau ona faia pe a atoa le lima o tusi ua matou failaina, e tete'e i le si'itaga. Peita'i o lea e na'o le lua tusi ua taulimaina."

 

"A atoa loa le lima o nei tusi mai so'o se tasi e tete'e ai i le si'itaga lenei, ona fa'ato'a fa'atulaga loa lea o se fono fa'alaua'itele."

 

O suiga o totogi o tautua a lea Ofisa, ua fa'ailoa mai nei, ua fai lava si maualuluga tele nai lo le tau sa i ai muamua.

 

Mo se fa'ata'ita'iga, o le totogi mo se lesitalaina o se fanua po'o se totogi fo'i mo lou tete'e i se fa'amauina o le suafa matai ua $500 a'o o le totogi sa i ai ma o lea e le'i suia lava e na'o le $5.00. O le lesitalaina o se fanua sa na'o le $12 ae sa fuafua e si’i i le $100.

 

Ina ua fa'atalanoaina lea tulaga i le fono faitulafono i lana tauaofiaga ua fa'ato'a mae'a atu nei, sa tali lava le susuga le Loia o le Ofisa o le Lesitala, Andrew Sunia, "O le si'itaga o totogi o le Ofisa o Lesitala, o lo'o muta mai lea i le si'itaga i le tausaga 1987, ma o lo'o fa'aaogaina pea na totogi e o'o mai i le taimi nei."

 

Na saunoa fo'i le ali'i Loia ma ia fa'ailoa ai, "O le totogi ai na'o le $5. mo le taofiga o se suafa matai, ua o se mea e fa'ailoa mai ai, e le taua tele le suafa pe a fua i ai i lona totogi. E ao ina mua'i tamau le taua o lea gaoioiga i lona tau e tatau ai."

 

Ua ia fa'ailoa fo'i, "Atonu o le taugofie tele o le toe tete'e i se fa'amauga o le fanua ma suafa matai, ua mafua ai ona to'atele i latou e nonofo i fafo atu o Amerika Samoa e toe fa'aulu mai latou taofiga."

 

FA'ATAUTAIA TAUTUA TETE'E I E SOFA'I SO'OTAGA FA'A-INITENETI

 

E mautinoa e faitau miliona tupe na lusi a le Malo ina ua sofa'i e le vaega o tagata solitulafono laina o so'otaga fa'ainiteneti ma maua fa'alilolilo ai ala e ave fa'agaoia ai vaega tupe sa tatau ona totogia ai pili a le Malo aga'i atu i faletupe ma pisinisi i fafo.

 

Ona o lea tulaga ua fa'atautaia ai se semina fa'apitoa e le Matagaluega o le Puipuiga o le Saogalemu Fa'alotoifale (ASDHS) ina ia a'oa'oina lelei i latou uma e faia nei ituaiga fefa'ataua'iga i luga o le Initeneti, ina ia le toe tupu mai lea pagatia.

 

Ua i ai fo'i su'ega fa'apitoa e mafai ona latou siakia a latou laina o feso'ota'iga ma iloa patino ai, po'o ua aga'i ina sofa'i mai lau laina o so'otaga fa'ainiteneti po'o lau Uepesite e le au gaoi lea.

 

Ua fa'atautaia nei lea matagaluega se so'otaga fa'apitoa ina ia mafai ona fa'ailoa ai i matagaluega ta'itasi ala e iloa ai o lo'o sefe mai oe i nei vaega o e sofa'i so'otaga nei, pe o le a fo'i sau gaoioiga e faia ina ia le mafaia e le au sofa'i so'otaga o initeneti ona ulu mai i lau Uepesite po'o lau Upega Tafa'ilagi.

 

Ua faia e i latou asiasiga i a'oga, ina ia iloa e le vasega o sui o lo'o tausia fa'amaumauga a nei a'oga uma, ala e siakia ai Uepesite mai le sofa'i mai fafo, po'o ala fo'i e mafai ona tausia lelei ai le saogalemu o Upega Tafa'ilagi a lau Sosaiete, Fa'alapotopotoga, Kamupani ma tagata taito'atasi.

 

E le taugofie lenei tautua, ae ona o le agaga ina ia tumau le saogalemu i fefa'ataua'iga i luga o le Neti, ma le saogalemu o fa'amaumauga fo'i o lo'o fe'avea'i i lau Upega Tafailagi, e ao ai ina tatou galulue fa'atasi ma lea matagaluega e tau ma tete'e atu i e sofa'i mai lo tatou saogalemu i luga o so'otaga a le Initeneti.