Ads by Google Ads by Google

Tala I Vaifanua


Tulaga lua Britney Unasa ma Magalita Johnson ua pale nei i le tofi Tausala Lalelei o Amerika Samoa. [ata: Esther Posala]

MAGALITA PHILOMENA JOHNSON - TAUSALA LALELEI AMERIKA SAMOA

 

I le tauvaga Tausala Lalelei sa fa'atautaia i le afiafi o le aso Faraile na te'a nei, ua filifilia ai le tama'ita'i o Magalita Philomena Johnson mai le afioaga o Vaitogi ma Tausala Lalelei o Amerika Samoa. O ia lea sa sapaia e ona matua ma lona aiga i le tauvaga tausala 2018-2019.

 

Ua amatalia nei lana nofoaiga, ae ua fa'amatu'u mai fo'i lea tofiga mai le tausala lalelei 2017-2018 Ms Matauaina Gwendolyn Toomalatai. 

 

Ua tapenapena nei fo'i Johnson mo le tauvaga a Tausala Lalelei o le Pasefika i le fa'aiuga o lenei tausaga, ae fa'apena fo'i ona fa'amatu'u ese atu ai e le Tausala o le Pasefika o i ai nei le pale, Matauaina Gwendolyn Toomalatai.

 

I le tauvaga o lenei tausaga sa matagofie taumafaiga a tausala totoa na tula'i mai e tauva e toalima. O fa'aiuga fo'i a ali'i ma tamaita'i fa'amasino e le'i faigofie, peita'i e tatau lava ona i ai le manumalo. O le tulaga lua sa mauaina e le tama'ita'i na sapaia lana taumafaiga e le Tutuila Stores, Britney Unasa Galo; o le tulaga tolu sa maua e le tausala sa sapaia lana taumafaiga e le T & T Recycling, Talileleia Tasi; tulaga fa sa tula'i mai ai le Tausala na sapaia lana taumafaiga e le Kamupani a le Western Union Edwina Laina Tanielu, ma le tausala sa mauaina le tulaga lima o le tama'ita'i lalelei o Christine Duterte lea na sapaia e le Pacific Refrigeration.

 

O vaega e tolu sa 'avea e Johnson o le Taleni, o le Fesili ma Tali i le taimi o le tauvaga, fa'apea ma le Fa'atalanoaga na mua'i faia e fa'atatau i a latou manulauti tau'ave mo le fa'amoemoe ua mae'a nei.

 

Matagofie lea po a tamali'i ma o le polokalama fa'asolo na tapena i ai le tama'ita'i o Wilma ma le susuga le ali'i Loia o Tosimae'a Tupua.

 

LEA MICHELLE LOVE - TAMA'ITA'I PESE SAUNI MALAGA FA'AFIAFIA I LE ATU SAMOA

 

Ua tapena mai lenei alo o Samoa ma Amerika Samoa e malaga mai, ma ua ia fa'ailoa mai, "Afai e misia e oe la'u fa'aaliga i Samoa, su'e atu a'u i Amerika Samoa." O lenei tama'ita'i o matua o ona matua o tagata Samoa ma Amerika Samoa, peita'i na soifua a'e o ia i Oceaniside, Kalefonia.

 

O se mea ua sili ona fiafia ai, ua ia gafatia ona malaga mai e pei ona ia momo'o ai, "Afai ou te toe fo'i mai e asiasi i Samoa ma Amerika Samoa atunu'u sa masani ona fa'atafao i ai o'u matua a'o la'ititi, e ao lava ina ou toe fo'i mai o se tama'ita'i ua lauiloa ni a'u pese ua tusia ma ua ou usua lava e a'u."

 

E matua fa'aosofia lava o ia i pesega fa'asamoa, o latou fatu ma e matua fiafia o ia i pesega fa'a-jazz, ma pese fa'araggae.

 

O le taimi muamua lenei ua toe taliu mai ai Lea Love i Samoa o se tasi ua sauni e fa'afiafia ma ua matua nofouta o ia i ituaiga pese e na te usuina i lana fa'aaliga.

 

Fa'ailoa e ia, na amata lava ona tusitusia ana pese e ia lava i le 10 o ona tausaga, ma e fiafia e pesepese i fatuga sa fa'alogo ai i ona matua e taina, o fatuga nei fa'aatumotu lea sa ola a'e ai i latou.

 

Ua maua fo'i ana pese nei sa ia tusia ma fatu i luga o le YouTube i lona igoa, e maise ai lana lipine "No Feels".

 

Aua ne'i galo, e te le tau alu i Samoa, ae taga'i lelei i ni fa'asalalauga fa'ala'uaitele, e malaga mai lava i Amerika Samoa nei.

