Pago Pago - AMERIKA SAMOA

FA’AAUAU TAPUNIA NOFOAGA TAUSI AI FANAU

I se fa’aaliga mai le Matagaluega o Tautua mo Alagamanuia Lautele (DHSS) i le fa’aiuga o le vaiaso ua te’a, sa fautuina ai matua le fa’aauau pea ona tapunia o nofoaga o lo’o tausi ai fanau mo lenei vaiaso Fepuari aso 14 e oo atu ia Fepuari aso 18. 

“E tusa ai ma fautuaga mai i ali’i ma tamaitai foma’i”, o le a fa’auauina pea i lenei vaiaso le tapunia o nofoaga e tausi ai fanau i Day Cay Centers, o se vaega lea o le fa’aaliga mai le DHSS. “Matou te faafetai atu i lau fesoasoani mai e saga puipui pea le soifua maloloina o i o tatou atunu’u, ‘ae maise lava fanau.”

O le mafuaga o le tapunia pea o nei nofoaga ona o le fa’amai pepesi o le Respiratory Syncytial Virus (RSV). 

Fa’ailoa e le Matagaluega o le Soifua Maloloina le fa’aauau pea ona pepesi lenei fa’ama’i, ma le tapunia o nofoaga e tausi ai fanau.

E i ai se fesili i lea fa’ama’i fa’afesootai le matagaluega i le 219. 

PE AFAI MAE’A TAUSAGA O TUI PUIPUIA COVID-19 FAI TUI PUIPUIA O LE BOOSTER

Nisi o mea na fa’afesiligia e le au malaga sa fa’anofoesea i le vaiaso ua te’a sa malaga mai i le aso 27 o Ianuari mai Hawaii, na fa’alogoina ai se tasi o fesiligia le tulaga o ona tui ua atoa le tausaga talu mai ona faia ae le mautonu o ia poo le mea e toe fai nisi ona tui puipuia e lua?

O lea ua tuusa’o mai le fa’ailo, afai ua e iloa ua uma le tausaga e tasi talu ona faia ou tui puipuia, ona faia loa lea o le Booster ina ia mautinoa o lo’o fa’aauau ai pea ona malosi lou tino e tete’e atu i le Covid 19 ma ona ituaiga eseese ua pipisi fa’aafi nei i le lalolagi.

O le ituaiga Covid-19 lea ua sili nei ona pipisi ma e malosi fo’i lona verusi o le Omnicron, ua fa’apea fo’i ona i ai le isi ituaiga na muamua mai o le Delta, o lona uiga e tauau fo’i e soso’o mai se isi ituaiga ese nai loa lea lua ua fa’amauina nei.

O le aiaiga o le Booster e tatau ona faia lu tui lea talu ona mae’a faia lou tui lona lua o le Pfizer poo le Moderna poo le tasi le masina talu ona mae’a faia lou tui e tasi o le Janssens. “O le isi sailiiliga ua mautu mai i Kalefonia lea e matua tetele fo’i le aofai o e ua a’afia ai i le Omnicro ma le Delta Covid-19, ua fa’ailoa mai o le Booster e sili ona mautu ai fete’ena’iga a lou tino ma le Omnicron lea ua pipisi tele mai,”o se tala fa’alauiloa lea a le susuga le foma’i Dr Aifili John Tufa i le Zoom. 

Ma o le aso Tofi o le vaiaso ua te’a sa mafai ai ona o’o i latou aiga i latou sa fa’anofoesea i le ACF ma Fatuoaiga, ae o le aso Sa ua te’a na i latou sa i ai i le Tradewinds Hotel. 

LE TALI SA’O I FESILI O LE TALOFAPASS

O se tasi o mea ua atugaluga ua ai nei , o i latou sa le fa’amauina tonu tali o fa’afesili i luga o le TaloafaPass. E tauau o le a i ai se sala e toina mai i nei sui, aua o le fa’afaigofie atoa uma o galuega mo le fa’anofoesea lenei a le aumalaga, e fuafua lea i tali o a tatou fesili i luga o le Itulau ua tapena mo tatou femalaga’iga.

O lo ua fa’ailoa mai o le a fa’auia atu lea mataupu i le Ofisa o le Loia sili faapea fo’i ma le talanoaina lea o lea ituaiga o faiga masani a e malaga, mo se fa’aiuga tonu e faia i ai. Peita’i e tauau ina i ai se fa’asalaga e fa’ae’e i nei sui.

Pe afai ae tuu atu i le isi tele o galuega e toe fesuia’ia ma tau toe fa’avasega e foma’i pe a sau se suega ua fa’amaonia mai ua i ai verusi i lou tino, e tatau lava ona molia le sui ma fa’ae’e se sala e tatau ai.

Ua ese mai lea ua i ai ma nisi ua fa’aleagaina meatotino a le faletalimalo ao fa’anofoesea ai. Ua fa’ailoa mai fo’i, ua mae’a faamauina ata na tapu’e mai i le taimi na faasalalauina i le Facebook, lea ua va’aia ai nei mea ua fa’aleagaina mai, ae maise lava i le taimi ua toe soso’o ai aso o le fa’anofoesea lenei.

Ua fa’amautu mai nei, e le fa’atonu o le Matgaluega o le Soifua Maloloina, “Pe afai e te toe fia malaga mai i Amerika Samoa, ia silafia lelei o le umi o le Fa’anofoesea e tatau lava ona 14 aso, peita’i ona o nisi va’alele sa malaga mai ua leai lava nisi o le pasese e fa’amaonia o i ai ni verusi o le Covid e ala i a latou suega sa faia, o lea sa tatala ai i tua tagata ae le’i mae’a le 14 aso poo le fitu aso.”

Ua faailoa mai fo’i e le fa’atonu o le soifua maloloina, “O le aumalaga lenei a Ianuari 27, 2022, o se fa’anofoesea sili lea ona faigata talu mai ona o mai aumalaga toe taliu mai i Amerika Samoa.”

O le i si aumalaga lea e agai mai ia Fepuari 17, e fa’ataunuuina lava ma le manuia e le o taofia.

Ua i ai le suiga i suega e faia mo sui uma e aga’i mai, “O le suega o le 10 aso a’o le’i toe taliu mai ua le toe fa’amalosia nei, ae ua na’o le suega o le 5 aso malaga mai ma le suega o le 48 itula pe 24 itula malaga mai, o le a fa’amalosia mo le TalofaPass.

Ua fa’ailoa fo’i o le a le toe i ai nisi o le aufaigaluega a le DOH i le malae va’alele ina ia fa’atautaia ai latou tiute iina, e le toe siakia fo’i ni o latou fiva e pei ona faia i le malae va’alele.

Ua faailoa mai e le susuga le Fa’atonu o le Soifua Maloloina, “Ona ua i ai le to’atele o sui faigaluega a le Matagaluega i le fa’anofoesea ona o le Covid ua lavevea ai nisi o le aufaigaluega, o lea la ua a’afia ai galuega fa’atino a Falema’i fa’aitumalo ma tuiga fo’i e ao ina faia, ona ua fa’aititia fo’i le aufaigaleuga galulue mo nei tautua.”