Pago  Pago - AMERIKA SAMOA

TAPUNIA NOFOAGA O LO’O TAUSI AI FANAU MO LE VAIASO LENEI

I se pepa o fa’amatalaga ma i le Matagaluega Tatua mo Alagamanuia Lautele (DHSS), i le vaiaso ua te’a, sa fa’ailoa ai mo le lautele le tapunia, mo le vaiaso lenei, nofoaga o lo’o tausia ai fanau - Child Care Centers/Family Care Homes. 

Ona o se fautuaga mai le Matagaluega o le Soifua Maloloina (DOH), ua tapunia ai child care centers ma family child care homes o lo’o tausia ai le fanau - e amata mai i le aso Gafua, Fepuari aso 7 e o’o atu i le aso 11 o Fepuari. 

O se taumafaiga lenei ina ia tau taofi le pepesi o le fa’ama’i o le RSV (Respiratory Synctial Virus) po o se tasi foi o vairusi o lo’o aafia ai le mamalu o si o tatou atunu’u, ‘ae maise le fanau. 

Ua talosagaina e le DHSS ia matua ina ia fa’atulaga nisi fuafuaga mo le tausiga o le fanau mo lenei vaiaso. Afa e i ai se suiga ona vave logo atu lea e le DHSS.

Ua fautuaina e le DHSS i latou o lo’o fa’atautaia nofoaga tausi (providers) mo fanau, fa’apea ma tou ‘aufaigaluega ina ia fa’aaoga lenei vaiaso e tapen ma fa’amama atoatoa maota o lo’o tausi ai fanau. 

A i si se fesili, valaau le DHSS i le 633-1571.

TOE TATALA LE VAITA’ELE O PALA LAGOON - PAKA LIONA

Talu mai ona tapunia le tatou Vaita’ele Tele o le Pala Lagoon i le Paka Liona mo le silia ai ma le lua tausaga atoatoa, o lea ua toe fa’ailoa mai o lo ua sauni le tatou lea tautua e toe tatala mo le fa’aaogaina e le mamalu lautele.

E pei ona silafia, na amata lava ona tapunia le tatou lea Vaita’ele ona o le pepesi solo fo’i o le Misela i Samoa na lua, soso’o mai ai lava ma le sosolo mai o le mau tima’iga ma fa’asa o le Covid-19, ae o lea ua tau matu’u ese atu nei mea uma, ua manatu ai fo’i le pulega o lea aseta a le atunuu, o le a toe tatala mai.

O le Aso Lulu, Fepuari 02, 2022, ua toe tatala ai lenei tautua ina ia toe fa’aaogaina e so’o se tasi ma le mamalu lautele o le atunuu.

O le tamaitai o Tiara Drabble, se tasi o sui totino o le Komiti Fa’afoe o lea tautua a le tatou malo, ua ia fa’ailoa mai, “Ona ua tele na’ua talosaga ua fa’auia mai i le komiti Fa’afoe ina ia toe tatala le tatou Vaita’ele lenei mo aoaoga a’au a le fanau, o nisi o fiafiaga a le fanau mo latou aso soifua, o nisi fo’i o tama ma tina matutua e fa’atautaia ai latou auauga fa’amalositino, o lea ua toe manatu ai le Komiti Fa’afoe o le tatou Vaita’ele o le a toe tatala ia Fepuari 02, 2022.”

O lo’o i ai nisi o vaega o lea Aseta o lo’o fa’atautaia ona galuega toe fa’aleleia atili, ae ua faia se fa’aiuga a le Komiti Fa’afoe ina ia tatala loa le tatou Vaitaele mo le mamalu lautele.