OKETOPA - FA'ATAUA GALUEGA TAOFIA SAUAGA TOTONU O AIGA

O le masina lenei o Oketopa 2018 e fa'ataua ai galuega tima'i ma aga atu i le taofiga o Sauaga i Totonu o Aiga, po'o so'o se isi lava mafutaga e auai atu i ai fanau ma tina po'o tama fo'i.

Ua mae'a fa'atulaga galuega tima'i e fa'aautu aga'i i le tele o ituaiga o sauaga o lo'o a'afia ai mafutaga fa'aleaiga, ae matele fo'i ina natia mai le silafia a nisi i fafo mai o le mafutaga, ma ua ava ma se nofoaga ua le toe saogalemu ai i latou ua sauaina.

O le taeao o le aso Gafua sa fa'atasia uma nisi e fia fa'alogologo, lea sa malaga mai ai le tama'ita'i o Tuiloma Sina Retzlaff mai Samoa, o se tasi o lo'o tula'i mai malosi mai ina ia taofia le sauaga o tina ma fanau.

"O nei sauaga o le aveesea fa'amalosi fo'i lea o aia tatau a tina ma fanau e soifua fuafua ai i se olaga saogalemu i lagona ae maise i o latou fo'i tino,” O se tasi lea o vaega o lana tautalaga.

O le aso Lulu ma le aso ananafi e fa'atino ai fo'i ituaiga sauaga e o'o a'afia ai tina ma fanau i totonu o aiga, o le mamafa o saunoaga fa'amaasiasia ai i latou, ma le o'otia fo'i o le loto ona o upu malolosi e lalafo mai a'o pupula atu mata fa'asiasia. O nei a'oa'oga ma fa'atinoga na faia e Tuiloma.

O le taumafaiga atoa lenei, ina ia mautinoa ai, ua le toe sauaina i latou ua o'o i ai i lea tulaga, ma sa latou savavali ese mai ai. Ua fa'asoa mai fo'i i mea e ao ina faia e i latou e o atu ina ia fa'ao'o se galuega lavea'i i nei sui ua sauaina.

O lo ua i ai fo'i se avanoa e fautuaina ai le potopotoga e le mamalu o tama faife'au tofia e le Komiti o lenei taumafaiga, Mau ia fausia se aiga fiafia.

TINA TULA'I MAI - VAVE FAIA SUESUEGA KANESA O SUSU

O Oketopa o le masina ua fa'atulaga e le malo e fa'ataua ai galuega tima'i ma galuega e tineia ai le Kanesa o Susu, ma ua fa'ailoa mai, "Tina e, e ao ia i tatou uma ona fa'ataua mafutaga ma fanau ma Aiga, aua e le toe maua fa'alua se avanoa e i tatou e mafuta ai pea ma aiga pele, pe afai ae ogaoga le Kanesa o Susu mulimuli ane. E aoga tele ona vave maua po'o e maua ai, ae amata loa togaifitiga, ina ia mautinoa le toe soifua fiafia ma lou aiga.”

E le gata i lena kanesa ao le Kanesa o le Fa'aautama, ua matele ina maua ai tina ua sili atu le matutua i le 45 tausaga o le soifua, lea fo'i ua fa'amalosia atu le faia o talavai mo Tina ma faia ai su'ega ia vave iloa ma togafitia fo'i.

"O i tatou lava e mafai ona tatou vave iloaina ni auga o nei gasegase ua amata ona po'ia ai i tatou. Aua le fa'atalatu'u, ae sau loa e va'ai talavai a tina i le afiafi mo suega o le Kanesa o le Fa'a'autama, o iina o lo'o mau ai le toe fa'aumiumi o le mafutaga ma le tama ma le fanau,” o se tasi lea o fautuaga a le vasega o tama'ita'i foma'i o lo'o fa'atautaia nei suesuega o lea Kanesa.

