10 FA'AU'U LEVEL 89 - PACIFIC HORIZONS SCHOOL MAY 31, 2018:

Ua mae'a ona fa'ataunu'u le polokalama matagofie o le fa'atu'uga tu'ufa'atasi a le Level 8 ma le Vasega Level K4 i le Pacific Horizons School i le aso ananafi, Me 31, 2018. Na matua auai le vasega o matua fa'atasi ai ma latou auaiga, aua o nisi o le fanau o le a tu'ua le Pacifi Horizons Scholl ae amata a'oa'oga maualuluga i nisi o a'oga maualuluga i le teritori, ae o nisi o le a fa'aauau ai pea ona ao'oga i lea Laumua se'ia mae'a le Vasega 12.

I le polokalama fa'asolo e pu'upu'u lava ae matua anoa lona fa'atulagaina ma le fa'atinoga e le fanau fa'au'u. Na muamua solo mai le vasega 8 fa'au'u i le latou pese "Friend, Friends, which one of us Has Them? Po'o ai ua ia maua Uo Mamae? Ina ua mautu i luga o le to'a 10 o le 'au fa'au'u a le vasega valu ona soso'o lea ma gasolo atu o le laina a le Level K4 mo le latou fo'i itu o le fa'au'uga. O i latou ia sa matua iloga ona fa'amatagofieina le taeao, aua o lo'o va'aia i fofoga, e le'i ta'ita'i ona uma lo latou lalelei o tamaiti pepe i totonu o le a'oga faapea ma aiga.

O i latou fo'i na sa matua iloga ona auai fa'atasi tama ma tina e fa'aula ma lautetele a latou fa'asolo ma pale na saunia lelei e matua. I le vasega lea sa tufatufaina fo'i o latou tusi pasi ma sa tolaulauina o latou suafa e lo latou faia'oga, Ms Selele. A'o lea faia lea tulaga, sa mua'i tutula'i i latou ma fa'asoa mai a latou mana'oga mo le lumana'i, e to'atolu lelei i latou e fia avea ma leoleo, aua o i latou e matele ina puipuia le vasega atoa i le tausaga a'oga ua mae'a nei.

Ua i ai le tama'ita'i e fia avea ma foma'i, o le i si e fia avea ma Faia'oga, o le tasi e manatu o ia e fai ma se e fa'afiafia, ae o le tama'ita'i mulimuli lava o Ema Malae Mailo, o ia na avea ma Ice Breaker, e na te saunia le toe fa'afiafiaga o le latou fa'au'uga.

O sana fa'atamatalaga i o latou uso ma tuagane ua fa'au'u fa'atasi ma i latou i lenei tausaga, "Ia manatua e le'i ta'ita'i le ala i le atamai, ia fa'aauau pea ona tatou taumafai ia mati'e se taumafaiga a le Pacific Horizons lea tatou te utuvai ai, i le teritori o tatou o nonofo ma aumau ai."

Sa ia fa'afetaia  le tele o taimi fiafia o lona olaga ona o le mafutaga ma ana uo mamae ua ia mauaina i lana vasega fa'ai'uaso e afua mai le valu tausaga o latou a'o'oga fa'atasi mai, a'o nisi fo'i e le'i leva le mafutaga, ae ua matua mafana a latou fa'auoga.

Na tula'i le tama'ita'i faia'oga Ms Broecker, ae taua'aoina uma lava e faia'oga o mataupu ta'itasi na tau'avea e le vasega 8. O i latou ia ua tatau ia i latou ona fa'atalofa i le fanau fa'au'u, aua sa latou taumafai e a'oa'o i latou i aso ta'itasi.

O le saunoga fa'ai'u o le aso na tu'u lea i le tama'ita'i sa ia mauaina togisilia o le vasega 8 i lenei tausaga, Ms Angela Chen. O ia lea sa faia le fa'afetai i matua, le fa'afetai i aiga, le fa'afetai i le vasega o faia'oga ma le Pulega a le a'oga i Pacific Horizons School, o ia lava fo'i ua atoa lelei le 10 tausaga o lo'o a'oa'o mai e le PHS ma o le a fa'aauau fo'i ona nofo ai lava e tauivi ai lona fa'ailoga o soso'o mai e pasia ai le vasega 12 i le teritori nei.

