Ads by Google Ads by Google

Tala I Vaifanua


Tumau pea lava le talita a le Ta'amilosaga Volleyball a Ali'i i le 'au malosi a le Annex malo le tauata'i ma le fa'ato'atoa. [ata: Leua Aiono Frost]

TAUVA STEPAHNIE & DANIELLE FLOOR I LE HANDBALL & PI'IGA - GANNON UNIVERSITY

 

Ua mae'a le taumafaiga a le tatou Au Handball a tama'ita'i talavou mai Amerika Samoa sa malaga atu i Buenos Aires, Argentina mo le Youth Olympics ma ua le fa'amanuiaina i le Pine Auro e pei ona latou fa'anaunau i ai. Peita'i e ui i lea tulaga, ua toe taliu mai ma le manuia i latou uma sa malaga, ae o nisi o le latou 'au ua amatalia a'oga na fa'anaunau i ai pe a mae'a loa ta'aloga i Argentina.

 

O i latou ua amatalia taumafaiga i fafo i Iunivesite e aofia ai Stephanie Floor ma lona uso o Danielle Floor.

 

"Ua amata nei ona koleni fo'i e a'oa'oina lelei i le pi'i. O se tasi o ta'aloga e fiafia fo'i i ai lo ma tama, ma o le Iunivesite lea ua a'e atu i ai Gannon University, e maualuga tele le latou polokalama o ta'aloga i pi'iga. Ua leva fo'i ona koleni i ma'ua e le ma'ua tama i ta'aloga pi'iga, peita' e le mafai ona tauva i ma'ua i Amerika Samoa ona e le'i fa'aa'e le pi'iga i le itupa o tama'ita'i,” o se tala fiafia lea a Stephanie Floor.

 

I le aotelega o le taimi sa koleni ai i la'ua e lo la'ua tama, e tusa ma le 10 tausaga talu ona a'oa'oina lelei i la'ua e Carl Floor Sr., Peresetene fo'i o le Handball Association i Amerika Samoa.

 

I lea 10 tausaga, ua molimau mai le tama'ita'i o Stephanie, "E ta'i lua afiafi o le vaiaso e tasi e koleni ai i ma'ua uma i le pi'i, fa'afetai la o lea fo'i ua tali mai lea avanoa mo i ma'ua uma. I le taimi nei ua maua laua avanoa e ta'a'alo ai i le pi'i ma fesoasoani fo'i i le fa'atupega o la'ua a'oa'oga i Gannon University i Erie, Pennsylvania.

 

Ua mae'a fo'i le taumafaiga a le au Handball a tama'ita'i lea sa fa'atasi atu ai le 'au mo le ta'amilosaga a tama'ita'i talavou a le Olimipeka, e le'i lautogia le tatou 'au i se pine, ae o le mea sili lava ua mafaia e i latou na ta'ua ai le igoa pele o Amerika Samoa i le Olimipeka a Tupulaga Talavou.

 

"I le taimi nei, ua amata a'oa'oga a Stephanie ma Danielle ma e le muta ai fo'i i lenei tausaga le la'ua taumafaiga i faagatama e ta’ua ai pea le igoa o Amerika Samoa. O le a fa'aauau lava ona koleni i le Handball fa'atasi ma le Pi'iga a Tama'ita'i a'o a'o'oga i la'ua i le Gannon University,” a Carl Floor Sr.

 

2 SUI TAUVAGA TEUTEUTINO IFBB SOUTH PACITIC OCEANIA COOKS & SPAIN

 

Ua fa'ailoa mai e le Sauia IFBB Body Building & Fitness Federation, ua suia nei i tatou e le susuga Mikaele Aunoa i le tauvaga tino lelei a le Oceania 2018, o lo'o faia i Rarotonga, i le Atu Kuki.

 

O vaega o le a tauva ai Aunoa e aofia ai le Classic Bodybuilding ma le Classic Physic Championships.

 

O ituaiga teuteu tino lea e amata mai le manava ma le fatafata ma lima, ae le taulia ai vae, ma o le mafuaga fo'i lea e mafai ai ona ofu ofuvae gata i tuli o i latou e tauva ai. O le tauvaga i le Atu Kuki e amatalia lea ia Novema 03, 2018. O lo'o malaga Aunoa ma lona faletua i lea tauvaga.