 

FOA'I LEALAIFUANEVA P. FOUNDATION - BOYS & GIRLS CLUB

 

O le vaiaso na te'a nei sa fa'atasi atu ai le tama'ita'i Peresetene o le Lealaifuaneva Peter E. Reids Charitable Foundation i le Boys & Girls Club o American Samoa (BGCAS) i Tafuna e fa'ao'o atu se fesoasoani e $10,000 e sapaia ai taumafaiga a le fanau talavou o le atunu'u i aoa'oga fa'asaeanisi, Matematika, Tekonolosi, Inisina ae maise o Pesega ma le Atisi.

 

O le aso 2 Oketopa, 2018 na taua'aoina lea meaalofa e le tama'ita'i Peresetene & Taitaifono o Pisinisi GHC Reids, Peter E Reid Stevedoring, fa'apea foi ma le Lealaifuaneva Peter E. Reid Foundation.

 

O le Taitaifono o le Boys & Girls Club, Maryanne A.T. Tulafono sa ia taliaina lenei meaalofa ma sa ia fa'afetaia fo'i le agalelei o le Foundation ma ia fa'ailoa mai, "O le a aoga tele lenei foa'i mo le fa'aleleia atili o tomai fa'aatisi o le fanau i totonu o lenei kalapu."

 

"Ona o foa'i fa'apenei e mafai ai ona fa'aauau misiona fa'atautaia a le tatou kalapu lea e tautua ai le aotelega o le 150 o tama ma teine talavou o le atunu'u. E mafai ona fa'aleleia atili ai latou tomai eseese o tausaili, ma agai atu i se lumana'i manuia i a'oa'oga fo'i o lo'o taumafai i ai i totonu o a'oga o lo'o a'o'oga ai."

 

I le tausaga 2017, na foa'i ai fo'i e le Foundation le $15,000 i le BGCAS ma ua latou fa'atuina ai le isi Potu mo Pesega ae ua fa'amanatu ai le afioga le Senatoa Lealaifuaneva Peter Reid ma lona fiafia i pesega ma fatuga fa'asamoa ae maise ai le taina o le Ukulele ma usu pese.

 

KARLINNA SANCHEZ - NUSIPEPA A LE JSA PROGRAM:

 

Ua fa'alauiloa mai i le lomiga a le "JSA -Be the People" le ata ma le matati'a na ausia e le tama'ita'i talavou mai le Samoana High School, Karlinna Suluama Sanchez o Amerika Samoa. O ia lea sa ia ausia fo'i matati'a maualuluga i lona toe tausaga na malaga ai o se sui ua agava'a i lea polokalama ma ua fa'amau fa'ailoga lea tulaga i lona umia lea o le samala fa'apitoa [gavel].

 

O le fa'asalalauina ai o lona ata ma lona fa'ailoga lea, ua fa'amauina ai fo'i sana fa'asoa i le to'atele o fanau a'oga i a'oga maualuluga i so'o se mea o le Iunaite Setete, ina ia tausailia avanoa e malaga atu ai lenei polokalama JSA, e faalautele atili ai lo latou silafia i a'oa'oga, fa'atasi ai ma ituaiga faigamalo o lo'o fa'atautaia ai le tatou malo tele ma o le a aoga tele fo'i mo le fa'agasologa o lou olaga a'oga i le lumana'i.

 

O lana fa'asoa sa talosagaina e le JSA ina ia fa'asalalauina, ia aoga i nisi o fanau a'oga e una'ia ai i latou e taumafai mo nei avanoa i tu'uaga umi o a'oga i tausaga ta'itasi.

 

O lana fa'asoa ua ia fa'ailoa mai ai, "Ou te fiafia tele e auai i le JSA i tausaga ta'itasi nei e tolu, i ona nofoaga eseese ua fa'atautaia ai. Ua tele se mea ua ou maua mai ai i a'oa'oga sa fa'atautaia ma ua auai i ai, o le a ou fa'aaogaina nei tomai eseese na a'oa'oina ai i a'u a'oga aua o lea ua ou ulufale nei i UCLA, Kalefonia."

 

O lona toe tausaga i Princeton, lea na ia mauaina ai loa lea fa'ailoga taua, peita'i o lona uso la'ititi o Yasminna Sanchez ua lua fo'i tausaga o malaga i le JSA program, ua lua ana samala na maua i le taumafanafana o le tausaga nei. O lona uiga, e maualuga fo'i le matati'a lea ua olioli atu Amerika Samoa e latou molimauina i le lumana'i o a tatou fanau i le JSA.