O lana fa'afetai i matua aua ua loa o tausi ma fa'afailele mai i latou a'o laiti ma leiloa lelei se mea, i le o'o mai ai i lenei la'asaga muamua o le olaga taumafai, ua mae'a a'oga tulaga muamua ae o le a fa'asolo atu i a'oa'oga maualuluga, fa'afetai mo le latou manatu ia mautu le atamai ia i latou o fanau ae a le lumana'i o aiga, le malo ma le atunu'u atoa.

O i latou ua fa'au'u e to'a sefulu e aofia ai: Sinaloa Avala; Liaina Cassens; Angela Chen; Marcelo Chen; Georgia Cox; Annie Kim; Julius Laulu; Helfritz Lin; Tamatoa Siavii ma Anina Velghe.

TINOITUPE TOINA MO LE HISTORICAL PRESERVATION MAI LE USDOI & NATIONAL PARK:

O le Ofisa o le Amerika Samoa Historical Preservation ua avea nei ma se tasi o vaega o le tatou Malo ua atofaina i ai e le USDOI ma le National Park le vaega tupe e $400,000. e fa'atupe ai. O se vaega lea ua toina mai i se fa'atupega na toina i setete ma teritori uma o le Malo Tele i lona aotelega e $48.9miliona.

O lona uiga o le aofa'iga tonu lava o le tinoitupe fa'amatu'u mai ai mo Amerika Samoa e $399,210. O le aso ananafi sa fa'amatu'u mai lea aotelega o le seleni mo le tatou Ofisa lea, aua o lo'o aofia i le lisi o Ofisa fa'apea i totonu o le Setete ma teritori o le Iunaite Setete, lea ua fa'ailoa mai e 175 le aofaiga o nei Ofisa uma.

Ua fa'ailoa mai e le Failautusi o le Initeria Ryan Zinke, "O pili uma sa aoina mai i le viliga o le gataifale o le malo tele, ua mafai nei ona toe fa'asoa atu e fa'atupe ai Ofisa o lo'o Puipuia Malu o Tatou Tala'aga i totonu o setete ma teritori ta'itasi o le Iuniate Setete o Amerika atoa.

O alagatupe fo'i nei, o lo'o fa'asoa ma va'ava'aia toto'a mai e le Konekeresi lona tufatufaga fa'apea ma le fa'aaogaina.

LELEI MAI TAUMAFAIGA - AU VOLLEY BALL AMERIKA SAMOA I SAMOA FLAG:

Toe pau lava le mea o totoe o le sailiga o le siamupini o le Sisigafu'a i Samoa i le ta'aloga o le Volley Ball. E tolu Aufili na masi'i, o le 'au a tama ua fa'aigoaina Annex ma le 'au a tama'ita'i ua fa'aigoaina o le BTI o lo'o filifilia fo'i sui o ta'a'alo ai, ma le 'au a Kuini lea ua fa'ailoa mai, ua au uma lava i latou i le to'avalu maualuluga.

O i latou na e sailia mai ai le to'a fa maualuga ma aga atu ai e sailia le siamupini, ma i 'au e tulaga tolu, ma le fa i le liki. Peita'i, o le isi to'afa o le to'avalu lea, e sailia le Ipu apamemea mo le ta'amilosaga Volley Ball atoa.

O le a maua se tala auiliili mautu lelei i a tatou taumafaiga uma pe a mae'a le Liki atoa ma maua mai tala i le aumalaga o 'au fili e tolu na masi'i i Samoa, peita'i, ua tele fa'asalalauga ma ata ua auina mai, ae tapua'ia ia faia i malae o alo o le atunu'u ina ia taliu mai ma le manuia.

O nei ta'aloga uma ua faia lea i le faleta'alo tele o le Iunivesite o Samoa, ma o se taimi muamua fo'i lea ua tauva ai tatou alo i lea malae matagofie i Samoa.