O le vaiaso nei na molia ai e le malo ni ali’i pagota se to’atolu o loo taofia i le toese i Tafuna, ona o le fa’alavelave lea na manu’a tigaina ai se isi ali’i pagota ina ua latou fasi fa’amo’amo’a ia te ia i le 2 vaiaso talu ai.

O i latou e to’atolu ua molia e aofia ai Manu Lefatia, Reggie Va’avale ma Asofa Titio. O loo molia i latou i moliaga mamafa ta’i 2 o le faaoolima i le tulaga lua atoa ai ma le taofia faapagota o se tagata, faapea ai ma le moliaga mama o le faaoolima i le tulaga tolu.

E ui o loo taofia i latou i le toese mo isi fo’i moliaga, e ta’i $20,000 lea ua fa’atulaga e le afioga i le ali’i Fa’amasino ia Fiti Sunia e tatala ai i latou i tua.

TAGI A LE MALO

O se fa’alavelave na tula’i mai i le toese i Tafuna i le taeao o le aso 20 o Oketopa, 2018, na mafua ai ona talosagaina e le Sui Komesina o Leoleo ia Falanaipupu T. Sagapolutele le Vaega e Suesueina Fualaau Fa’asaina a le Ofisa o Leoleo, mo le fa’atautaia o se suesuega e uiga i lenei mataupu.

O le ali’i Leoleo Suesue ia Det. L. Tafaovale na tofia na te ta’ita’ia lenei su’esu’ega, faatasi ai ma le lagolagosua a isi fo’i Leoleo Su’esu’e. Na amata le suesuega i le fesiligia lea o nisi o Leoleo o le toese sa galulue i le taeao na tula’i mai ai le faalavelave, atoa ai ma nisi o pagota sa mafai ona latou molimauina manu’a i le tino o le ali’i pagota na a’afia ia Nick Mataia.

Na taua e le Leoleo o le Falepuipui ia Mila Mila i Leoleo Suesue e fa’apea, a o ia aga’i atu i le tulimanu o le Falepuipui o le Bravo Unit, sa ia iloa atu ai le isi pagota e igoa ia Va’a o loo fesoasoani e tau ta’ita’i ma si’i le ali’i pagota o Mataia i totonu o le Bravo Unit. Ina ua fesiligia e Mila ia Va’a poo le a le mea ua tupu, na tali Va’a, o Mataia o loo ma’i, fa’atoa uma fo’i ona pua’i (tulou).

Na vaaia e Mila le pisia o foliga o Mataia i le toto, o lea na la fetagofi atu ai loa ma le isi alii pagota ia Sui Tago Jr ma si’i Mataia i luma o le Ofisa, ma faafesoota’i ai loa e Mila le EMS mo se fesoasoani.

Na fesiligia e Leoleo Suesue le isi Leoleo o le Toese, le susuga ia Iulio Afoa. O Afoa, na tofia e tiute ma vaaia pagota o loo taofia i totonu o le Bravo Unit i le aso na tula’i mai ai le fa’alavelave.

Na taua e Afoa i Leoleo Suesue e fa’apea, ina ua uma asiga a aiga o alii pagota, na ia alu atu ai loa mo le kiliaina o le Bravo Unit, ina ia mautinoa ua i ai uma pagota i totonu o a latou sela. Ao fa’agasolo lana galuega, sa ia vaaia Mataia o loo talanoa mai ma Lefatia, Va’avale ma Titio i totonu o le sela a Lefatia.

Na fa’ailoa e Afoa i ali’i pagota ia e to’afa, o lea la’a tapuni uma sela, e tatau ona fo’i le tagata i totonu o lona sela, peita’i na talosaga Lefatia ia Afoa, e tu’u atu se taimi e fa’auma ai le latou talanoaga ma Mataia i nai mataupu fa’aleaiga.

Na talia e Afoa le talosaga a Lefatia, ma ia aga’i atu ai loa e momoli isi pagota o loo mananao e fia o i luma o le Ofisa. E lei umi se taimi na ia alu ese atu ai, ae toe fo’i atu loa i le Bravo Unit o loo galue ai, ae fa’afuase’i loa ona ia vaaia le ta’avale a le EMS i totonu o le lotoa a le toese, ma ia iloa ai, ua manu’a Mataia ina ua fasi fa’amoamo’a e isi pagota.

Na fesiligia e Leoleo Suesue le ali’i pagota ia Peniata Ala, o ia lea e potu ma Mataia. Na taua e Ala i Leoleo Suesue e faapea, ao la nofonofo ma Mataia i totonu o le sela, na alu atu Titio ma asi atu mo se ipu mea’ai. Na la ave i ai le ipu mea’ai ona toe fo’i ai loa lea o Titio i lona sela. E lei umi ae toe fo’i atu Titio ma fai atu ia Mataia, o loo mana’o Lefatia e fia talanoa ia te ia.

Na talia e Mataia le talosaga ma la aga’i atu ai loa ma Titio i totonu o le sela a Lefatia. E lei umi se taimi ae maua e Ala le tala, ua manu’a Mataia na fasi e isi pagota.

Na fesiligia fo’i e Leoleo Suesue ali’i pagota e to’atolu o loo tu’uaia i lenei mataupu. Na taua e Titio e fa’apea, na mafua ona alu i le potu a Mataia, na alu e asi ipu meaai, ae na te lei fai ia Mataia o loo mana’o Lefatia e fia talanoa ia te ia.

Ae o le ali’i o Va’avale, sa ia teena lona a’afia i lenei mataupu. Na ia faailoa i Leoleo, e le faia sana fa’amatalaga e tusa ai o le mea sa tupu, na te le iloaina fo’i se mea sa tupu. Ae na taua e Lefatia i Leoleo e fa’apea, o ia na fesoasoani i le solo ese ina o le toto na pisia ai foliga o Mataia, ina ua ta’ita’i atu e le ali’i pagota ia Va’a. Ina ua mae’a ona ia fesoasoani ia Mataia, sa ia fai loa ia Va’a e ave Mataia i luma o le Ofisa mo se fesoasoani.

Ae ina ua fesiligia e Leoleo Suesue ia Mataia, sa ia taua ai e faapea, o ia na alu i le sela a Lefatia ina ua alu atu Titio ma fai atu ia te ia, o loo fia talanoa Lefatia ia te ia. O le taimi lava na taunuu ai i totonu o le sela, na fa’afuase’i ai loa ona tu’i e Lefatia o ia ma pau ai i lalo. Sa ofo atu fo’i Titio ma fesoasoani i le ta tu’iina o ia. O le ali’i o Va’avale, o ia lea sa uuina se filifili, lea na fa’aaoga e Lefatia e sasa ai ona foliga toe titina ai lona ua.