TAUNU'U & TUFA ATU MOEGA, NOFOA FA'ATA'AVALEVALE & TO'OTO'O E LE TAOA

O Setema na to'ai taunuu ai le pusa oloa tele sa aumaia fua e le Kamupani Va'a a le Matson Shippping, lea sa aumai ai i totonu o moega e 12 mo e gasegase fa'apitoa, o nofoa fa'ata'avalevale, o to'oto'o ma uoka fo'i mo i latou ua fa'afaigata ona savavali. Na kiliva sa'o lea pusaoloa ma tu'u i le lotoa a le TAOA (Ofisa o Tagata Matutua) i Pago Pago e tufatufa mai ai.

O lea pusaoloa ma oloa fa'apitoa na auina mai ai, o se tali mai lea i le mana'oga tupito e tusa o le asiasiga fa'apitoa na savalia e le TAOA ma le Matagaluega o le Soifua Maloloina na fa'asolo i afio'aga ta'itasi i le mavae ai o le afa o le Gita.

O lea pusa oloa o Moega, Nofoa fa'ata'avalevale ma To'oto'o o se meaalofa na taua'aoina e nisi o agalelei mai i le setete o Kalefonia, ua fa'ailoa mai i latou "O Uo Mamae & Aiga O Tagata o Soifua ma Mana'oga Fa'apitoa!" na fa'afeso'ota'ia e le Rotary Club.

O le mafuaga fo'i lea ua aumaia fua ai e le Kamupani va'a a le Matson Shipping ma toe toso fua fo'i e le Toso Pusa Oloa a le Harbor Maritime. O lea fo'i taumafaiga o lo'o galulue fa'atasi i ai le matagaluega a le Soifua Maloloina (DOH), TAOA, Rotary Club of Pago Pago, OPAD, ma le Voc Rehab lea e tofu ma sui i le taimi na to'ai taunu'u ai le Pusa Oloa ma ua tatala fo'i e tufatufa atu nei oloa aoga mo i latou ua agatonu i ai.

"O le matou savaliga lea sa alu e asiasi i tagata matutua uma o lo'o i aiga i afio'aga uma o le atunu'u ina ua mae'a le afa o Gita, ona maua ai lea o aofaiga o i latou e i ai le mana'omia e fa'aaogaina uoka, to'oto'o, nofoa fa'ata'avalevale ma Moega fa'apitoa. O le aofaiga lava o matou numera na ave ua toe fa'ao'o mai i totonu o lea pusa oloa pe sili teisi atu fo'i." O se fa'amatalaga ma le fiafia lea a le tama'ita'i Fa'atonu o le TAOA, Evelyn Satele.

O lo ua fa'ailoa mai ua maea ave'esea mai moega ma nofoa fa'ata'avalevale a le Matagaluega o OPAD, ma ua fa'apena fo'i i le vaega o le DOH. O lo'o i ai pea ni toega o nei oloa aoga o totoe ma ua fa'ailoa mai, "O lo'o faia lava asiasiga i le vasega o tagata matutua o lo'o alaala i afio'aga taitasi ma e va'aia loa o lo'o i ai le mana'omia i le taimi nei e fa'aaogaina ai nei oloa, e fa'ao'o atu loa ia i latou."

Ua fa'ailoa mai fo'i o lo'o vala'au mai nisi, ma ua faia lava le galuega alofa e pei ona ala mai ai lenei foa'i, e asiasi atu loa e moni lava e mana'omia, ona taua'ao aloa'ia loa lea o na oloa mo i  latou.

E i ai nisi sa fa'auia a latou talosaga i le falema'i i tulaga o moega ma to'oto'o, peita'i i lena vaitau sa fa'ailoa mai e le Voc Rehab ua mae'a fa'aaogaina le tinoitupe na fa'auia mai mo lea vaega o le fesoasoani mo i latou ua lutia i gasegase tumau ma ua le mafafai ai ona savavali ma ua tausia fa'apitoa i moega, peita'i o lea fa'ato'a fa'auia mai lea foa'i na tapena i ai le Rotary Club of Pago Pago, atonu e aoga pe a fesiligia se moega po'o avanoa mo lea tina matua.

O le isi mea e tatau lava ona va'ai muamua i ai le auaunaga, pe ua lisia le suafa i le TAOA - ua avea ma tagata matua ua lesitalaina i le tatou teritori. Afai ua 60 tausaga o le soifua, ua tatau loa ona tusia lou suafa i lea lisi ma lesitala ai, ona mautu lea o le avea ai o oe ma tagata matua i le Malo o Amerika Samoa. O Tausaga e 55 e agava'a ai mo le avea o ia ma tagata e faigaluega i le polokalama a tagata matutua.

MANAOMIA LE ULU E LE KAMUPANI ULU I AMERIKA SAMOA

O lo ua fa'ailoa mai e le ali'i faipisinisi o Su'a Alexander Jennings, o ia fo'i o le Faipule o tutula'i mai o le motu o Swains i le Maota o Sui i le Fono Faitulafono i lenei vaitau, "Ua ou mana'omia lava le Ulu ina ia fa'aaoga e maua ai le falaoamata lea ua matua fa'ateleina i latou e fia maua ma fiafia e fa'aaoga i a latou tausami gaosi."

Ua le gata i le Ulu lea ua fa'aaogaina e le ali'i faipisinisi falaoamata lea, ae ua fa'aaogaina fo'i le fa'i pata. Ua fa'aigoaina fo'i lana pisinisi o le "Dream Builders Agricultural Produce" o i latou e fausia miti, pe a fa'asamoaina le igoa o lana pisinisi.

"Ua tele na'ua le mana'omia o lo ua i ai nei i le ‘Dream Builders Agricultural Produce’ ma o le ulu lea e mana'omia tele lava o le Ma'afala,” o sana tala ata lea.

Ua mafua lea tulaga ona ua fa'ateleina le vasega o pisinisi e fia inivesi mai i lana pisinisi mai atunu'u i fafo, ma ua mafua ai ona saoasaoa le alumia o lana falaoamata mai le ulu ua fa'atau atu i fafo.

Ua iloga mai ua toe fa'aleleia atili le fuata o Ulu talu ona mae'a le afa o Gita ma ua naunau ai fi'i ina ia fa'aaogaina tatau le ulu, aua ne'i maumau le to'ulu ma le fa'aaogaina.

Ua fa'ailoa mai, ua mae'a malaga mai fo'i se tasi o faipisinisi Uaina mai le US Virgin Islands e mana'omia le Ulu mo le gaosiga o le uaina, o le ituaiga uaina lena o lo'o ua i ai kamupani o oloa fa'atau atu ua latou kilivaina.

Afai fo'i e le o mana'omia e se aiga fua o latou ulu e mafai lava ona foa'i atu mo i latou e fa'aaoga e gaosia mai ai le falaoamata.

O le tulaga ua i ai nei maketi ua va'ai mamao atu i ai le Dream Builders Agricultural Produce, e le o toe mamao ae avea i latou ma so'otaga o fefa'ataua'iga o le falaoamata mai le Ulu ma isi fo'i ituaiga o oloa e fa'aaoga ai le ulu i le latou gaosiga.