Ua le nofonofo fo'i le American Samoa Community Cancer Coaliation Luana Scanlan, i lona tima'i mai i le vasega o tina uma, ua silia ma le 45 tausaga ina ia o'o atu, faia latou suega nei o le Kanesa o le Susu ma le Kanesa o le Fa'aautama. O lo'o ua i ai le potu o talavai a tina i le falema'i tele i Faga'alu e te mafai ona asiasi i ai ma fa'afesiligia taimi o talavai fa'apitoa mo le Kanesa a Tina, a le o lena fo'i e mafai ona vala'au i le Matagaluega o le Soifua Maloloina i Faga'alu ma fesiligia taimi e faia ai talavai mo tina uma i lea fo'i fa'ama'i.

FA’AILOA PAGATIA STARKIST SI'ITAGA TOTOGI AMATA

Ua fa'ailoa se lagona o'otia o le Kamupani a le StarKist Samoa e tusa o le si'itaga o totogi o tagata amata mo tagata faigaluega e pei ona fa’atulafonoina e le fetarale, ma fa'amalosia 30 Setema 2018. O le si’itaga e 40 sene i le itula.

Ua fa'ailoa mai, "O i matou o se tasi o Kamupani ua leva ona tautua ia Amerika Samoa, ua avea i matou ma se kamupani e a'afia lava i taimi uma e fa'amalosia ai si'itaga o totogi maulalo a le Malo Tele. E sili fo'i ona lagona e i matou le afaina o lea tulaga, ae o lo'o taumafai fo'i e fa'amautu atili avanoa faigaluega mo ni tagata e to'atele i le atunu'u. Ua latou iloa lelei fo'i le pa'u teisi o le tamaoaiga tausi i totonu o le teritori i taimi uma e si'itia ai le totogi o tagata faigaluega.”

O le si'itaga o le totogi amata maulalo i le 44% i le tausaga 2007, lea na mafua ai ona fa'amavae mai le Kamupani a le "Chicken of the Sea" ia Setema o le tausaga e 2009. Ua le gata i lea, i le tausaga 2016 na tapunia le Samoa Tuna Processors Inc.

"Ua le mafai ona matou fa'ailoa atu i le taimi nei, se a'afiaga o le a alia'i mai ona o lenei si'itaga o le totogi maulalo, ae tau ina faailoa atu, o taimi uma lava e fa'amalosia ai le si'itaga o totogi maulalo, e afaina le fa’afoeina o le kamupani i ana galuega,” o se tala lea a le StarKist.

I le si’itaga ua i ai nei, o le totogi amata maualalo mo kamupani ‘ia ua $5.56 i le itula.

PILI PASIA KONEKERESI FESOASOANI MO FEOAIGA I LE TERITORI

O se pili ua ma’ea pasia e le Konekeresi, ma fa’amoemoe e saunia e Peresitene Trump, o lo’o aofia ai se vaega mo feoa'iga i le ea i le va o Tutuila ma Manu’a. O lea vaega o le pili mo le fa’aleleia o feoaiga i le ea mo le teritori, sa fa’auluina e le faipule o Amerika Samoa i le Konekeresi, Aumua Amata.

"E ui ina tele feuiuiaiga o lenei mataupu e matua ogaoga lava i le soifua femalaga'i o si tatou atunu'u i le ea, ae fa'afetai i le Atua ua tali mai i se tali fa'afiafialoto, ua fo'i mai lenei tausaga ma se 'ai sili ona aoga, ia tau fa'aleleia ai le auaunaga a va'alele e femalaga'i ai i le va o Pago Pago ma le Manu'atele,” ose tala lea a Amata.

"E lua tausaga o tau fa'apasia lelei mai lenei pili, ma o le mea sili ua ta'i 180 aso ma toe fa'aulu talosaga a le Samoa Airways po'o le Polenisia e tautuaina ai le Manu'atele, nai lo o le 30 aso o lo’o i ai i le taimi nei.”