BEN S. SAUVAO - PERESETENE ASVF AVEA MA SUI TAITAIFONO OCEANIA SONE I SASA'E

O le susuga le ali'i peresetene o le Asosi Volleyball a Amerika Samoa (ASVF), Ben Solomona Sauvao, ua tofia nei i le fonotaga a le Oceania ia Setema 2018, e avea ma sui Taitaifono o le Oceania Sone i Sasa'e - e aofia ai Amerika Samoa, Samoa, Tahiti, Tonga, Tuvalu, Tokelau ma Atu Kuki.

Ua fa'ailoa mai i le palotaga sa tauva ai o ia fa'atasi ma le sui mai Tahiti i lea tofiga, ae fa'afetaia ua tatou manumalo. Ua ia fa'ailoa fo'i, "Fa'afetai mo Samoa aua o le latou palota lea ua ou pale ai, sa tatali ina ia sili ai palota mo a'u."

O le aoga o lea fo'i tofiga mo i tatou e ala i mataupu e talanoaina mo ta'amilosaga a le Oceania i le fa'agatama o le Volleyball, ona e mafai ai ona maua se leo o Amerika Samoa ma Samoa i ta'amilosaga a le Oceania.

E lua tausaga o avanoa pea lea nofoa, ae ta'i lua fo'i tausaga ma toe palotaina. I le taimi nei o le Peresetene o le Oceania o lo’o avea e le sui o Ausetalia.

E tolu sone ua vaevaeina i ai le Oceania, o le sone sisifo, sone ogatotonu ma le sone i sasa'e.

Ina ua fesiligia Sauvao, e tusa o se avanoa e talimalo ai Amerika Samoa i se ta'amilosaga Volleyball a le Oceania i Sasa'e po'o le Oceania atoa fo'i, ae tali mai, "O le tulaga o i ai tatou malae ta'alo, e le o folaina i le laupapa o tatou malae Volleyball, o le isi lava lea mea e tatau ona mua'i faia fa'ato'a tatou gafatia ai ona talimalo. O se lu'iga fo'i e ao ina tatou va'ai toto'a i ai, a'o le'i alo atu e toe fausia nisi faleta'alo tetele mo aoga, po'o le malo fo'i. Peita'i, afai e maua se avanoa e talimalo ai i tatou, ou te iloa e se'e lava ia Samoa pe afai e maua se avanoa lata mai lava. O lo'o lava tapena i latou i malae ma nofoaga uma eseese, aua ua mae'a talimalo i latou i ta'aloga fo'i a le Pasefika, ma ua fausia lava latou malae uma i lea ituaiga o fausaga e mo'omia mai i ta'aloga fa'avaomalo i le volleyball."

OKETOPA MASINA FA'ATAUA TETE'E ATU I LE KANESA & OFU LAEI PINIKI:

Na maua le avanoa o le tama o Lumana'i Maifea mai le afio'aga o Aua e na te taliaina ai le meaalofa tupe e $500 ina ia fa'ao'o atu i lona faletua, Mrs Akenese Maifea, o le Pule Lua o le A'oga i Afonotele.

O le a malaga atu o ia e mafuta ma si ona to'alua a'o feagai o ia ma togafitiga o lona ma'i kanesa i le taimi nei. O lea meaalofa tupe ua taua'aoina mai e le American Samoa Community Cancer Coalition lea e matele ona maua fo'i le latou fesoasoani tupe e taua'aaoina mai e le Neil's ACE Home Center i Malaeimi.

Sa fa'afetaia e Lumana'i Maifea le agalelei ma ua fa'amanuia mai fo'i i le Faleoloa lauiloa, Neil’s Home Center, i le agalelei e sapaia le mau, ia tete'e atu i le Kanesa i taimi uma.

Ua fautua mai foi o ia i le to'atele, "Tautuana ma i tatou uma, a lagona loa se tiga, tusa lava pe iloa e itiiti, ae ia saili loa togafitiga, aua a o'o ina tetele ona fa'apena fo'i lea ona faigata ona toe togafiti. O le talavai a le matou aiga na misi muamua i le tausaga ua te'a, ae o lea ua toe fai atu i lenei tausaga, ua maua ai le kanesa, ae fa'afetai o lo'o la'ititi. Talosia le alofa o le Atua ia i'u manuia togafitiga."

I le fa'amoemoe lava e tasi, ia fa'apea fo'i ona la'ei e le pulega ma le au faigaluega StarKist Samoa le Mitiafu lanu Piniki i le aso Faraile ua te’a.