 

O le susuga Brock Goodwin, o le a malaga atu e suia Amerika Samoa ma le Sauia IFBB Body Building & Fitness Federation i Spain, lea e amatalia lea tauvaga ia Novema 7-12 ma e fa'amasinoina fo'i Brock Goodwin i le Classic Bodybuilding, Classic Physic Championships & World Men's Physique Cup.

 

Talosia taumafaiga a tatou sui nei, pe tua ma ni a i lea fo'i fa'agatama.

 

TUMAU PEA TALITA - ANNEX ALII TEAM  & BTI TAMA'ITA'I - LIKI O FA'ATAUTAIA NEI

 

I lua vaiaso talu ai na faia ai ta'aloga faitaulia mo le fa'asologa o le Ta'amilosaga Volleyball o le Talita i vaega e fa o lo'o fa'atauva ai 'au a Ali'i ma Tama'ita'i ae maise o 'au a tupulaga talavou e i latou ane o le 19 tausaga i tama ma teine fo'i.

 

O lo ua aga'i atu ina mae'a lea liki ae tapena fo'i le American Samoa Volleyball Federation ina ia fa'atautaia le latou Liki Volleyball mo le Moso'oi 2018, lea e tolopoina ona o lo'o taofia malaga a le Lady Naomi mai Samoa, lea e matele ina taugofie ai femalaga'iga i le va o Samoa na lua mo a'u Volleyball e masi'i mai mo lea ta'amilosaga.

 

I le taimi nei ua tula'i mai pea le mau pea o le talita a Tamaita'i i le au malosi a le BTI mai Nuuuli ae o lo'o ua tolu nei vaiaso o ta'aloga o lo'o tumau fo'i le talita i le a'ao malosi o le Annex Men's Team.

 

O ta'aloga sa faia i le vaiaso na te'a nei, aso To'ona i le Faleta'alo i Malaeloa, ua mae'a fa'amauina mai ai ta'aloga nei.

 

Ta'amilosaga Tama'ita'i Ta'aloga faitaulia na ta'a'alo ai: BTI vs Amouli malo le BTI. Soso'o lea ma le ta'aloga a le Crew Cuts ma le Laga'ali malo Crew Cuts. O le fetauiga i le va o le 'au malosi a Amouli ma le  Sideout, na manumalo ai Amouli; soso'o lea ma le ta'aloga faitaulia i le va o Lauli'i ma le Sideut, na malo ai Lauli'i. Fetaui le au malosi lea a Amouli ma le 'au fo'i a Laga'ali ma na malo fo'i Amouli. Toe ta'aloga i le va o le Crew Cuts ma Lauli'i na toe malo Crew Cuts, ma ua fa'atalia nei le taimi e ta'a'alo ma le BTI i le talita.

 

Ta'aloga Faitaulia i le Itupa o Alii U19: O le au a le Lupelele sa fetaui ma le au malosi mai Pago Pago o le Laumuatasi na malo tama o le taulaga Laumuatasi i lea fetauiga malosi, 2 seti i le tasi a le Lupelele. O le 'au a le Annex na fetaui ma le Ali'itaoso, ua malo ai le Ali'itaoso ma i latou fo'i ua mau ai le Talita a le U19.

 

Ta'aloga Itupa o Ali'i: O ta'aloga a Ali'i na tatala malae ai le 'au a le Islanders ma Lauli'i na malo le Islanders mai Aunu'u i le lua seti i le tasi a Lauli'i. Fetauiga a le Laumuatasi ma le Outsiders na malo ai le Laumuatasi ia latou seti e lua. Ta'a'alo lea o le Islanders ma le Filemu na malo lea o le Filemu i le 2 seti i le tasi a le Islanders. Ao le fetauiga a le Pakka Uso ma le Sinapi mai Failolo na manumalo ai a'ia'i ai le Sinapi i le lua seti i le tasi a le Pakka Uso. Puataunofo na toe fetaui ma le Outsiders ma malo ai le Outsiders i le lua seti i le tasi a le Puataunofo. Ta'aloga mulimuli o le Talita i le va o le Annex Mens na lu'ia e le Le'auva'a na toe suipi ai fo'i le Annex ma ua tolu ai nei vaiaso o taofiofia pea e le Annex le talita o lenei ta'amilosaga.

 

O le aso To'ona'i nei o le a toe fa'aauau ai lenei ta'amilosaga ma ua fa'ailoa mai e amatalia i ta'aloga a tama'ita'i ma le Tupulaga talavou ta'aloga faitaulia o lea aso.