O le taimi o le sifi ao sa va'aia ai le to'atele o i latou na matua mafuli fo'i ma le vasega o le Packing Room i lea lava manulauti, ma ua iloga ai lo latou manatua fo'i o nai o latou uso i le galuega, o tina ma nisi o pelega ua afe moe le folauga i lenei ona o le saua o le ma'i faigata o le Kanesa.

O le susuga Taotasi Archie Soliai sa ia fa'ailoa mai, "O le taumafaiga lenei, ua tu'u atu lava i le vasega o tagata faigaluega uma, ina ia fa'ataua galuega uma e taumafai ai ona tete'e atu i le saua tele o le Kanesa. O le gasegase ua afemoe ai folauga a le to'atele o pelega i o tatou aiga, ae maise fo'i o uso ma tuafafine o tina ma tama'ita'i i totonu o le Kamupani lenei. Ua le fa'avasegaina fo'i le fasi a lenei gasegase i so'o se atunu'u o le lalolagi, ma ua matou la'eia ai le Mitiafu Piniki ina ia fa'ailoa ai, e auai le StarKist Samoa Inc. i lea fo'i kemupeni e tete'e i le Kanesa."

FA'AMANATU MAVIS RIVERS - KONESETI O MUSIKA JAZZ

E to'atele e le o latou silafia se tasi o tama'ita'i Amerika Samoa sa mua'i avea ma tamaitai pese i ituaiga musika ma fatuga fa'a-jazz. O ia lea o Mavis Rivers. Peita'i e fiafia le to'atele i fatuga ma koneseti a le ali'i pese lauiloa o Frank Sinatra, ae sa pepese ma fa'afiafia fa'atasi lea alo o Amerika Samoa ma lena ali'i tauta'ua ana fatuga.

Lea ua fa'alauiloa mai, sa pese ma fa'afiafia le tamaita'i i le fa'aili na ta'ita'ia e lona tama o Moody Rivers, ma sa latou tu'ua Hawaii ina ua mae'a pomu e Iapani Perl Harbor i le tasuaga 1941, ma o se tasi lea o mea sili ona fa'afiafiaina ai ali'i fitafita o taua, o koneseti ma le fa'aili a Moody Rivers.

Peita'i, ina ua toe si'itia le aiga lea i Aukilani, Niu SIla o iina loa na matua toe lauiloa ai pesega ma fa'afiafiaga a le tama'ita'i o Mavis Rivers.

I lona olaga i Niu Sila sa avea o ia ma tama'ita'i Ofisa i le Farmers Trading Company, ae a o'o i le po, ona pese lea ma fa'afiafia i le Kalapu. O le tausaga e 1949 na ulua'i fa'atauina atu ai lana Kaseti o Musika ma sa toe tapu'ea lea kaseti e le Zodiac mulimuli ane.

Na ia mauaina se avanoa fa'asikolasipi e a'oga ai i le Iunivesite o Utah mo le 12 masina, ma ina ua mae'a ona toe taliu mai i Amerika Samoa ma avea ma Sui Fa'asalalau i le Leitio i le tatou nei malo.

I se fa'atalanoaga a Mavis Rivers i le tausaga e 1981 e le Herald a Niu Sila, na ia fa'ailoa ai, "Sa ou mauaina le avanoa e galulue faatasi ai ma Frank Sinatra ma isi i le taimi na fa'atuina ai e Siantra lana pisinisi o le ‘Reprise’. Na matou galulue ai lava se'ia o'o i le toega o le vaitausaga 1960, tele fo'i kaseti na tu'ufa'atasia ai i lena vaitau."

E i ai le la'ua kaseti na tu'ufa'atasia ma Frank Sinatra o Pese o le Kerisimasi ma sa pu'ea lea i Amerika.

E ui la ina ua leva fo'i ona maliu lenei tama'ita'i Samoa ae ua toe fafagu ma fa'amanatu mai lana taleni e le Samoana Jazz & Arts Festival ma ua fa'ailoa mai, o le sui fa'apitoa o lo ua tapena mai mo le fa'aaliga fa'apitoa i lea fa'amoemoe, ua o'o mai ai le alo o lenei tama'ita'i pese o Mavis Rivers, le susuga Matt Gattingub.

O lea fa'amoemoe o Novema 9, 2018 i le Tradewinds ona toe maua lea o le isi fa'atasiga i le 2Dollar Beach i Alega i le Aso Sa, 11 Novema, 2018.